ചെന്നായ്ക്കള്‍ ഓടിച്ച്‌ മ്ലാവിനെ പിടികൂടി കറിവച്ച കേസില്‍ മൂന്ന് പേര്‍ അറസ്റ്റില്‍

ചെന്നായ്ക്കള്‍ ഓടിച്ച്‌ അവശയായ മ്ലാവിനെ പിടികൂടി കറിവച്ച കേസില്‍ മൂന്ന് പേര്‍ അറസ്റ്റില്‍. പെരുന്തോയില്‍, പ്ലാമൂട്ടില്‍ തേക്കേതില്‍ വീട്ടില്‍ സുരേഷ് കുമാര്‍ , കറവൂര്‍ കീഴയം ഭാഗം നെല്ലിമൂട്ടില്‍ വീട്ടില്‍ ഷാജി, കുറുന്ദമണ്‍ ചരുവിള പുത്തന്‍ വീട്ടില്‍ തമ്ബി എന്ന് വിളിക്കുന്ന ഷൈലേന്ദ്രന്‍ എന്നിവരെയാണ് വനപാലകര്‍ അറസ്റ്റു ചെയ്തത്.പത്തനാപുരം അമ്ബനാര്‍ വനമേഖലയിലായിരുന്നു പ്രതികളുടെ വന്യമൃഗവേട്ട. പത്തനാപുരം വനംറേഞ്ചിന് കീഴിലെ അമ്ബനാര്‍ സന്യാസികോണ്‍ വനഭാഗത്തായിരുന്നു പ്രതികള്‍ വേട്ടയ്ക്കിറങ്ങിയത്. ഇതിനിടെയാണ് ചെന്നായ്ക്കള്‍ ഒാടിച്ച്‌ അവശയായ ഒരു മ്ളാവിനെ പ്രതികള്‍ പിടികൂടിയത്. ഒരു മ്ലാവിന്റെ ഇറച്ചി പാകം ചെയ്തു കഴിച്ചതിന് പുറമേ വില്‍പന നടത്തുകയും ചെയ്തെന്നാണ് വനപാലകര്‍ അന്വേഷണത്തിലൂടെ കണ്ടെത്തിയിരിക്കുന്നത്. മ്ലാവിനെ വേട്ടയാടാന്‍ ഉപയോഗിച്ച ആയുധങ്ങളും കറിവെക്കാന്‍ ഉപയോഗിച്ച പാത്രങ്ങളും പിടിച്ചെടുത്തിട്ടുണ്ട്. പത്തനാപുരം റേഞ്ച് വനം ഓഫീസര്‍ ബി. ദിലീപിന്റെ നേതൃത്വത്തിലുളള സംഘമാണ് പ്രതികളെ പിടികൂടിയത്. അറസ്റ്റ് ചെയ്ത പ്രതികളെ പുനലൂര്‍ വനം കോടതിയില്‍ ഹാജരാക്കി റിമാന്‍ഡ് ചെയ്തു.