വിലക്ക് ഈ ബസുകൾക്ക്
പോപ്പോയി, മാമ്പഴം, പാരഡൈസ്, ടു ബ്രദേഴ്‌സ് എന്നീ ബസുകൾ സർവീസിനു അനുയോജ്യമല്ലെന്ന റിപ്പോർട്ടാണ് മോട്ടോർ വാഹന വകുപ്പ് നൽകിയത്. ചിങ്ങവനം ക്ലിമ്മീസ് സ്‌കൂളിൽ നിന്നുള്ള വിദ്യാർഥി സംഘം സഞ്ചരിക്കാനിരുന്ന ബസുകൾക്കാണ് മോട്ടോർ വാഹന വകുപ്പിന്റെ വിലക്ക് ലഭിച്ചത്.
എക്‌സ്ട്രാ ഫിറ്റിങ്ങുകളും ലൈറ്റുകളും
ഇന്നലെ രാത്രിയിൽ പാലക്കാട് വടക്കഞ്ചേരിയിൽ അമിത വേഗത്തിൽ എത്തിയ വിനോദ സഞ്ചാര വാഹനം കെഎസ്ആർടിസി ബസിൽ ഇടിച്ച് വിദ്യാർഥികൾ അടക്കം ഒൻപത് പേരാണ് മരിച്ചത്. ഈ സാഹചര്യത്തിൽ നിയന്ത്രണങ്ങൾ കർശനമാക്കിയിരുന്നു. ഇതിനിടെയാണ് ചിങ്ങവനം ക്ലിമ്മീസ് സ്കൂൾ അധികൃതർ മോട്ടോർ വാഹന വകുപ്പിനെ വിനോദയാത്ര പോകുന്ന വിവരം അറിയിച്ചത്. ഇത് അനുസരിച്ച് സ്‌കൂളിൽ എത്തിയ മോട്ടോർ വാഹന വകുപ്പ് അധികൃതർ നടത്തിയ പരിശോധനയിലാണ് വാഹനത്തിൽ എക്‌സ്ട്രാ ഫിറ്റിങ്ങുകളും എക്‌സ്ട്രാ ലൈറ്റുകളും കണ്ടെത്തിയത്.
മറ്റു വാഹനങ്ങൾ കണ്ടെത്താൻ നിർദേശം
വാഹനങ്ങൾ വിനോദയാത്രയ്ക്ക് അനുയോജ്യമല്ലെന്ന റിപ്പോർട്ട് മോട്ടോർ വാഹന വകുപ്പ് സ്കൂൾ അധികൃതർക്ക് നൽകി. വിനോദയാത്രയ്ക്കു മറ്റു വാഹനങ്ങൾ കണ്ടെത്തണമെന്നും നിർദേശിച്ചു. ജില്ലയിൽ ഇത്തരത്തിൽ വിനോദ സഞ്ചാരത്തിനായി വാഹനങ്ങൾ വിളിക്കുമ്പോൾ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കണമെന്നു മോട്ടോർ വാഹന വകുപ്പ് അധികൃതർ നിർദേശിച്ചു.