കാറിന്‍റെ ഡോർ ലോക്ക്, ഒറ്റപ്പെട്ട സ്ഥലത്ത് ശ്രീജിത്ത് എന്തിനെത്തി? കാറപകടം വ്യാജമോ? മരണത്തിൽ ദുരൂഹത ഏറുന്നു

പകൽ സമയത്ത് പോലും ആൾ പെരുമാറ്റമോ പ്രധാന റോഡുകളോ ഇല്ലാത്ത കനാൽ പ്രദേശത്ത് വെള്ളിയാഴ്ച രാത്രി എട്ടര മണിയോടെയാണ്‌ കാസർകോട് സ്വദേശി ശ്രീജിത്തിനെ ഗുരുതര പരിക്കേറ്റ നിലയിൽ കനാൽ പരിസരത്തെ കുറ്റിക്കാട്ടിൽ നാട്ടുകാർ കണ്ടെത്തിയത്. ദേഹമാസകലം രക്തവുമായി കരയുകയായിരുന്ന ഇയാളെ നാട്ടുകാർ ആശുപത്രിയിൽ എത്തിക്കുകയായിരുന്നു.

നാട്ടുകാർ ആശുപത്രിയിൽ എത്തിക്കുമ്പോൾ പേരും സ്ഥലവും പറഞ്ഞെങ്കിലും എന്താണ് സംഭവിച്ചതെന്ന ചോദ്യങ്ങൾക്ക് മറുപടി പറയാതെ പിന്നെ പറയാം എന്ന് പറഞ്ഞു ഒഴിഞ്ഞു മാറുകയായിരുന്നു ഇയാൾ. കാർ വൈദ്യുതി തൂണിൽ ഇടിച്ച നിലയിലാണെങ്കിലും കാറിനോ, വൈദ്യുതി തൂണിനോ സാരമായ കേട്പാപാടുകൾ ഒന്നും തന്നെ ഇല്ല. മാത്രമല്ല ശരീരമാസകലം രക്തത്തിൽ കുളിച്ച നിലയിലായിട്ടും കാറിനുള്ളിൽ ഒരു തുള്ളി രക്തക്കറ പോലും കണ്ടെത്താനാവാത്തതും കാറിന്‍റെ ഡോർ ലോക്ക് ചെയ്ത നിലയിലും ഹാന്‍റ് ബ്രേക്ക് ഇട്ടനിലയിലുമായിരുന്നു എന്നതും ദുരൂഹത വർധിപ്പിക്കുന്നു.

യുവാവിനെ മറ്റേതെങ്കിലും സ്ഥലത്ത് വെച്ച് ക്രൂരമായ അക്രമിച്ചതിന് ശേഷം വാഹനപകടം വ്യാജമായി സൃഷ്ടിച്ചതാണോ എന്ന സംശയം ഉയർന്നിട്ടുണ്ട്. കാറിൽ നിന്ന് ഇയാളുടെ മൊബൈൽ ഫോൺ പോലീസ് കസ്റ്റഡിയിലെടുത്തിട്ടുണ്ട്. വിരലടയാള വിദഗ്ദരും സ്ഥലത്ത് പരി ശോധന നടത്തി. ഇയാളെ കണ്ടെത്തിയ സ്ഥലത്ത് തന്നെ ടിയാഗോ KL 60 S 2952 നമ്പര്‍ കാര്‍ ടയര്‍ പഞ്ചര്‍ ആയി ഇലക്ട്രിക് പോസ്റ്റില്‍ ഇടിച്ച നിലയിലുണ്ട്.

റോഡിൽ യുവാവിനെ കണ്ടെത്തിയ സ്ഥലത്ത് രക്തം തളം കെട്ടിക്കിടക്കുന്നുണ്ട്. യുവാവിന്‍റെ തലയ്ക്ക് പിറകിൽ രണ്ട് സെന്‍റീമീറ്റർ നീളത്തിൽ ആഴത്തിൽ മുറിവും, ഇടത് നെറ്റിയിൽ ക്ഷതവും ഉണ്ട്. കൂടാതെ ഇടത് കൈ ഷോൾഡറിൽ നിന്ന് പൊട്ടിയ നിലയിലും, കാലിന്‍റെ പാദങ്ങളിൽ പൊട്ടലും ദേഹമാസകലം മുറിവേറ്റ നിലയിലുമാണ് എന്ന് പോലീസ് ഇൻക്വസ്റ്റ് റിപ്പോർട്ടിലുണ്ട്.