കോട്ടയം: കനത്ത മഴയിൽ വെള്ളം കയറിയതിനെ തുടർന്നു കോട്ടയത്തെ 10 റോഡുകളിൽ ഗതാഗതം മുടങ്ങി. കോട്ടയം കുമരകം റോഡ് അടക്കമുള്ള റോഡുകളിലാണ് ഗതാഗതം മുടങ്ങിയിരിക്കുന്നത്. കനത്ത മഴയിൽ താഴത്തങ്ങാടി അറുത്തൂട്ടി പാലത്തിന് ബലക്ഷയം സംഭവിച്ചതോടെ കോട്ടയം - കുമരകം റോഡിൽ ഗതാഗതം നിരോധിച്ചു. കോട്ടയത്തു നിന്നും ചാലുകുന്ന്, താഴത്തങ്ങാടി വഴിയുള്ള ഗതാഗതമാണ് ജില്ലാ ഭരണകൂടം നിരോധിച്ചിരിക്കുന്നത്.
മൂന്നു ദിവസമായി ജില്ലയിൽ പെയ്യുന്ന കനത്ത മഴയിൽ കൊടൂരാറും കൈവഴികളും നിറഞ്ഞൊഴുകുകയാണ്. ഇതിനിടെയാണ് അറുത്തൂട്ടി പാലത്തിലും പ്രദേശത്തും വെള്ളം കയറിയത്. ഇതേ തുടർന്ന് അറുത്തൂട്ടി പാലത്തിന് സമീപമുള്ള പോക്കറ്റ് റോഡ് നിറഞ്ഞ് കവിഞ്ഞു. തുടർന്ന് റോഡ് ഇടിയുകയായിരുന്നു.
Also Read: നാഗമ്പടത്ത് ലിഫ്റ്റിനായി പണിതീർത്ത കുഴിയിൽ അജ്ഞാത മൃതദേഹം! 4 ദിവസം പഴക്കമുണ്ടെന്ന് പോലീസ്, അന്വേഷണം
ശക്തമായ മഴയിലും വെള്ളപ്പൊക്കത്തിലും ഈ റോഡ് ഇടിഞ്ഞതിനാൽ പ്രധാന പാതയിലെ പാലത്തിന് ബലക്ഷയം ഉണ്ടായിട്ടുണ്ട്. ഇതിനാൽ ഇതു വഴിയുള്ള ഗതാഗതം പൂർണമായി നിരോധിക്കുകയായിരുന്നു. കോട്ടയം ഭാഗത്തു നിന്നും താഴത്തങ്ങാടി, ചെങ്ങളം, കുമരകം, വൈക്കം ഭാഗത്തേക്ക് പോകേണ്ട വാഹനങ്ങൾ, കോട്ടയം നഗരത്തിൽ നിന്നും കാരാപ്പുഴ വഴി തിരിഞ്ഞു പോകേണ്ടതാണെന്നു ജില്ലാ ഭരണകൂടം അറിയിച്ചു.
ജില്ലയിൽ ഗതാഗതം നിരോധിച്ച റോഡുകൾ
1.താഴത്തങ്ങാടി - കുടയംപടി
പരിപ്പ് - അയ്മനം
2.കുമരകം ചന്ത കവല -കോട്ടയം
ഇല്ലിക്കൽ - കാഞ്ഞിരം
കാഞ്ഞിരം - മലരിക്കൽ
3.ആറുമാനൂർ - പുന്നത്തറ
നീറിക്കാട് - പൂവത്തുംമൂട്
പട്ടരുമഠം - അമയന്നൂർ
അയർക്കുന്നം - തിരുവഞ്ചൂർ
4.ഇറഞ്ഞാൽ - കൊശമറ്റം
ദേവലോകം - കൊല്ലാട്
ഈരയിൽ കടവ് ബൈപാസ് റോഡ്
കുര്യൻ ഉതുപ്പ് റോഡ്
പുതുപ്പള്ളി - കൊട്ടാരത്തിൽ റോഡ്
കളത്തിപ്പടി - പൊൻപള്ളി റോഡ്
5.ആലപ്പുഴ - ചങ്ങനാശ്ശേരി
6.ഞാലിയാകുഴി - പടിയരക്കടവ് റോഡ്
7.ഏറ്റുമാനൂർ - നാലുമണിക്കാറ്റ്
പാലമുറി - മോസ്‌കോ
8.കൈലാസപുരം റോഡ് & കല്ലറ- വെച്ചൂർ റോഡ്
9.വേളൂർ -വെട്ടിക്കാട്ടുമുക്ക് റോഡ്
10.തലയോലപ്പറമ്പ് - വൈക്കം റോഡ്.