കോഴിക്കോട്: ആറംഗ നായാട്ടുസംഘത്തെ താമരശേരി വനംവകുപ്പ് അധികൃതര് പിടികൂടി. ഇവരില് നിന്ന് വേട്ടയാടിയ പറക്കും അണ്ണാന്റെ ജഡവും നാടന്തോക്കും പിടിച്ചെടുത്തു. മലപ്പുറം ജില്ലയില്പ്പെടുന്ന അരീക്കോട് സ്വദേശികളായ ജൂനൈസ്, സതീഷ്, പ്രകാശന് എന്നിവരും കോഴിക്കോട് തിരുവമ്പാടി സ്വദേശികളായ രജീഷ്, സുനില്, മുത്തപ്പന്പുഴ സ്വദേശിയായ ടോമി എന്നിവരാണ് പിടിയിലായത്.
താമരശേരി ഫോറസ്റ്റ് റേഞ്ച് ഓഫീസര് സുധീര് നെരോത്തിനു ലഭിച്ച രഹസ്യവിവരത്തിന്റെ അടിസ്ഥാനത്തില് നടത്തിയ അന്വേഷണത്തിലാണ് നായാട്ടുസംഘം പിടിയിലായത്.
റേഞ്ചിനു കീഴിലെ മുത്തപ്പന്പുഴയില് വച്ചാണ് സംഘത്തെ പിടികൂടിയത്. നാടന് തോക്കാണ് ഇവരില് നിന്നു പിടിച്ചെടുത്തത്. പ്രദേശികമായി നിര്മിച്ചതാണിത്. ഇതുസംബന്ധിച്ച അന്വേഷണം ആരംഭിച്ചിട്ടുണ്ട്. കൈവശമുണ്ടായിരുന്ന പറക്കും അണ്ണാനെ വെടിവച്ചു പിടിച്ചതാണ്. ഇവര് സഞ്ചരിച്ച കാറും വനംവകുപ്പ് കസ്റ്റഡിയിലെടുത്തിട്ടുണ്ട്.
Also Read: പീഡനക്കേസ്: ബി.ജെ.പി നേതാവായ അധ്യാപകന്റെ ജാമ്യാപേക്ഷ തള്ളി
ലോക് ഡൗണ് മുതലെടുത്ത് വനമേഖലയില് മൃഗവേട്ടക്കാര് ഇറങ്ങാനുള്ള സാധ്യത മുന്കൂട്ടിക്കണ്ട് വനംവകുപ്പ് കര്ശന ജാഗ്രതയാണ് പുലര്ത്തുന്നത്. താമരശേരി റേഞ്ചിനു കീഴിലെ പുതുപ്പാടി സെക്ഷന് പരിധിയില് നിന്നടക്കം വേട്ടസംഘങ്ങളെ ഇതിനോടകം പിടികൂടുകയും ചെയ്തു. മുന്കാലങ്ങളില് സമാനകേസുകളില് ഉള്പ്പെട്ടവരെയും മറ്റും പ്രത്യേകമായി നിരീക്ഷിച്ചുവരുന്നുണ്ട്. മുമ്പൊക്കെ വിനോദത്തിനും മറ്റുമായി മദ്യപസംഘങ്ങളും മറ്റുമാണ് വേട്ടക്കിറങ്ങിയരുന്നതെങ്കില് ഇന്ന് മൃഗവേട്ട തൊഴിലാക്കുന്നവരുടെ എണ്ണം വര്ധിച്ചുവരികയാണ്.
വന്യമൃഗങ്ങളുടെ ഇറച്ചിക്കും നെയ്ക്കും വന്വില ലഭിക്കുമെന്നതിനാലാണ് യുവാക്കള് ഉള്പ്പെടെയുള്ളവര് വേട്ടക്കിറങ്ങുന്നത്. വനത്തോടു ചേര്ന്നു താമസിക്കുന്നവരുടെ ബന്ധുക്കളും കൂട്ടുകാരുമൊക്കെയാണ് മിക്കവാറും ഇത്തരം സംഘങ്ങളില് അംഗങ്ങളാകുന്നത്. അവരവരുടെ ആവശ്യം കഴിഞ്ഞശേഷം ഉണക്കി സൂക്ഷിക്കുന്ന ഇറച്ചിക്കു പോലും വന്വിലയാണ് വേട്ടസംഘങ്ങള് ഈടാക്കുന്നത്. ലോക് ഡൗണ് നിയന്ത്രണങ്ങളില് ഇളവുവന്നാലും വരുംദിവസങ്ങളിലും പരിശോധനയും നടപടികളും കര്ശനമായി തുടരാനാണ് വനംവകുപ്പുദ്യോഗസ്ഥരുടെ തീരുമാനം.