കോഴിക്കോട്: ചക്കിട്ടപാറ ഗ്രാമപഞ്ചായത്തിലെ ചെമ്പനോടയില് അജ്ഞാത ജീവിയുടെ ആക്രമണത്തില് നാല് ആടുകള് ചത്തു. ചെമ്പനോട പ്രദേശത്തെ മൂന്നാംവാര്ഡ് പുത്തരിപ്പാറ തേരകത്തിങ്കല് ചാക്കോയുടെ ആടുകളെയാണ് കൊന്നത്. ജീവിയെ ആരും വ്യക്തമായി കണ്ടിട്ടില്ലെങ്കിലും പുള്ളിപ്പുലിയാണെന്ന് നാട്ടുകാര് പറയുന്നു. ഇതിനുള്ള സാധ്യത തള്ളിക്കളയാനാകില്ലെന്ന് സ്ഥലം പരിശോധിച്ച വനംവകുപ്പ് ഉദ്യോഗസ്ഥരും പറയുന്നുണ്ട്. വനത്തോടു ചേര്ന്ന പ്രദേശമാണിത്.
ആടുകളെ കെട്ടിയിരുന്ന കൂടിനു സമീപത്ത് പുലിയുടേതെന്നു കരുതുന്ന കാല്പ്പാടുകളുണ്ട്. എട്ട് ആടുകളാണ് വീടിനു പുറകുവശത്തു സ്ഥാപിച്ച കൂട്ടിലുണ്ടായിരുന്നത്. മൂന്നെണ്ണത്തിനെ കഴുത്തിനു കടിച്ചുകൊന്ന നിലയിലാണ്. ഒരെണ്ണം ചോരവാര്ന്ന അവസ്ഥയിലായിരുന്നുവെങ്കിലും പിന്നീട് ചത്തു. അര്ധരാത്രിയോടെ ആടുകളുടെ കരച്ചില് കേട്ട് വീട്ടുകാര് പുറത്തിറങ്ങുകയായിരുന്നു. ഈ സമയം വന്യജീവി ഓടിമറയുന്നതു കണ്ടെന്നാണ് ഇവര് പറയുന്നത്. എന്നാലിതു പുലിയാണോ എന്ന് വ്യക്തമായില്ല. കെട്ടിയിട്ടതിനാലാകാം ആടുകളെ കൊണ്ടുപോകാന് സാധിക്കാതിരുന്നതെന്നും വീട്ടുകാര് പറഞ്ഞു.
Also Read: പഠനം മുടങ്ങുമോയെന്ന ആശങ്ക; നിസഹായനായി കൂലിപ്പണിക്കാരനായ പിതാവ്, ദേവികയുടെ മരണത്തില് നടുങ്ങി നാട്
പ്രദേശവാസികള് അറിയിച്ചതുപ്രകാരം സ്ഥലത്തെത്തിയ വനംവകുപ്പ് ഉദ്യോഗസ്ഥര് പരിസരത്തു പരിശോധന നടത്തി. കൂടിനു സമീപം പതിഞ്ഞ കാല്പ്പാട് പുലിയുടേതാണെന്ന പ്രാഥമിക നിഗമനത്തിലാണ് ഉദ്യോഗസ്ഥരുള്ളത്. ഇക്കാര്യം വിശദമായി പരിശോധിച്ചുവരികയാണെന്ന് റേഞ്ച് ഓഫീസര് അറിയിച്ചു. പ്രദേശം കേന്ദ്രീകരിച്ച് വനപാലകസംഘം പരിശോധന ശക്തമാക്കും. ആട് കൊല്ലപ്പെട്ട കര്ഷകന് അടിയന്തര ധനസഹായമായി അയ്യായിരം രൂപ കൈമാറുമെന്നും ഉദ്യോഗസ്ഥര് പറഞ്ഞു. വനംവകുപ്പിന്റെ വെറ്ററിനറി സര്ജന് ഡോ. അരുണ് സത്യനും സ്ഥലത്തു പരിശോധന നടത്തി. ഇന്സ്പെക്ടര് എ.കെ, ഹസന്റെ നേതൃത്വത്തില് പോലീസും സ്ഥലത്തെത്തിയിരുന്നു.
വന്യജീവി ആടുകളെ കൊന്ന സംഭവമുണ്ടായ സാഹചര്യത്തില് പ്രദേശവാസികള് ഏറെ ഭീതിയിലാണ്. കൂട് സ്ഥാപിച്ച് ജീവിയെ പിടികൂടാന് അടിയന്തര നടപടി വേണമെന്ന് സംയുക്ത കര്ഷക സമിതി ആവശ്യപ്പെട്ടു. പ്രദേശത്ത് കാട്ടാന, കാട്ടുപന്നി, കുരങ്ങ് എന്നിവയുടെ ശല്യം ഏറെ രൂക്ഷമാണ്. ലക്ഷക്കണക്കിനു രൂപയുടെ കൃഷിയാണ് വന്യജീവികള് നശിപ്പിക്കാറുള്ളത്. ആടുകളെ കൊന്ന സംഭവത്തിന്റെ പശ്ചാത്തലത്തില് ജീവനും സ്വത്തിനും സംരക്ഷണം നല്കാന് തോക്കിനു ലൈസന്സ് നല്കണമെന്ന് കര്ഷക സംഘടനയായ വിഫാം ആവശ്യപ്പെട്ടു. പെരുവണ്ണാമൂഴി ഫോറസ്റ്റ് റേഞ്ച് ഓഫീസിനു മുന്നില് വിഫാം നേതാക്കള് ധര്ണ നടത്തി. കര്ഷകരുടെ ആവശ്യങ്ങളുള്പ്പെടുന്ന നിവേദനവും കൈമാറി.