കടകൾ കുത്തിത്തുറന്ന് മോഷണം! കോഴിക്കോട് യുവാവും യുവതിയും അറസ്റ്റില്‍; പിടികൂടിയത് മോഷ്ടിച്ച സാധനങ്ങൾ കടത്തുന്നതിനിടെ

കോഴിക്കോട്: നിരവധി കടകളില്‍ മോഷണം നടത്തിയ യുവാവിനെയും യുവതിയെയും പോലീസ് പിടികൂടി. ഫറോക്ക് സ്വദേശികളായ കണ്ണന്‍ (39), മീനു എന്ന മീനൂട്ടി (25) എന്നിവരാണ് അറസ്റ്റിലായത്. കഴിഞ്ഞ ദിവസം രാത്രിയില്‍ മോഷണം നടത്തി സാധനങ്ങളുമായി ഇരുചക്രവാഹനത്തില്‍ വരുന്നതിനിടെയാണ് ചേവായൂരില്‍ വെച്ച് ഇരുവരും പിടിയിലായത്.

Also Read: വലിയങ്ങാടിയിൽ കൊവിഡ് കേസുകൾ കൂടുന്നു; കോര്‍പ്പറേഷന്‍ പരിധിയില്‍ പരിശോധന കര്‍ശനമാക്കും

തിരൂരങ്ങാടി സ്റ്റേഷന്‍ പരിധിയിലെ പടിക്കല്‍ എന്ന സ്ഥലത്തെ രണ്ടു കടകളില്‍ നിന്നുള്ള സാധനങ്ങളാണ് ചാക്കില്‍ക്കെട്ടിയ നിലയില്‍ ഇവരുടെ കൈവശമുണ്ടായിരുന്നത്.
കഴിഞ്ഞമാസം പന്തിരാങ്കാവിലെ ഹാര്‍ഡ്‌വെയര്‍ കടയുടെ ഷട്ടര്‍ തകര്‍ത്തു നടത്തിയ മോഷണത്തിന്റെ അന്വേഷണമാണ് പ്രതികളിലേക്കെത്തിയത്. രണ്ടുലക്ഷത്തോളം രൂപയുടെ സാധനങ്ങള്‍ ഇവിടെ നിന്നു മോഷണം പോയിരുന്നു. കടയ്ക്കു സമീപത്തെ അയ്യപ്പമഠത്തില്‍ നിന്നുള്ള സിസിടിവി പരിശോധിച്ചപ്പോള്‍ പുരുഷനും സ്ത്രീയും നടന്നുവരുന്നതും മോഷണശേഷം ബൈക്കില്‍ തിരിച്ചുപോകുന്നതും വ്യക്തമായി പതിഞ്ഞിരുന്നു. തുടര്‍ന്നാണ് മോഷണത്തില്‍ സ്ത്രീ കൂടി ഉള്‍പ്പെട്ടുവെന്നതിന്റെ അടിസ്ഥാനത്തില്‍ അന്വേഷണം മുന്നോട്ടുപോയത്. ഇതിനാലാണ് കഴിഞ്ഞദിവസം അസമയത്ത് ചാക്കുകെട്ടുമായി വരുന്നതിനിടെ ഇരുവരെയും പോലീസ് ശ്രദ്ധിച്ചത്. പോലീസ് തടഞ്ഞപ്പോള്‍ ഓടിരക്ഷപ്പെട്ട കണ്ണനെ പിന്നീട് പിടികൂടുകയായിരുന്നു.

Also Read: 'ലൈഫ് മിഷനിൽ സ്വപ്നയ്ക്ക് കമ്മീഷൻ ലഭിച്ചത് എന്തിന്?' മുഖ്യമന്ത്രി വ്യക്തമാക്കണമെന്ന് കെ സുരേന്ദ്രൻ

പിച്ചള, ഓട്, ചെമ്പ് എന്നിവ കൊണ്ടുള്ള വസ്തുക്കളാണ് ഇവര്‍ സ്ഥിരമായി മോഷ്ടിച്ചിരുന്നതെന്ന് പോലീസ് പറഞ്ഞു. കടകള്‍ കുത്തിത്തുറക്കുന്നതാണ് രീതി. ഹാര്‍ഡ് വെയര്‍, ഇലക്ട്രിക് സാധനങ്ങള്‍ വില്‍ക്കുന്ന കടകള്‍, പാത്രക്കടകള്‍ എന്നിവിടങ്ങളിലാണ് മോഷണമേറെയും. ഇരുവര്‍ക്കുമെതിരെ മലപ്പുറം, കോഴിക്കോട് ജില്ലകളിലായി 12 കേസുകള്‍ നിലവിലുണ്ട്. പന്തീരാങ്കാവ് സ്‌റ്റേഷനില്‍ മൂന്നുകേസുകളും മെഡിക്കല്‍ കോളേജില്‍ നാലും തിരൂരങ്ങാടിയില്‍ രണ്ടും ചേവായൂര്‍, കുന്നമംഗലം, തേഞ്ഞിപ്പലം സ്റ്റേഷനുകളില്‍ ഓരോ കേസ് വീതവുമാണ് ഉള്ളത്.

Also Read: അപൂര്‍വ ഇനം നിശാശലഭം പാലേരിയില്‍; കേരളത്തിലെ നിശാശലഭങ്ങളുടെ കൂട്ടത്തിലേക്ക് ഒരു പുതിയ അംഗംകൂടി

ഡിസിപി സുജിത് ദാസ്, സൗത്ത് അസിസ്റ്റന്റ് കമ്മീഷണര്‍ എന്നിവരുടെ നേതൃത്വത്തിലുള്ള സ്‌ക്വാഡുകള്‍, പന്തീരാങ്കാവ് ഇന്‍സ്‌പെക്ടര്‍ ബൈജു കെ ജോസിന്റെ നേതൃത്വത്തിലുള്ള പോലീസ് സംഘവുമാണ് പ്രതികളെ പിടികൂടിയത്. ചേവായൂര്‍, മെഡിക്കല്‍കോളേജ്, എലത്തൂര്‍ പോലീസും അന്വേഷണത്തില്‍ പങ്കാളികളായി.