പദവിക്ക് നിരക്കാത്ത തരത്തിൽ പെരുമാറ്റം; കരുനാഗപ്പള്ളി എസിപിക്കെതിരെ അച്ചടക്ക നടപടി വേണമെന്ന് മനുഷ്യാവകാശ കമ്മീഷൻ, ആഭ്യന്തര സെക്രട്ടറിക്ക് ഉത്തരവ് നൽകി

കരുനാഗപ്പള്ളി പടനായർ കുളങ്ങര വടക്ക് സ്വദേശി അൻവർ മുഹമ്മദ് സമർപ്പിച്ച പരാതിയിലാണ് നടപടി. അൻവറും ഭാര്യയും തമ്മിലുള്ള ദാമ്പത്യ കലഹത്തിൽ കരുനാഗപ്പള്ളി എസിപി വിദ്യാധരൻ അന്യായമായി ഇടപെട്ടെന്നാണ് ആരോപണം. കമ്മീഷൻ കൊല്ലം ജില്ലാ പോലീസ് മേധാവിയിൽ നിന്ന് അന്വേഷണ റിപ്പോർട്ട് വാങ്ങിയിരുന്നു. മകളെ അൻവറിൽ നിന്ന് വിട്ടുകിട്ടാൻ ഭാര്യ എസിപിക്ക് പരാതി നൽകിയിരുന്നതായി റിപ്പോർട്ടിൽ പറയുന്നു. പരാതി രജിസ്റ്ററിൽ രേഖപ്പെടുത്താതെ എസിപി നേരിട്ട് അന്വേഷിച്ചു.

കുട്ടി അൻവറിന്റെ സഹോദരിയുടെ മാന്നാറിലുള്ള വീട്ടിൽ ഗൃഹ നിരീക്ഷണത്തിലായിരുന്നു. കുട്ടിയെ കാണാനില്ലെന്ന പേരിൽ അമ്മയിൽ നിന്നും പരാതി എഴുതി വാങ്ങിയ എസിപി കരുനാഗപ്പള്ളി സിഐയെ വിവരം അറിയിക്കാതെ ഇടപെടൽ നടത്തി. ഗാർഹിക പീഡന കേസിൽ പ്രതിയാക്കുമെന്ന് അൻവറിനെയും പിതാവിനെയും ഭീഷണിപ്പെടുത്തിയതായി റിപ്പോർട്ടിൽ പറയുന്നു. ഭീഷണിയെ തുടർന്ന് ഇക്കഴിഞ്ഞ മെയ് 12ന് കുട്ടിയെ കോടതിയിൽ ഹാജരാക്കി.

കേസ് രജിസ്റ്റർ ചെയ്യാതിരിക്കുന്നതിന് പ്രതിഫലമായി എസിപിക്ക് നൽകാൻ വക്കീൽ ഗുമസ്‌തനായ മണികണ്‌ഠൻ അൻവറിന്റെ പിതാവിൽ നിന്ന് 30,000 രൂപ വാങ്ങി. ഇതിൽ നിന്നും എസിപിക്ക് നൽകാൻ അഡ്വ. മനോജ് മഠത്തിൽ 25,000 രൂപ വാങ്ങിയതായി റിപ്പോർട്ടിലുണ്ട്. എസിപിക്കെതിരെ തുടർനടപടികൾ സ്വീകരിക്കുന്ന കാര്യം പരിഗണനയിലാണെന്നും ജില്ലാ പോലീസ് മേധാവിയുടെ റിപ്പോർട്ടിൽ പറയുന്നു. എസിപി നടത്തിയത് ഗുരുതരമായ കൃത്യവിലോപമാണെന്ന് കമ്മീഷൻ ഉത്തരവിൽ പറഞ്ഞു.