ബലമായി പിടിച്ച് ചുമരിലേക്ക് തള്ളി, വാരിയെല്ലിൽ പിടിച്ചമർത്തി ശ്വാസം മുട്ടിച്ചു, കേട്ടാലറക്കുന്ന അസഭ്യ വർഷം, കൊല്ലത്ത് മാധ്യമപ്രവർത്തകന് പോലീസിന്റെ ക്രൂര മർദ്ദനം

സ്റ്റേഷനിൽ എത്തിക്കുകയും ക്രൂരമായി മർദ്ദിക്കുകയും അസഭ്യ വർഷം ചൊരിയുകയും ചെയ്തെന്നാണ് അസിഫലി പരാതിയിൽ പറയുന്നത്. സംഭവവുമായി ബന്ധപ്പെട്ട് നടപടിയാവശ്യപ്പെട്ട് അസിഫലി മുഖ്യമന്ത്രിക്കും സംസ്ഥാന പോലീസ് മേധാവിക്കും പരാതിനൽകിയിട്ടുണ്ട്. സ്റ്റേഷനിലെ സംഭവങ്ങൾ മൊബൈൽ ക്യാമറയിൽ പകർത്താൻ ശ്രമിക്കുന്നതിനിടെ, ഫോൺ പിടിച്ചുവാങ്ങി നിലത്തെറിയുകയും ചെയ്തെന്ന് അസിഫലി പറയുന്നു. ഒരു കാരണവുമില്ലാതെ ഇത്തരം നടപടികൾക്ക് വിധേയനായതിന്റെ മാനസിക സമ്മർദ്ദം ഏറെയാണെന്നും പരാതിയിൽ പറയുന്നു.

മെയ് പത്താം തീയ്യതിയാണ് സംഭവം നടന്നത്. ഉച്ചക്ക് 12 മണിക്ക് കോഴിക്കോടേക്കുള്ള ട്രെയിൻ കയറാൻ കൊല്ലം റയിൽവേ സ്റ്റേഷനിലെത്തിയ അസിഫലിയെ വൈശീഖ് വിജിഎന്ന സിവിൽ പോലീസുകാരൻ തടഞ്ഞു നിർത്തി ഐഡി കാർഡ് ചോദിച്ചു. ട്രെയിൻ കയറാൻ ധൃതിയിൽ ലഗേജുകളുമായി നടക്കുന്ന ഞാൻ കാര്യമറിയാതെ അമ്പരന്നുവെന്ന് അസിഫലി പറയുന്നു. വളരെ അപമര്യാദയിൽ പോലീസുകാരൻ ഐ ഡി കാർഡ് കാണിക്കാൻ ആവശ്യപ്പെടുകയുണ്ടായി. മറ്റു യാത്രക്കാരൊക്കെ രണ്ടാം പ്ലാറ്റ്‌ഫോമിലേക്ക് യാതൊരു ചെക്കിങ്ങുമില്ലാതെ കടന്നു പോകുമ്പോൾ എന്നെ മാത്രം തടയുന്നതെന്തിനെന്ന് ചോദിച്ചപ്പോൾ ''എനിക്കിഷ്ടമുള്ളവരെ ചെക്ക് ചെയ്യാനാണ് യൂണിഫോമിട്ട്‌ ഇവിടെ നിൽക്കുന്നതെന്നായിരുന്നു വൈശാഖ് വിജിയുടെ മറുപടിയെന്ന് പരാതിയിൽ പറയുന്നു.

മറ്റു യാത്രക്കാരുടെ മുന്നിൽ വെച്ച് അപമാനിച്ചു. അതിനു ശേഷം ബലമായി റയിൽവേ പോലീസ് സ്റ്റേഷനിലേക്ക് പിടിച്ചു കൊണ്ടു പോയി.ഫോണിൽ വിളിച്ചു പറഞ്ഞത് പ്രകാരം സ്റ്റേഷൻ കവാടത്തിൽ രഞ്ജു ആർ എസ്‌ എന്ന സബ് ഇൻസ്‌പെക്ടറുടെ നേതൃത്വത്തിൽ നാലോളം പോലീസുകാർ കാത്തിരിക്കുന്നുണ്ടായിരുന്നു എന്നും പരാതിയിൽ പറയുന്നു. സ്റ്റേഷന് പുറത്ത് വെച്ച് തന്നെ രഞ്ജു ആർ എസ്‌ എന്ന സബ് ഇൻസ്‌പെക്ടർ എന്റെ കോളറിൽ കയറിപ്പിടിച്ച് ഒരു കുറ്റവാളിയെ എന്നവണ്ണം സ്റ്റേഷനിലേക്ക് വലിച്ചിഴച്ച് കൊണ്ടുപോയി കഴുത്തിൽ ബലമായി പിടിച്ചു ചുമരിലേക്ക് തള്ളി. വാരിയെല്ലിൽ പിടിച്ചമർത്തി ശ്വാസം മുട്ടിച്ചു. ചുറ്റുമുള്ള പോലീസുകാരും സബ് ഇസ്പെക്റ്ററും കേട്ടാലറക്കുന്ന അസഭ്യവർഷം നടത്തി. മൊബൈലിൽ റെക്കോർഡ് ചെയ്യാൻ ശ്രമിച്ചപ്പോൾ ഫോൺ പിടിച്ച കൈ പിടിച്ച് ഞെരിച്ച് ഫോൺ നിലത്തെറിഞ്ഞു പൊട്ടിച്ചു എന്നും പരാതിയിൽ വ്യക്തമാക്കുന്നു.

മാധ്യമപ്രവർത്തകനാണെന്ന ഐഡി കാർക്ക് ബാഗിൽ നിന്ന് പോലീസുകാർക്ക് ലഭിച്ചപ്പോൾ ഇത് എവിടെ നിന്ന് ഒപ്പിച്ചു എന്ന് പറഞ്ഞായിരുന്നു തെറിവിളി. കേരളാ ഗവൺമെൻറ് നൽകിയ ഐഡിയാണെന്നും ഈ കാണിക്കുന്ന പ്രവൃത്തിക്കെതിരെ പരാതി നൽകുമെന്ന് പറഞ്ഞപ്പോൾ ലു ഭാഗത്തും വളഞ്ഞു നിന്ന് വീണ്ടും തെറി വിളിയായി. പരാതി കൊടുത്താൽ നിന്നെ തീർക്കാൻ ഞങ്ങൾക്കറിയാം എന്ന് വധഭീഷണി മുഴക്കിയെന്നും അസിഫലി മുഖ്യമന്ത്രിക്കും പോലീസ് മേധാവിക്കും നൽകിയ പരാതിയിൽ പറയുന്നു. എനിക്ക് ട്രെയിൻ മിസ്സാവുമെന്ന് പറഞ്ഞപ്പോൾ താൻ ബോംബ് വെക്കാൻ പോകുന്നയാളാണോ എന്നൊക്കെ പരിശോദിച്ചിട്ട്‌ വിടാം എന്നായിരുന്നു എസ്ഐയുടെ മറുപടി.

നിരവധി യാത്രക്കാരുടെയും പൊതുജനങ്ങളുടെയും മുന്നിൽ വെച്ച് അപമാനിതനായെന്നും രഞ്ജു ആർ എസ്‌ എന്ന സബ് ഇസ്പെക്ടർ വൈശാഖ്ന് വിജി എന്ന പോലീസുകാരൻ പറഞ്ഞതു പ്രകാരം സഹപ്രവർത്തകർക്കൊപ്പം നിന്ന് എന്നെ ദേഹോപദ്രവം ഏല്പിക്കുകയും അസഭ്യവർഷം നടത്തുകയും അധികാര ദുർവിനിയോഗം നടത്തി. ആത്മാഭിമാനത്തെ കളങ്കപെടുത്തുകയും എന്റെ സഞ്ചാര സ്വാതന്ത്ര്യത്തെ തടസ്സപെടുത്തുകയും ചെയ്തിരിക്കുന്നു. പോലീസെന്ന അധികാരം ഉപയോഗിച്ച് എന്നെ ഉപദ്രവിക്കുകയും അസഭ്യവർഷം നടത്തുകയും തൊഴിലിനെ നിന്ദ്യമായി പരിഹസിക്കുകയും സഞ്ചാര സ്വാതന്ത്ര്യം തടസ്സപെടുത്തി തടഞ്ഞു വെക്കുകയും ചെയ്ത സബ് ഇൻസ്പെക്ടർ രഞ്ജു , വൈശാഖ് വി ജി എന്ന പോലീസുകാർക്കും അവരോടൊപ്പം തെറിവിളിച്ച് തടഞ്ഞു നിർത്തിയ സ്റ്റേഷനിൽ യൂണിഫോമിലും അല്ലാതെയും നിന്ന പോലീസുകാർക്കും എതിരെ നടപടി എടുക്കണമെന്നാണ് അസിഫ് പരാതിയിൽ പറയുന്നത്.