പി സി ജോർജ് വീണ്ടും ഒറ്റപ്പെടുന്നു; യുഡിഎഫിൽ കയറാനുള്ള നീക്കത്തിനെതിരെ പ്രമേയം!! പൂഞ്ഞാറിൽ ഷോണിനെ ഇറക്കാനുള്ള നീക്കവും പരാജയത്തിലേയ്ക്ക്...

കേരള കോൺഗ്രസ് ജോസ് വിഭാഗത്തെ കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനത്തെച്ചൊല്ലിയുണ്ടായ തർക്കത്തെ തുടർന്നു യുഡിഎഫിൽ നിന്നും പുറത്താക്കിയിരുന്നു. ഈ സാഹചര്യത്തിലാണ് തങ്ങൾക്ക് യുഡിഎഫിൽ ഒരു സാധ്യതയുണ്ടെന്നു പി സി ജോർജ് വിഭാഗം തിരിച്ചറിഞ്ഞത്. തുടർന്നാണ് യുഡിഎഫ് മുന്നണിയുടെ ഭാഗമാകാൻ ജോർജ് കരുക്കൾ നീക്കി തുടങ്ങിയത്. തദ്ദേശ തെരഞ്ഞെടുപ്പിനു മുൻപ് യുഡിഎഫ് മുന്നണിയുടെ ഭാഗമാകാനാണ് ജോർജിൻ്റെ ശ്രമം. ഇതിനെതിരെയാണ് ഇപ്പോൾ പൂഞ്ഞാർ യുഡിഎഫ് മേഖലാ കമ്മിറ്റി രംഗത്ത് എത്തിയത്.

രാഷ്ട്രീയ ഒറ്റുകാരെ യുഡിഎഫിന് ആവശ്യമില്ലെന്നാണ് യുഡിഎഫ് പൂഞ്ഞാർ മേഖലാ കമ്മിറ്റിയുടെ നിലപാട്. കഴിഞ്ഞ 35 വർഷക്കാലമായി പൂഞ്ഞാർ നിയോജക മണ്ഡലത്തിൽ വികസന മുരടിപ്പാണ്. പൂഞ്ഞാറിന്റെ സമീപ മണ്ഡലങ്ങളിൽ വികസനത്തിന്റെ വൻ കുതിപ്പുകൾ നടന്നിട്ടും പൂഞ്ഞാറിലുണ്ടായ വികസന മുരടിപ്പ് ഇവിടുത്തെ ജനപ്രതിനിധിയുടെ ഉത്തരവാദിത്തമില്ലായ്മയും, ഉദാസീനതയുമാണെന്ന് യുഡിഎഫ് പൂഞ്ഞാർ മേഖലാ കമ്മിറ്റി ഇന്ന് ചേർന്ന യോഗത്തിൽ വിലയിരുത്തി.

വ്യക്തിതാത്പര്യത്തിന് വേണ്ടി സംശുദ്ധമായ കേരള രാഷ്ട്രീയത്തെ മലീമസമാക്കുവാൻ പി സി ജോർജ് ശ്രമിച്ചു. സ്വന്തം കാര്യലാഭത്തിനു വേണ്ടി യുഡിഎഫിൽ കടന്നു കയറാമെന്നുള്ളത് അദ്ദേഹത്തിന്റെ വ്യർത്ഥ മോഹം മാത്രമാണ്. നിൽക്കുന്ന മുന്നണിയെയും പാർട്ടിയെയും ഒറ്റുകൊടുത്ത് രാഷ്ട്രീയ വഞ്ചന നടത്തുന്ന പൂഞ്ഞാർ എംഎൽഎയെ യുഡിഎഫിന് ആവശ്യമില്ലെന്ന് യോഗം ഐക്യകണ്‌ഠേനെ പ്രമേയം പാസാക്കി. വരുന്ന ത്രിതല പഞ്ചായത്ത് തെരഞ്ഞെടുപ്പിൽ യുഡിഎഫ് ഒറ്റക്കെട്ടായി തെരഞ്ഞെടുപ്പിനെ അഭിമുഖീകരിക്കാനും ഇടതുപക്ഷ സർക്കാരിനെതിരെ ജനകീയ പ്രക്ഷോഭം സംഘടിപ്പിക്കുവാനും യുഡിഎഫ് പൂഞ്ഞാർ മേഖലാ യോഗം തീരുമാനിച്ചു.