കോഴിക്കോട്: എലത്തൂർ കോരപ്പുഴ കേളപ്പജി പാലത്തിൽ കാറും സ്കൂട്ടറും കൂട്ടിയിടിച്ച് ഒന്നര വയസ്സുകാരനും പിതാവും മരിച്ചു. സ്കൂട്ടറിൽ യാത്രചെയ്യുകയായിരുന്ന വെസ്റ്റ്ഹിൽ ചുങ്കം പണിക്കർതൊടി വീട്ടിൽ അതുൽ (24), മകൻ ആൻവിക് എന്നിവരാണ് മരിച്ചത്. ചൊവ്വാഴ്ച അർധരാത്രിയായിരുന്നു അപകടം.
നഗരത്തിൽനിന്ന് വടകര ഭാഗത്തേക്ക് പോവുകയായിരുന്ന കാറാണ് അപകടത്തിൽപ്പെട്ടത്. വടകര സ്വദേശികളായ സായന്ത്, അഭിമന്യു, സോനു എന്നിവരാണ് കാറിലുണ്ടായിരുന്നത്. കാറോടിച്ച സൗരവിനും മുൻ സീറ്റിലിരുന്ന അഭിമന്യുവിനും പരിക്കേറ്റിട്ടുണ്ട്. ഇവർ മെഡിക്കൽ കോളേജ് ആശുപത്രിയിൽ ചികിത്സയിലാണ്. പാലത്തിന് സമീപമുള്ളവരാണ് അപകടവിവരം പോലീസ് കൺട്രോൾ റൂമിൽ അറിയിച്ചത്.
സിറ്റി കൺട്രോൾ റൂമിൽനിന്നുള്ള ആംബുലൻസിൽ പരിക്കേറ്റ അൻവികിനെ മാവൂർ റോഡിലുള്ള സ്വകാര്യ ആശുപത്രിയിലെത്തിച്ചെങ്കിലും വഴിമധ്യേ മരിച്ചിരുന്നു. അതുലിനെ മെഡിക്കൽ കോളേജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. എലത്തൂർ എഎസ്ഐ ടി.ടി. ഷിജുവിന്റെ നേതൃത്വത്തിൽ പോലീസെത്തിയാണ് രക്ഷാപ്രവർത്തനത്തിനു നേതൃത്വം നൽകിയത്. അപകടത്തെ തുടർന്ന് പാലത്തിലുണ്ടായ ഗതാഗതം തടസ്സവും പോലീസ് നിയന്ത്രിച്ചു.
Read Latest Local News and Malayalam News
കോഴിക്കോട് ജില്ലയിലെ മുഴുവൻ വാര്ത്തകളും ഒറ്റ ക്ലിക്കിൽ ഇവിടെ വായിക്കാം