അഞ്ജു കോപ്പിയടിച്ചെന്ന് കോളേജ് അധികൃതര്‍; ഹാൾ ടിക്കറ്റും സിസിടിവി ദൃശ്യങ്ങളും പുറത്തുവിട്ട് വൈസ് പ്രിൻസിപ്പൽ

പാലാ: പാലായിൽ വിദ്യാ‍ര്‍ഥിനി ആത്മഹത്യ ചെയ്ത സംഭവത്തിൽ വിശദീകരണവുമായി ചേര്‍പ്പുങ്കൽ ബിവിഎം ഹോളി ക്രോസ് കോളേജ് അധികൃതര്‍. ഹാൾ ടിക്കറ്റിൻ്റെ പിന്നിൽ ഉത്തരങ്ങള്‍ എഴുതി വിദ്യാര്‍ഥിനി കോപ്പിയടിച്ചുവെന്നും വാസ്തവ വിരുദ്ധമായ കാര്യങ്ങളാണ് പുറത്തുവരുന്നതെന്നും വൈസ് പ്രിൻസിപ്പൽ വാര്‍ത്താ സമ്മേളനത്തിൽ പറഞ്ഞു. ഹാൾ ടിക്കറ്റിൻ്റെയും പരീക്ഷാ ഹാളിലെ സിസിടിവി ദൃശ്യങ്ങളും കോളേജ് അധികൃതര്‍ പുറത്തുവിട്ടു.

Also Read: മീനച്ചിലാറ്റിൽ കാണാതായ വിദ്യാർഥിനിയുടെ മൃതദേഹം കണ്ടെത്തി

അഞ്ജു ഹാൾ ടിക്കറ്റിൻ്റെ പിന്നിൽ ഉത്തരങ്ങൾ പെൻസിൽ ഉപയോഗിച്ച് എഴുതിയിരുന്നു. പരീക്ഷ നടന്ന വിഷയത്തിൻ്റെ നോട്ടുകൾ പൂര്‍ണമായി കോപ്പിയിലുണ്ട്. ഈ സാഹചര്യത്തിലാണ് പരീക്ഷാ ഹാളിലെ അധ്യാപകൻ ഇടപെട്ടത്. കോപ്പി കണ്ടെത്തിയ സാഹചര്യത്തിൽ ഇനി പരീക്ഷ എഴുതാൻ സാധിക്കില്ലെന്ന് അധ്യാപകൻ വിദ്യാര്‍ഥിനിയെ അറിയിച്ചു. ഒരു മണിക്കൂറിനുശേഷം വിദ്യാര്‍ഥിനിയോട് പ്രിൻസിപ്പാലിനെ കാണാൻ ആവശ്യപ്പെട്ടിരുന്നു. എന്നാൽ പ്രിൻസിപ്പലിനെ കാണാതെ കുട്ടി രണ്ടരയോടെ പരിക്ഷാ ഹാൾ വിട്ടുവെന്ന് വൈസ് പ്രിൻസിപ്പൽ പറഞ്ഞു.

Also Read: പിടികൂടിയ പുലിയെ വനത്തില്‍ തുറന്നുവിട്ടു; കെണി വെച്ച സംഭവത്തില്‍ സ്ഥലമുടമ അറസ്റ്റിൽ

അഞ്ജുവിനെ കാണാതായ വിവരം പിറ്റേദിവസമാണ് കോളേജ് അധികൃതര്‍ അറിയുന്നത്. സംഭവം സര്‍വകലാശാല അധികൃതരെ അറിയിച്ചു. തങ്ങളുടെ ഭാഗത്തു നിന്ന് തെറ്റുകളുണ്ടായിട്ടില്ലെന്നും വൈസ് പ്രിൻസിപ്പൽ കൂട്ടിച്ചേര്‍ത്തു.

Also Read: ആനവിരട്ടിയിൽ വിദ്യാ‍ര്‍ഥികൾ വിത്തെറിഞ്ഞു! പിന്തുണച്ച് അധ്യാപകരും; വിളവ് നൂറുമേനി!! 'സഫല' വിപണിയില്‍

അതേസമയം അഞ്ജുവിനെ കോളേജ് അധികൃതർ മാനസികമായി പീഡിപ്പിച്ചുവെന്ന് പിതാവ് ആരോപിച്ചു. കോപ്പിയടിച്ചുവെന്ന് ആരോപിച്ച് മകളെ പരീക്ഷാ ഹാളിൽ നിന്ന് പുറത്താക്കി. പഠനത്തിൽ മിടുക്കിയായ മകൾ കോപ്പിയടിക്കില്ല. സംഭവത്തിൽ കോളേജ് പ്രിൻസിപ്പാൽ കുറ്റക്കാരനാണെന്നും പിതാവ് മാധ്യമപ്രവർത്തകരോട് പറഞ്ഞു.

വിദ്യാർഥിനിയുടെ ആത്മഹത്യയിൽ എം ജി സർവകലാശാലയോട് ഉന്നതവിദ്യാഭ്യാസ മന്ത്രി റിപ്പോർട്ട് തേടി. സംഭവത്തിൽ സംസ്ഥാന വനിതാ കമ്മീഷൻ സ്വമേധയാ കേസെടുത്ത് ജില്ലാ പോലീസ് മേധാവിയോട് റിപ്പോർട്ട് സമർപ്പിക്കാൻ ആവശ്യപ്പെട്ടു. ശനിയാഴ്ചയാണ് കാഞ്ഞിരപ്പള്ളി പൊടിമറ്റം സ്വദേശിനിയായ അഞ്ജു ഷാജിയെ (20) കാണാതായത്. പോലീസും ഫയര്‍ ഫോഴ്സും നാട്ടുകാരും ചേര്‍ന്ന് നടത്തിയ തെരച്ചിലിനൊടുവിൽ, ഇന്ന് രാവിലെ പതിനൊന്നേ മുക്കാലോടെ അഞ്ജുവിൻ്റെ മൃതദേഹം മീനച്ചിലാറ്റിൽ കണ്ടെത്തുകയായിരുന്നു.