ബൈക്ക് റോഡിൽ തെന്നി ടിപ്പറിനടിയിലേയ്ക്ക്, പത്രവിതരണക്കാരന് ദാരുണാന്ത്യം

കോട്ടയം: കറുകച്ചാൽ പത്തനാട്ട് പരുത്തിമൂട്ടിൽ ബൈക്ക് ടിപ്പർ ലോറിക്കടിയിലേയ്ക്കു മറിഞ്ഞ് പത്രവിതരണക്കാരനായ യുവാവിന് ദാരുണാന്ത്യം. പരുത്തിമൂട് പതിയ്ക്കൽ ജിത്തു ജോണി (21) ആണ് മരിച്ചത്. അപകടത്തിന്റെ സിസിടിവി ദൃശ്യങ്ങൾ ലഭിച്ചു. തിങ്കളാഴ്ച പുലർച്ചെയാണ് പരുത്തിമൂട്- പത്തനാട് റൂട്ടിൽ അപകടം ഉണ്ടായത്. പത്രവിതരണത്തിനായി പോകുകയായിരുന്നു ജിത്തു ജോണി. ഇതിനിടെ റോഡിലെ വളവിൽ ബൈക്ക് തെന്നി നിയന്ത്രണം നഷ്ടമായി മറിയുകയായിരുന്നു. ഈ സമയം എതിർദിശയിൽനിന്ന് എത്തിയ ടിപ്പർ ലോറിയ്ക്ക് അടിയിലേയ്ക്കാണ് ബൈക്ക് മറിഞ്ഞത്. ലോറിയ്ക്കടിയിലേയ്ക്കു വീണ ജിത്തുവിന്റെ ശരീരത്തിലൂടെ ലോറിയുടെ ചക്രങ്ങൾ കയറിയിറങ്ങിയതായി സംശയിക്കുന്നതായി കറുകച്ചാൽ പോലീസ് പറയുന്നു.

വ്യാജ പേപ്പർ നോട്ട് നൽകി വൃദ്ധനായ ലോട്ടറി കച്ചവടക്കാരനെ പറ്റിച്ചു; പ്രതി പിടിയിൽ
റോഡിൽ വീണ ജിത്തുവിനെ കോട്ടയം മെഡിക്കൽ കോളേജ് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. അപകടത്തെ തുടർന്നു ലോറി പോലീസ് കസ്റ്റിഡിയിൽ എടുത്തു. ജിത്തുവിന്റെ പിതാവ് ജോണി. മാതാവ് പരേതയായ കുഞ്ഞുമോൾ. സഹോദരൻ ജെറിൻ (ജോമോൻ പി ജെ). സംസ്‌കാരം മാർച്ച് 21 ചൊവ്വാഴ്ച ഉച്ചയ്ക്ക് രണ്ടിന് എടവെട്ടാർ ബിലീവേഴ്‌സ് ചർച്ച് സെമിത്തേരിയിൽ നടത്തും.

കോട്ടയം ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം

Read Latest Local News and Malayalam News