ചോദിച്ചത് ത് 50 പവൻ സ്വർണ്ണം, 10 ലക്ഷം രൂപ, കാർ എന്നിവ; സുമയ്യ ജീവനൊടുക്കിയത് പ്രതിശ്രുത വരന്‍റെ ഭീഷണിയെ തുടർന്നെന്ന് പരാതി

ഓച്ചിറ പോലീസിന്‍റെ അന്വേഷണം നടക്കുന്നുണ്ടെങ്കിലും കേസിന്റെ ഗൗരവത്തിനു അനുസരിച്ചുള്ള പുരോഗതിയില്ല. സുമയ്യയുടെ മൊബൈൽ ഫോൺ ഫൊറൻസിക് വിഭാഗത്തിന്റെ പക്കലാണിപ്പോൾ. ഫോണിൽ നിന്നുള്ള വിവരങ്ങളൊന്നും പൊലീസിന് ഇപ്പോഴും ലഭിച്ചിട്ടില്ല. വിദേശത്ത് ജോലി ചെയ്യുന്ന മേമന സ്വദേശിയായ യുവാവും സുമയ്യയും തമ്മിലുള്ള വിവാഹ നിശ്ചയം ജൂൺ 18 നാണ് നടന്നത്. അതിനു ശേഷം യുവാവ് ജോലി സ്ഥലത്തേക്ക് മടങ്ങി. സുമയ്യയുടെ ഇഷ്ടത്തിന് വഴങ്ങിയാണ് കുടുംബം വിവാഹം നടത്തി കൊടുക്കാൻ തയ്യാറായത്.

സ്ത്രീധനം ആവശ്യപ്പെടാതെ വിവാഹ നിശ്ചയത്തിന് തയ്യാറായ യുവാവ്, നിശ്ചയം കഴിഞ്ഞതോടെ നിലപാട് മാറ്റി. 50 പവൻ സ്വർണ്ണം, 10 ലക്ഷം രൂപ, കാർ എന്നിവ നൽകണമെന്ന് ആവശ്യപ്പെട്ടതായി സുമയ്യയുടെ കുടുംബം ആരോപിക്കുന്നു. 10 ലക്ഷം രൂപ ബഹ്റൈനിൽ ബിസിനസിനു വേണ്ടി ആവശ്യപ്പെട്ടെന്നും പണം കിട്ടിയില്ലെങ്കിൽ വിവാഹം നടക്കില്ലെന്ന് സുമയ്യയെ ഭീഷണിപ്പെടുത്തിയതായും കുടുംബം നൽകിയ പരാതിയിൽ പറയുന്നു.

പ്രതിശ്രുത വരൻ, മാതാപിതാക്കൾ, സഹോദരി, മൂന്നു സുഹൃത്തുകൾ എന്നിവർക്കെതിരെയാണ് പരാതിയിലെ പരാമർശങ്ങൾ. സ്കൂളിൽ സുമയ്യയുടെ സഹപാഠി ആയിരുന്ന യുവാവ് പലതരത്തിൽ മകളെ ഭീഷണിയിപ്പെടുത്തിയാണ് വിവാഹത്തിന് സമ്മതിപ്പിച്ചതെന്നും കുടുംബം പറയുന്നു. ലഭിച്ച വാട്സ്ആപ്പ് ചിത്രങ്ങളിൽ നിന്ന് സുമയ്യ ജീവനൊടുക്കിയതാണെന്നു മനസിലാക്കിയ പ്രതിശ്രുത വരനാണ് വിവരം സുമയ്യയുടെ കുടുംബത്തെയും പോലീസിനെയും ഫോണിൽ വിളിച്ചറിയിച്ചത്.