കൊല്ലം ഉറച്ച കോട്ടയെന്ന് എല്‍ഡിഎഫ്; അട്ടിമറി പ്രതീക്ഷിച്ച് യുഡിഎഫും ബിജെപിയും

ഇതുവരെ ജില്ലാ പഞ്ചായത്തിൽ അധികാരം നേടാൻ കഴിഞ്ഞിട്ടില്ലെന്ന പരിമിതി ജില്ലയിലെ യുഡിഎഫിനുണ്ട്. കൊല്ലത്തെ എൽഡിഎഫിലെ പ്രധാനികളായിരുന്ന ആർഎസ്പി മുന്നണി മാറി എത്തിയിട്ടും അധികാര നേട്ടത്തിലേക്ക് യുഡിഎഫിന് എത്താനായില്ല. നിലവിലെ അനുകൂലമായ സാഹചര്യം പ്രയോജനപ്പെടുത്തിയേ മതിയാകൂ എന്ന നിർദേശം സംസ്ഥാന കോൺഗ്രസ് നേതൃത്വം ഡിസിസിക്ക് നൽകിയിരുന്നു. പതിവിന് വിരുദ്ധമായി ആദ്യം സ്ഥാനാർത്ഥികളെ പ്രഖ്യാപിച്ച് പ്രചരണം തുടങ്ങാനായി എന്ന മികവ് യുഡിഎഫിനുണ്ട്.

യുവാക്കൾക്ക് പ്രാധാന്യം നൽകിയതിനൊപ്പം ജനറൽ സീറ്റിൽ വനിതകളെ മത്സരിപ്പിക്കാനും ഇത്തവണ കോൺഗ്രസ് തയ്യാറായി. വിജയിക്കാൻ കഴിയുന്ന സാഹചര്യം ജില്ലയിലുണ്ടെന്നാണ് യുഡിഎഫ് ക്യാമ്പിന്റെ ആത്മവിശ്വാസം. ഓരോ ഡിവിഷനുകൾക്കും പ്രത്യേക ചുമതലക്കാരനെ നൽകി പ്രവർത്തനങ്ങൾ ഏകോപിപ്പിക്കുന്നുണ്ട്. ഇത്തവണ ജില്ലാ പഞ്ചായത്തിൽ അക്കൗണ്ട് തുറക്കാനാകുമെന്ന പ്രതീക്ഷയിലാണ് എൻഡിഎ നേതൃത്വം. വിജയം ലക്ഷ്യമിട്ട് സംസ്ഥാന - ജില്ലാ നേതാക്കളെ കൂട്ടത്തോടെ മത്സര രംഗത്തിറക്കാൻ ബിജെപിക്ക് കഴിഞ്ഞു.

കഴിഞ്ഞ തവണ ബിജെപി രണ്ടാമതെത്തിയ കല്ലുവാതുക്കൽ ഡിവിഷൻ ഉൾപ്പെടെ അര ഡസൻ ഡിവിഷനുകളിൽ അട്ടിമറി ഉണ്ടാകുമെന്നാണ് അവർ കണക്ക് കൂട്ടുന്നത്. ബുധനാഴ്ച ജില്ലയിലെത്തുന്ന സംസ്ഥാന പ്രസിഡന്റ് കെ.സുരേന്ദ്രൻ വിവിധ ഭാഗങ്ങളിൽ സ്ഥാനാർത്ഥികൾക്കായി റോഡ് ഷോ നടത്തുന്നുണ്ട്. ബിജെപിയുടെ കൂടുതൽ സംസ്ഥാന നേതാക്കൾ പ്രചരണത്തിന്റെ അവസാന ഘട്ടത്തിൽ ഗ്രാമങ്ങളിലേക്കെത്തും. യുഡിഎഫ്, എൽഡിഎഫ് മുന്നണികളുടെ സംസ്ഥാന നേതാക്കളും പ്രചരണത്തിന്റെ അവസാന ദിവസങ്ങളിൽ പ്രവർത്തകർക്ക് ആവേശവുമായി ജില്ലയിലെത്തും.