കോട്ടയം: ഹരിതവിദ്യാലയമായ പാറപ്പള്ളി ഗവ. എല്പി സ്കൂളിലെ പച്ച തുരുത്ത് ശ്രദ്ധയമാകുന്നു. അധ്യാപകരുടെയും പിടിഎയുടേയും നേതൃത്വത്തിലാണ് ഗ്രാമപഞ്ചായത്തിൻറെ സഹകരണത്തോടെ പച്ചതുരുത്ത് തയ്യാറാക്കിയിരിക്കുന്നത്. പച്ചക്കറി കൃഷി ഉൾപെടെ അര ഏക്കറോളം സ്ഥലത്താണ് സ്കൂൾ കോപൗണ്ടിൽ തന്നെ പച്ച തുരുത്ത് നിർമ്മിച്ചിരിക്കുന്നത്. ശലഭോദ്യാനം, ജൈവ വൈവിധ്യ പാർക്ക്, ഔഷധസസ്യ ഉദ്യാനം, എന്നിവ വെവ്വേറെ തന്നെ പച്ച തുരുത്തിലുണ്ട്.
റംബൂട്ടാന്, ബദാം,പ്ലാവ്, മാവ്, മംഗോസ്റ്റിൻ, ചാമ്പ, പേര, അവക്കോഡ തുടങ്ങിയ ഫലവൃക്ഷങ്ങളും, കച്ചോലം, ദശപുഷ്പങ്ങൾ, ലക്ഷ്മി തരു, ആര്യവേപ്പ് ,അയമോദകംതുടങ്ങി ഔഷധസസ്യങ്ങളും പച്ചതുരുത്തിൻറെ പ്രത്യേകതയാണ്. തക്കാളി, വെണ്ട, ചീര, പയർ, കോവക്ക, തുടങ്ങി വിവിധയിനം പച്ചക്കറികളും, കപ്പ, വാഴ തുടങ്ങിയ കുഷികളും പച്ചതുരുത്തിലുണ്ട്.
മീനച്ചിൽ ഗ്രാമ പഞ്ചായത്തിൻറെ ഹരിത വിദ്യാലയങ്ങളിലൊന്നാണ് പാറപ്പള്ളി ഗവ.എല്പി സ്കൂള്
ഗ്രാമ പഞ്ചായത്തിൻറെ സഹകരണത്തോടെയാണ് പച്ച തുരുത്ത് നിർമ്മിച്ചത്. അധ്യാപകരും, പിടിഎയും ചേര്ന്നാണ് പച്ചത്തുരുത്തിന്റെ പരിപാലനവും അനുബന്ധ പ്രവര്ത്തനങ്ങളും നടത്തുന്നത്. പാലാ എഇഒ ശ്രീകല, ബിപിഒ രാജ് കുമാർ, ഗ്രാമ പഞ്ചായത്ത് സെക്രട്ടറി സുശീൽ കുമാർ, ഹരിത കേരള മിഷൻ റിസോഴ്സ് പേഴ്സൺ അമ്മു മാത്യു, എന്ആര്ഇജിഎഇഷാജന്, സ്കൂള് ഹെഡ്മിസ്ട്രസ് സുമാ ബി നായര്, പിടിഎ പ്രസിഡന്റ് ഇന്ദു പ്രകാശ്, അധ്യാപകര് എന്നിവരുടെ നേതൃത്വത്തിലാണ് പച്ചത്തുരുത്തിന്റെ പ്രവര്ത്തനങ്ങള്.