കൊവിഡ് രോഗിക്ക് തുടർചികിത്സ നൽകിയില്ല; സ്വകാര്യ ആശുപത്രിക്കെതിരെ നടപടിയെന്ന് ജില്ലാ കളക്ടർ

കൊല്ലം: ചികിത്സയിലിരിക്കെ കൊവിഡ് സ്ഥിരീകരിച്ച രോഗിയെ തുടർ ചികിത്സ നൽകാതെ ജില്ലാ ആശുപത്രിയിലേക്ക് അയച്ച സ്വകാര്യ ആശുപത്രിക്കെതിരെ ദുരന്ത നിവാരണ നിയമ പ്രകാരം നടപടിയെടുക്കാൻ ജില്ലാ കളക്ടർ ബി.അബ്‌ദുൽനാസർ നിർദേശിച്ചു. കൊവിഡ് പ്രതിരോധ പ്രവർത്തനങ്ങൾ അവലോകനം ചെയ്യാൻ കൂടിയ ഉന്നത ഉദ്യോഗസ്ഥരുടെ ഓൺലൈൻ യോഗത്തിലാണ് ഇത് സംബന്ധിച്ച് കളക്ടർ അറിയിപ്പ് നൽകിയത്.

Also Read: കുടുംബ വഴക്ക് മൂര്‍ച്ഛിച്ചു... അമ്മൂമ്മയ്ക്ക് തടികഷ്ണംകൊണ്ട് ക്രൂര മര്‍ദ്ദം, ആശുപത്രിയിലെത്തിക്കാനും തടസ്സം നിന്നു, ചെറുമകള്‍ അറസ്റ്റില്‍

ചികിത്സയിലിരുന്ന രോഗിക്ക് തുടർ ചികിത്സ നൽകാതെ കൊവിഡിന്റെ പേരിൽ ജില്ലാ ആശുപത്രിയിലേക്ക് അയച്ച വിവരം ആശുപത്രി സൂപ്രണ്ട് ഡോ.ഡി വസന്തദാസാണ് കളക്ടറുടെ ശ്രദ്ധയിൽപ്പെടുത്തിയത്. നൂറും അതിന് മുകളിലും കിടക്കകളുള്ള സ്വകാര്യ, സഹകരണ ആശുപത്രികളിൽ ചികിത്സ തേടിയെത്തുന്നവരിൽ കൊവിഡ് സ്ഥിരീകരിക്കുന്നവരെ പ്രവേശിപ്പിക്കാൻ പ്രത്യേക ഐസിയു വാർഡുകൾ ഒരുക്കണമെന്ന് മുമ്പ് നിർദേശം നൽകിയിരുന്നു.

Also Read: കൊല്ലത്ത് രേഖകളില്ലാത്ത സ്വര്‍ണം പിടികൂടി; പിഴയടയ്‌ക്കേണ്ടത് 68 ലക്ഷത്തിലധികം രൂപ

ഇക്കാര്യത്തിൽ വീഴ്ച വരുത്തിയ ആശുപത്രികൾക്കെതിരെയും നടപടി ഉണ്ടാകും. ജില്ലയിൽ ക്ലോസ്ഡ് ക്ലസ്റ്റർ ഗ്രൂപ്പുകളുടെ (സിസിജി) പ്രവർത്തനം കൂടുതൽ ശക്തമാക്കാൻ ഡെപ്യൂട്ടി കളക്ടർ എംഎ റഹിമിനെ ചുമതലപ്പെടുത്തി. സി സിജി താഴെത്തട്ടിൽ ഫലപ്രദമായി നടപ്പിലാക്കുന്നതിന് തദ്ദേശ സ്ഥാപന പ്രതിനിധികൾ സഹകരിക്കണമെന്നും കളക്ടർ നിർദേശിച്ചു. സിസിജി സംബന്ധിച്ച് ജില്ലയിൽ ബോധവത്കരണം ശക്തമാക്കും. ആര്യങ്കാവ് ചെക്ക് പോസ്റ്റ് വഴി ഇനി മുതൽ രാവിലെ ഏഴിന് ശേഷം ചരക്ക് വാഹനങ്ങളും അത്യാവശ്യക്കാരെയും മാത്രമേ കടത്തിവിടൂ എന്നും യോഗത്തിൽ തീരുമാനിച്ചു.

കൊല്ലം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ