70 ലക്ഷത്തിന്‍റെ അക്ഷയ ലോട്ടറി അടിച്ചു; പോലീസ് സ്റ്റേഷനിലെത്തി സഹായം തേടി ബംഗാൾ സ്വദേശി

ചാത്തന്നൂർ: അക്ഷയ ലോട്ടറിയുടെ ഒന്നാം സമ്മാനം അടിച്ച ബംഗാൾ സ്വദേശി ടിക്കറ്റുമായി പോലീസ് സ്റ്റേഷനിലെത്തി. കൊല്ലം ചാത്തന്നൂരിൽ കഴിഞ്ഞദിവസമാണ് സംഭവം. ലോട്ടറിയുടെ ഒന്നാം സമ്മാനം തനിക്കാണെന്ന് അറിഞ്ഞതോടെ സുഹൃത്തുക്കൾക്കൊപ്പം സ്റ്റേഷനിലെത്തി യുവാവ് പോലീസ് സഹായം തേടുകയായിരുന്നു. പോലീസ് ഇദ്ദേഹത്തെ സുരക്ഷിതമായി ബാങ്കിൽ എത്തിച്ച് ടിക്കറ്റ് കൈമാറുകയും ചെയ്തു.ചാത്തന്നൂരിൽ കൺസ്ട്രക്ഷൻ ജോലി ചെയ്യുന്ന ബംഗാൾ സ്വദേശി ഉത്തം ബർമനാണ് അക്ഷയ ലോട്ടറിയുടെ ഒന്നാം സമ്മാനമായ 70 ലക്ഷം രൂപ ലഭിച്ചത്. കഴിഞ്ഞ് അഞ്ച് വർഷമായി ചാത്തന്നൂരിൽ താമസിച്ച് ജോലി ചെയ്യുകയാണ് 45കാരനായ ഇയാൾ. കൺസ്ട്രക്ഷൻ മേഖലയിലാണ് ബർമൻ ജോലി ചെയ്യുന്നത്.

Also Read : പയ്യന്നൂർ എംഎൽഎയ്ക്കെതിരെ വധഭീഷണി; ക്ഷേത്ര പൂജാരി അറസ്റ്റിൽ

ചാത്തന്നൂരിൽ ഭാഗ്യക്കുറി വിൽപന നടത്തുന്ന സ്ത്രീയുടെ പക്കൽ നിന്ന് കഴിഞ്ഞദിവസമാണ് ഉത്തം ബർമൻ ലോട്ടറി എടുക്കുന്നത്. എ എക്സ് 170874 എന്ന ടിക്കറ്റായിരുന്നു ഇയാൾ എടുത്തത്. ഇന്നലെ രാവിലെ ഇയാൾ ജോലിക്ക് പോകുന്നതിനിടെയാണ് ലോട്ടറി ഫലം നോക്കുന്നത്. പത്രത്തിൽ ഫലം നോക്കിയപ്പോഴാണ് ഒന്നാം സമ്മാനം തന്‍റെ ടിക്കറ്റിനാണെന്ന് അറിയുന്നത്.

Also Read : വിവരം ലഭിച്ചു, അർധരാത്രി വീട് വളഞ്ഞ് എൻഐഎ; പോപ്പുലർ ഫ്രണ്ട് മുൻ സംസ്ഥാന സെക്രട്ടറി സി എ റൗഫ് പിടിയിൽ

സമ്മാനം ഉറപ്പിച്ച ബർമൻ കൂടെ താമസിക്കുന്ന സുഹൃത്തുക്കൾക്കൊപ്പം ചാത്തന്നൂർ പോലീസ് സ്റ്റേഷനിലെത്തി സഹായം അഭ്യർഥിക്കുകയായിരുന്നു. തുടർന്ന് ലോട്ടറി ടിക്കറ്റ് ഒത്തുനോക്കിയ എസ്ഐ ബാങ്ക് സമയം ആകുന്നതുവരെ സ്റ്റേഷനിൽ തന്നെ നിൽക്കാൻ നിർദേശിച്ചു. ബാങ്ക് തുറന്നതോടെ പോലീസുകാർക്കൊപ്പം ഉത്തം ബർമാൻ പോലീസ് ജീപ്പിൽ ബാങ്കിലെത്തി എസ്ബിഐ ശാഖയിൽ ടിക്കറ്റ് ഏൽപ്പിച്ചു. നാട്ടിൽ ഭാര്യയും രണ്ട് കുട്ടികളും അടങ്ങുന്ന കുടുംബമാണ് ഉത്തമിന്‍റേത്.

Read Latest Local News and Malayalam News