പ്രതികൾക്കു ഗുണ്ടാ മാഫിയ ബന്ധം
അതിരമ്പുഴ വാമനപുരം വീട്ടിൽ താഹിർ ഷാഹുൽ (25), ആർപ്പൂക്കര ഷാനു മനസിൽ വീട്ടിൽ ബാദുഷാ കെ നസീർ (28) എന്നിവരെയാണ് കടുത്തുരുത്തി എക്‌സൈസ് റേഞ്ച് ഇൻസ്‌പെക്ടർ രാഗേഷ് ബി ചിറയത്തിന്റെ നേതൃത്വത്തിലുള്ള സംഘം പിടികൂടിയത്. രണ്ടു പ്രതികൾക്കും ആർപ്പൂക്കരയിലെയും അതിരമ്പുഴയിലെയും ഗുണ്ടാ മാഫിയ സംഘങ്ങളുമായി അടുത്ത ബന്ധമുണ്ടെന്നാണ് കണ്ടെത്തിയിരിക്കുന്നത്. നിലവിൽ ജയിലിൽ കഴിയുന്ന ഗുണ്ടാ സംഘത്തലവിനു വേണ്ടിയാണ് ഇവർ കഞ്ചാവ്, എംഡിഎംഎ തുടങ്ങിയ വീര്യം കൂടിയ ലഹരി മരുന്നുകൾ ജില്ലയിൽ എത്തിച്ചിരുന്നത്.
പ്രതികൾ കുടുങ്ങിയത് നാടകീയമായ നീക്കത്തിൽ
ഞായറാഴ്ച വൈകിട്ട് അഞ്ചു മണിയോടെ കുറുപ്പുന്തറയിലായിരുന്നു സംഭവങ്ങൾ. കുറുപ്പന്തറ ബസ് സ്റ്റാൻഡിന് സമീപം റോഡരികിൽ നിന്നാണ് മയക്കുമരുന്നുമായി പ്രതികൾ പിടിയിലായത്. രഹസ്യ വിവരത്തെ തുടർന്നു കടുത്തുരുത്തി എക്‌സൈസ് പട്രോളിംങ് സംഘം പ്രദേശത്ത് നിരീക്ഷണം നടത്തുകയായിരുന്നു. ഇതിനിടെയാണ് കാർ അമിത വേഗത്തിൽ എത്തിയത്. എക്‌സൈസ് സംഘത്തെ കണ്ട് പ്രതികൾ സഞ്ചരിച്ച കാർ അതിവേഗം പിന്നോട്ടെടുത്ത് രക്ഷപെടാൻ ശ്രമിക്കവേ മൈൽ കുറ്റി തകർത്ത് ഓടയിൽ താഴുകയായിരുന്നു.
നൂറു ഗ്രാമിന് നൽകണം ലക്ഷങ്ങൾ
ഇവരുടെ പക്കൽ നിന്നും 18.800 ഗ്രാം മയക്കുമരുന്നും, KL 17 S 3557 രജിസ്റ്റർ നമ്പരിലുള്ള സിലേറിയ കാറും, രണ്ട് ഐഫോണുകളും കണ്ടെടുത്തു. അഞ്ചു ലക്ഷത്തോളം രൂപ വിലവരുന്ന എംഡിഎംഎ വിഭാഗത്തിൽപ്പെട്ട മയക്കുമരുന്നാണിതെന്ന് എക്‌സൈസ് ഇൻസ്‌പെക്ടർ രാഗേഷ് ബി ചിറയത്ത് പറഞ്ഞു. റെയ്ഡിൽ പ്രിവന്റീവ് ഓഫീസർമാരായ സി സാബു, ഹരീഷ് ചന്ദ്രൻ, സിവിൽ എക്‌സൈസ് ആഫീസർമാരായ തോമസ് ചെറിയാൻ, ആനന്ദരാജ്, തൻസീർ, പ്രമോദ്, അശോക് ബി നായർ, സിദ്ധാർഥ്, വനിതാ സിവിൽ എക്‌സൈസ് ആഫീസർ മനീഷാ എന്നിവർ പങ്കെടുത്തു.