കൊല്ലം: കൊവിഡ് വാക്സിൻ വിതരണത്തിനായി ജില്ലയിൽ വിപുലമായ മുന്നൊരുക്കങ്ങൾ തുടങ്ങി. വാക്സിൻ സജ്ജമായാൽ വിതരണം വൈകാതിരിക്കാൻ രാജ്യത്താകെ നടത്തുന്ന മുന്നൊരുക്കങ്ങളുടെ ഭാഗമായാണ് കൊല്ലത്തും നടപടികൾ വേഗത്തിലാക്കിയത്. ഇതിനായി ദ്രുതകർമ്മ സേനയുടെ പ്രഥമ യോഗം ജില്ലാ കളക്ടർ ഉൾപ്പെടെയുള്ളവരുടെ സാനിധ്യത്തിൽ കഴിഞ്ഞ ദിവസം ചേർന്നു. ആരോഗ്യ വകുപ്പും ജില്ലാ ഭരണകൂടവുമായി പ്രവർത്തനങ്ങൾ ഏകോപിപ്പിക്കുന്നത്.
ആദ്യം വാക്സിൻ ആരോഗ്യ പ്രവർത്തകർക്ക്
ആരോഗ്യ പ്രവർത്തകർക്കാണ് ആദ്യ ഘട്ടത്തിൽ വാക്സിൻ നൽകുക. തുടർന്ന് പോലീസ്
, സന്നദ്ധ സാമൂഹിക പ്രവർത്തകർ ഉൾപ്പെടുന്ന മുൻനിര കൊവിഡ് പോരാളികൾ, 50 വയസിന് മുകളിൽ പ്രായമുള്ളവർ, വിവിധ രോഗങ്ങൾ ബാധിച്ച 50 വയസിൽ താഴെ പ്രായമുള്ളവർ എന്നിങ്ങനെ നാല് വിഭാഗക്കാർക്കാണ് അടുത്ത ഘട്ടത്തിൽ വാക്സിൻ നൽകുക.
Also Read: ഇവിടെ മത്സരം അമ്മയും മകനും തമ്മിൽ! ആര് ജയിക്കും? ആകാംക്ഷയോടെ നാട്
വാക്സിൻ വിതരണ മേൽനോട്ടം ഉന്നത സമിതിക്ക്
ജില്ലാ മെഡിക്കൽ ഓഫീസറുടെ നേതൃത്വത്തിലുള്ള ഉന്നത സമിതിയാണ് വാക്സിൻ വിതരണത്തിനുള്ള മേൽനോട്ട ചുമതല വഹിക്കുക. ഇതിനായുള്ള ഡാറ്റാ ശേഖരണ നടപടികൾ ജില്ലയിൽ ആരംഭിച്ചു. ഒരാളെപ്പോലും വിട്ടുപോകാത്ത രീതിയിൽ വിവര ശേഖരണം നടത്തും. മുഴുവൻ ആരോഗ്യ പ്രവർത്തകരുടെയും വിവരങ്ങൾ ഉൾപ്പെടുത്തിയെന്ന് ഉറപ്പാക്കുന്നതിന് ആയുഷ് വകുപ്പിന്റെയും സ്വകാര്യ ലാബുകളുടെയും സഹകരണം തേടും. സ്വകാര്യ ലാബുകളുടെ സഹകരണം വിവിധ ലാബ് അസോസിയേഷനുകൾ നിർവഹിക്കും. ഏകോപനത്തിനായി ജില്ലാ ലാബ് ടെക്നീഷ്യൻ കെ.സുധീറിനെ ചുമതലപ്പെടുത്തി. ഇന്ത്യൻ മെഡിക്കൽ അസോസിയേഷൻ വഴി ജില്ലയിലെ എല്ലാ ഡോക്ടർമാരുടെയും വിവരങ്ങൾ ശേഖരിക്കും. പ്രാഥമികാരോഗ്യ കേന്ദ്രങ്ങളിലും സാമൂഹ്യ ആരോഗ്യ കേന്ദ്രങ്ങളിലും ഡേറ്റാ എൻട്രി പ്രവർത്തനങ്ങൾ കൃത്യമാണെന്ന് മെഡിക്കൽ ഓഫീസർമാർ ഉറപ്പുവരുത്തും.