കൊല്ലം: സംസ്ഥാന അതിര്ത്തിയായ ആര്യങ്കാവില് 27ലക്ഷം രൂപയും 5.5 പവന് സ്വര്ണ്ണവുമായി തമിഴ്നാട് സ്വദേശി എക്സൈസിന്റെ പിടിയിലായി. കെഎസ്ആര്ടിസി ബസില് വരികയായിരുന്ന തമിഴ്നാട് കടയനെല്ലൂര് സ്വദേശി മുഹമ്മദ് അക്രം(27)ആണ് പിടിയിലായത്. തെങ്കാശി - തിരുവനന്തപുരം ഫാസ്റ്റ് പാസഞ്ചര് ബസ് എക്സൈസ് ചെക്ക് പോസ്റ്റിലെത്തിയപ്പോള് നടത്തിയ പരിശോധനയിലാണ് മുഹമ്മദ് അക്രം കുടുങ്ങിയത്. എക്സൈസ് സംഘം തിരഞ്ഞത് ലഹരി വസ്തുക്കളായിരുന്നെങ്കിലും മുഹമ്മദ് അക്രത്തിന്റെ ബാഗില് നിന്ന് ലഭിച്ചത് പണവും രണ്ട് സ്വര്ണ മാലകളുമായിരുന്നു.
ഇതുമായി ബന്ധപ്പെട്ട രേഖകളൊന്നും മുഹമ്മദ് അക്രത്തിന്റെ കൈവശം ഉണ്ടായിരുന്നില്ല. അഞ്ഞൂറിന്റെയും രണ്ടായിരത്തിന്റെയും നോട്ടുകള് മൂന്ന് കെട്ടുകളിലായി ന്യൂസ് പേപ്പറില് പൊതിഞ്ഞ നിലയില് ബാഗില് ഒളിപ്പിച്ചിരിക്കുകയായിരുന്നു. തിരുവനന്തപുരത്ത് സ്വര്ണ്ണം വാങ്ങാന് കൊണ്ടുവന്ന പണമാണ് പിടികൂടിയതെന്ന് ഉടമ ചോദ്യം ചെയ്യലില് പറഞ്ഞു. കൂടുതല് അന്വേഷണങ്ങള്ക്കായി പണവും സ്വര്ണ്ണവുമായി ഉടമയെ തെന്മല പൊലീസിന് കൈമാറി.
Read Latest Local News and Malayalam News
പണത്തിന്റെ ഉറവിടത്തെ സംബന്ധിച്ചും മറ്റും കൂടുതല് അറിയാന് ഉടമയെ ചോദ്യം ചെയ്യുമെന്ന് സംഭവസ്ഥലം സന്ദര്ശിച്ച പുനലൂര് ഡിവൈഎസ്പി ബി വിനോദ് പറഞ്ഞു. പോപ്പുലര് ഫ്രണ്ടിന്റെ നേതൃത്വത്തില് കഴിഞ്ഞ ആഴ്ചയില് ഹര്ത്താല് പ്രഖ്യാപിച്ചതിന് ശേഷം തമിഴ്നാട് അതിര്ത്തിയിലെ ചെക്ക്പോസ്റ്റ്കളിലും മറ്റും വാഹന പരിശോധന കര്ശനമാക്കിയിട്ടുണ്ട്. ബസില് പണവുമായെത്തിയ ആള്ക്ക് പോപ്പുലര് ഫ്രണ്ടുമായി ബന്ധമുണ്ടോയെന്നും അന്വേഷിക്കുന്നുണ്ട്.