കൈക്കൂലി വാങ്ങുന്നതിനിടെ ശക്തികുളങ്ങര ഗ്രേഡ് എസ്ഐ വിജിലന്‍സിന്‍റെ പിടിയിൽ

കൊല്ലം: കാൽ ലക്ഷം രൂപ കൈക്കൂലി വാങ്ങുന്നതിനിടെ ഗ്രേഡ് സബ് ഇൻസ്‌പെക്ടറെ വിജിലൻസ് പിടികൂടി. അന്വേഷണം നടത്തി കുറ്റപത്രം സമർപ്പിച്ച് സ്ത്രീധന പീഡന കേസിൽ പ്രതിക്ക് അനുകൂലമായി കോടതിയിൽ മൊഴി നൽകാനെന്ന പേരിൽ കാൽ ലക്ഷം രൂപ കൈക്കൂലി വാങ്ങുന്നതിനിടെ ശക്തികുളങ്ങര പോലീസ് സ്റ്റേഷനിലെ ഗ്രേഡ് എസ്ഐ അബ്ദുൽ സലീമാണ് അറസ്റ്റിലായത്. വർഷങ്ങൾക്ക് മുമ്പ് അബ്ദുൽസലിം ചവറ പോലീസ് സ്റ്റേഷനിൽ ജോലി ചെയ്യുമ്പോൾ പരാതിക്കാരനായ ഫൈസൽ പ്രതിയായി സ്ത്രീധന പീഡന കേസ് രജിസ്റ്റർ ചെയ്തിരുന്നു.

Also Read: കാറിന്‍റെ ചില്ല് ഇപ്പോഴും താടിക്കുള്ളില്‍... പുഴുവരിച്ച അനില്‍ കുമാറിന്‍റെ ചെറു മകള്‍ക്കും തിരുവനന്തപുരം മെഡിക്കല്‍ കോളേജില്‍ നിന്ന് നേരിട്ടത് ദുരനുഭവം

കേസിൽ അന്വേഷണം നടത്തി കുറ്റപത്രം കൊല്ലം ജുഡീഷ്യൽ ഒന്നാം ക്ലാസ് കോടതിയിൽ സമർപ്പിച്ചിരുന്നു. വിചാരണ ആരംഭിച്ച കേസിൽ മൊഴി നൽകാൻ കഴിഞ്ഞ ആഴ്‌ച അബ്ദുൽ സലീമിന് കോടതിയിൽ നിന്ന് സമൻസ് ലഭിച്ചിരുന്നു. തുടർന്ന് സലിം ഫോണിൽ ഫൈസലിനെ ബന്ധപ്പെട്ട് കോടതിയിൽ അനുകൂലമായി മൊഴിൽ നൽകണമെങ്കിൽ 25000 രൂപ നൽകണമെന്ന് ആവശ്യപ്പെട്ടു. ഫൈസൽ ഇക്കാര്യം കൊല്ലം വിജിലൻസ് ഡിവൈഎസ്പി കെ അശോക് കുമാറിനെ അറിയിച്ചു. പിന്നീട് വിജിലൻസ് നിർദേശം അനുസരിച്ചായിരുന്നു ഫൈസൽ പ്രവർത്തിച്ചത്.

Also Read: 'അവർ മനുഷ്യരല്ല, മൃഗങ്ങളാണ്, നരകം കണ്ടു... മെഡിക്കല്‍ കോളേജില്‍ അബോധാവസ്ഥയിലിരിക്കെയാണ് പുഴുവരിച്ചത്', അനില്‍ കുമാറിന്‍റെ വാക്കുകള്‍ കേട്ടാല്‍ ആരുടെയും കണ്ണ് നിറയും

ശനിയാഴ്‌ച വൈകിട്ട് അഞ്ചിന് കരുനാഗപ്പള്ളിയിൽ പ്രവർത്തിക്കുന്ന അബ്ദുൽസലീമിന്‍റെ ബന്ധുവിന്‍റെ ജൂവലറിയിൽ പണവുമായി ഫൈസൽ എത്തി. ഇവിടെ വെച്ച് പണം വാങ്ങുന്നതിനിടെ അബ്ദുൽ സലീമിനെ വിജിലൻസ് അറസ്റ്റ് ചെയ്യുകയായിരുന്നു. കേസ് രജിസ്റ്റർ ചെയ്ത സമയത്തും കൈക്കൂലി നൽകിയതായി ഫൈസൽ വിജിലൻസിന് മൊഴി നൽകിയിട്ടുണ്ട്. വിജിലൻസ് ഡിവൈഎസ്പി കെ അശോക് കുമാർ, സിഐ എം അജയനാഥ് എന്നിവരുടെ നേതൃത്വത്തിലായിരുന്നു അറസ്റ്റ്. അബ്ദുൽ സലീമിനെ തിരുവനന്തപുരം വിജിലൻസ് കോടതിയിൽ ഹാജരാക്കും.


കൊല്ലം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ

കൊല്ലം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ