പൊറ്റമ്മലില്‍ ജ്വല്ലറി കെട്ടിടത്തില്‍ തീപിടുത്തം; നിരവധി വാഹനങ്ങള്‍ കത്തിനശിച്ചു
കോഴിക്കോട് പൊറ്റമ്മലിലെ കെട്ടിടത്തില്‍ തീപിടുത്തം. പാര്‍ക്കിംഗ് ഏരിയയില്‍ നിര്‍ത്തിയിട്ട വാഹനങ്ങള്‍ പൂര്‍ണമായും കത്തിനശിച്ചു. ഷോര്‍ട്ട്‌സര്‍ക്യൂട്ടല്ല അപകടകാരണമെന്നാണ് പ്രാഥമിക നിഗമനം.
കോഴിക്കോട്: ഗവ. മെഡിക്കല്‍ കോളേജ് റോഡിലെ പൊറ്റമ്മലിനു സമീപം മൂന്നുനില കെട്ടിടത്തില്‍ തീപിടിത്തം. കോട്ടൂളിയിലെ അപ്പോളോ ജ്വല്ലറി കെട്ടിടത്തിന്റെ ബേസ്‌മെന്റ് ഫ്‌ളോറില്‍ ഉച്ചയ്ക്ക് 12 മണിയോടെയാണ് സംഭവം. ആളപായമില്ല. പാര്‍ക്കിംഗ് ഏരിയയില്‍ നിര്‍ത്തിയിട്ട വാഹനങ്ങള്‍ പൂര്‍ണമായും കത്തിനശിച്ചു. 22ബൈക്കുകള്‍, മൂന്ന് കാറുകള്‍, ഒരു ഓട്ടോ എന്നിവയാണ് നശിച്ചത്.
സംഭവസമയത്ത് ജീവനക്കാരും ഉപഭോക്താക്കളുമടക്കം പതിനാറു പേര്‍ കെട്ടിടത്തിനു അകത്തുണ്ടായിരുന്നു. നാട്ടുകാരുടെ നേതൃത്വത്തില്‍ ഇവരെ അതിവേഗം രക്ഷപ്പെടുത്തി. ബീച്ച്, വെള്ളിമാടുകുന്ന് സ്റ്റേഷനുകളില്‍ നിന്നായി അഞ്ചുയൂണിറ്റ് ഫയര്‍ഫോഴ്‌സ് സ്ഥമലത്തെത്തി അരമണിക്കൂറിനകം തീ നിയന്ത്രണ വിധേയമാക്കി. എന്നാല്‍ കെട്ടിടത്തിന്റെ പരിസരത്താകെ കനത്ത പുക വ്യാപിച്ചു.
Also Read: സ്ത്രീയായി ജീവിക്കണം അനുമതി തേടി മലപ്പുറത്തെ 17കാരന്‍
എയര്‍കണ്ടീഷന്‍ സംവിധാനങ്ങളോടെയുള്ള കെട്ടിടത്തില്‍ നിന്നു കറുത്തപുക പുറത്തുപോകാതെ തങ്ങിനിന്നത് ആശങ്ക പടര്‍ത്തി. കെട്ടിടത്തിലെ ആവശ്യങ്ങള്‍ക്കു ഉപയോഗിക്കുന്ന വൈദ്യുതി ജനറേറ്ററിലേക്കു തീപടരാതെ ഫയര്‍ഫോഴ്‌സ് സുരക്ഷിതരാക്കി. കെട്ടിടത്തിലുണ്ടായിരുന്ന പാചകവാതക സിലിണ്ടറും സുരക്ഷിത സ്ഥാനത്തേക്കു മാറ്റി. തീപടര്‍ന്ന ഭാഗത്ത് വൈദ്യുതി സംവിധാനങ്ങളൊന്നുമില്ലാത്തതിനാല്‍ ഷോര്‍ട്ട്‌സര്‍ക്യൂട്ടല്ല അപകടകാരണമെന്നാണ് പ്രാഥമിക നിഗമനം. ഈ സ്ഥലത്ത് മാലിന്യങ്ങള്‍ കൂട്ടിയിട്ടിരുന്നതായി ഫയര്‍ഫോഴ്‌സ് ഉദ്യോഗസ്ഥര്‍ പറഞ്ഞു.
നഗരത്തില്‍ മാവൂര്‍റോഡില്‍ പ്രവര്‍ത്തിക്കുന്ന അപ്പോളോ ജ്വല്ലറിയുടെ ഹോള്‍സെയില്‍, പ്രീമിയം ഡിവിഷനുകളാണ് തീപിടിത്തമുണ്ടായ കെട്ടിടത്തില്‍ പ്രവര്‍ത്തിച്ചിരുന്നത്. രണ്ടുവര്‍ഷം മുമ്പാണ് കെട്ടിടം പ്രവര്‍ത്തനമാരംഭിച്ചത്. ആഭരണങ്ങളുടെ അറ്റകുറ്റപ്പണികള്‍ക്കും മറ്റുമായുള്ള ചെറിയൊരു യൂണിറ്റും
ഇവിടെയുണ്ട്.