കുപ്രസിദ്ധ ഗുണ്ട അലോട്ടിക്കെതിരെ കാപ്പ ചുമത്തി! ഇനി ഒരു വർഷം പൂജപ്പുര സെൻട്രൽ ജയിലിൽ കരുതൽ തടങ്കൽ, പുറത്തിറങ്ങിയാൽ നാടിന് ഭീഷണിയെന്ന് പോലീസ്

കോട്ടയം: ജില്ലയിൽ അഴിഞ്ഞാടുന്ന ഗുണ്ടാ സംഘങ്ങളെ അമർച്ച ചെയ്യാൻ പോലീസ്. ഗുണ്ടാ സംഘത്തിനെ അമർച്ച ചെയ്യുന്നതിനുള്ള നടപടികളുടെ ആദ്യ ഘട്ടമായി കൊടുംക്രിമിനലായ അലോട്ടി‌ക്കെതിരെയാണ് കാപ്പ ചുമത്തിയിരിക്കുന്നത്. ജില്ലയിലേയ്ക്കു അറുപതു കിലോ കഞ്ചാവ് കടത്തിയ കേസിൽ നിലവിൽ ആർപ്പൂക്ക കൊപ്രായിൽ ജെയിസ് മോൻ ജേക്കബിനെ (അലോട്ടി- 27) പോലീസ് അറസ്റ്റ് ചെയ്തു റിമാൻഡ് ചെയ്തിരിക്കുകയാണ്. വിയ്യൂർ സെൻട്രൽ ജയിലിൽ കഴിയുന്നതിനിടെ തന്നെയാണ് ഇപ്പോൾ അലോട്ടി‌ക്കെതിരെ കാപ്പ ചുമത്തി അറസ്റ്റ് രേഖപ്പെടുത്തിയിരിക്കുന്നത്.

Also Read: ഒരേ സമയം പാമ്പാടിയിലും ചങ്ങനാശേരിയിലും അപകടം; 2 യുവാക്കള്‍ മരിച്ചു

പോലീസ്-എക്‌സൈസ് ഉദ്യോഗസ്ഥരെ ആക്രമിച്ചു കൊലപ്പെടുത്താൻ ശ്രമിച്ച കേസിൽ അടക്കം അലോട്ടി പ്രതിയാണ്. നിരവധി ക്രിമിനൽ കേസുകളിൽ പ്രതിയാണ് അലോട്ടിയെന്നും, ഇയാൾ പുറത്തിറങ്ങിയാൽ നാടിനു ഭീഷണിയാണെന്നും ചൂണ്ടിക്കാട്ടി ജില്ലാ പോലീസ് മേധാവി ജില്ലാ കളക്ടർക്കു റിപ്പോർട്ട് നൽകിയിരുന്നു. ഈ റിപ്പോർട്ടിൻ്റെ അടിസ്ഥാനത്തിൽ കോട്ടയം ജില്ലാ മജിസ്‌ട്രേറ്റ് കൂടിയായ ജില്ലാ കളക്ടർ എം അഞ്ജനയാണ് അലോട്ടി‌ക്കെതിരെ കാപ്പ ചുമത്തിയത്. കാപ്പ നിയമ പ്രകാരം കരുതൽ തടങ്കലിൽ സൂക്ഷിക്കുന്നതിനാണ് ഉത്തരവ്. ഒരു വർഷം വരെ അലോട്ടിയെ കരുതൽ തടങ്കലിൽ സൂക്ഷിക്കാൻ ഇതുവഴി സാധിക്കും. ഇത് അനുസരിച്ചു ഗാന്ധിനഗർ പോലീസ് ജയിലിൽ എത്തി അലോട്ടിയുടെ അറസ്റ്റ് രേഖപ്പെടുത്തി. തുടർന്നു അലോട്ടിയെ തിരുവനന്തപുരം പൂജപ്പുര സെൻട്രൽ ജയിലിലേയ്ക്കു മാറ്റി.

Also Read: കോട്ടയം ജില്ലാ പഞ്ചായത്തിന് ഇതെന്തുപറ്റി? ജില്ലാ പഞ്ചായത്തും പഞ്ചായത്തുകളും തമ്മിൽ അമ്മായിയമ്മ പോര്!! വികസന പദ്ധതികൾ മരവിച്ചു

കൊലപാതകവും വധശ്രമവും അടക്കം നിരവധി ക്രിമിനൽക്കേസുകളിൽ പ്രതിയാണ് അലോട്ടി. രണ്ടു മാസം മുൻപ് ആന്ധ്രയിൽ നിന്നും 60 കിലോ കഞ്ചാവ് നാഷണൽ പെർമിറ്റ് ലോറിയിൽ കടത്തിയതിനു അലോട്ടി‌ക്കെതിരെ പോലീസ് കേസെടുത്തിരുന്നു. തുടർന്ന് ഇയാളെ അറസ്റ്റ് ചെയ്തു റിമാൻഡ് ചെയ്യുകയായിരുന്നു. ഈ കേസ് അന്വേഷണം നടക്കുന്നതിനിടെയാണ് അലോട്ടി‌ക്കെതിരെ ഇപ്പോൾ കാപ്പ കൂടി ചുമത്തിയിരിക്കുന്നത്.


കോട്ടയം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ

കോട്ടയം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ