കൊവിഡ് മുക്തരായ കൊല്ലം ജില്ലയിലെ പോലീസുകാർ പ്ലാസ്‌മ ദാനം ചെയ്തു

കൊല്ലം: രാപകൽ ഭേദമില്ലാതെ കൊവിഡ് പ്രതിരോധ പ്രവർത്തനങ്ങൾ നടത്തുന്നതിനിടെ കൊല്ലം സിറ്റി പോലീസിലെ വനിതകളടക്കം നൂറിനടുത്ത് പോലീസ് ഉദ്യോഗസ്ഥർക്ക് കൊവിഡ് ബാധിച്ചിരുന്നു. പ്രതിരോധ പ്രവർത്തനങ്ങളുടെ മാത്രമല്ല, രോഗത്തിന്റെ ബുദ്ധിമുട്ടുകളും അനുഭവിച്ചറിഞ്ഞു അവർ. കൊവിഡ് രോഗികളുടെ അതിജീവനത്തിനായി നടത്തുന്ന പ്ലാസ്മ തെറാപ്പിയ്ക്കായി പ്ലാസ്മ നൽകാൻ കൊവിഡ് മുക്തരായ പലരും തയ്യാറാകുന്നില്ലെന്ന വാർത്തകൾക്കിടെയാണ് പ്ലാസ്മ നൽകാൻ ഇവർ സന്നദ്ധരായത്.

Also Read: വീണ്ടും തിരുവഞ്ചൂരിന്റെ നാക്കുപിഴ; ഇത്തവണ അല്‍പ്പം കടന്നുപോയി!! വീഡിയോ

കൊല്ലം സിറ്റിയിലെ പോലീസ് അസോസിയേഷൻ ജില്ലാ കമ്മിറ്റി പ്രവർത്തനങ്ങൾ ഏകോപിപ്പിച്ചു. ഇതോടെ പാരിപ്പള്ളി മെഡിക്കൽ കോളേജിൽ പോലീസ് ഉദ്യോഗസ്ഥരുടെ പ്ലാസ്മ ദാന ക്യാമ്പ് തുറന്നു. ജി.എസ്.ജയലാൽ എം.എൽ.എ ക്യാമ്പിന്റെ ഉദ്ഘാടകനായെത്തി. ബുധനാഴ്ച രാവിലെ കൊല്ലം സബ് കളക്‌ടർ ശിഖാ സുരേന്ദ്രൻ, ക്രൈംബ്രാഞ്ച് എ.സി.പി എ.അഭിലാഷ് എന്നിവർ ഉദ്യോഗസ്ഥർക്കൊപ്പം ആദ്യ ദിനത്തിൽ പ്ലാസ്മ നൽകി. വനിതകൾ ഉൾപ്പെടെ 20 പോലീസുകാർ ജില്ലയിലെ വിവിധ പോലീസ് സ്റ്റേഷനുകളിൽ നിന്ന് പ്ലാസ്മ നൽകാനെത്തി. ശേഷിക്കുന്ന ഉദ്യോഗസ്ഥർ മെഡിക്കൽ കോളേജ് നൽകുന്ന സമയത്തിന് അനുസരിച്ച് പ്ലാസ്മ നൽകാനെത്തും.

Also Read: കൊല്ലം തുറമുഖത്ത് പാസഞ്ചർ, കാർഗോ ടെർമിനലുകൾ തുറന്നു; തീരമടുക്കുന്നത് കൊല്ലത്തിന്റെ കടലോളം വികസന സാധ്യതകൾ

ഗുരുതരാവസ്ഥയിലുള്ള കൊവിഡ് രോഗികളുടെ ജീവൻ രക്ഷിക്കാൻ ഉപകാരപ്പെടുന്ന പ്ലാസ്മ ഡൊണേഷൻ എല്ലാ ജില്ലകളിലും സംഘടിപ്പിക്കുമെന്ന് പോലീസ് അസോസിയേഷൻ സംസ്ഥാന ജോയിന്റ് സെക്രട്ടറി ഷിനോദാസ് പറഞ്ഞു. മെഡിക്കൽ കോളേജ് പ്രിൻസിപ്പൽ എൻ. റോയി, ആശുപത്രി സൂപ്രണ്ട് ഹബീബ് നസിം, ചാത്തന്നൂർ എ.സി.പി ഷൈനുതോമസ്, പാരിപ്പള്ളി ഇൻസ്‌പെക്ടർ രൂപേഷ് രാജ്, പൊലീസ് അസോസിയേഷൻ ജില്ലാ സെക്രട്ടറി ജിജു.സി.നായർ തുടങ്ങിയവർ പങ്കെടുത്തു.