കോഴിക്കോട്: താമരശേരി റേഞ്ച് ഫോറസ്റ്റ് ഓഫീസിനുമുന്നില് കര്ഷകക്കൂട്ടായ്മ സംഘടിപ്പിച്ച പ്രതിഷേധസമരത്തില് പങ്കെടുത്തവര്ക്കെതിരായ കേസില്നിന്ന് താമരശേരി രൂപതാ ബിഷപ്പിനെ ഒഴിവാക്കി. 13 പേരുള്ള പ്രതിപ്പട്ടികയില്നിന്ന് ബിഷപ്പ് മാര് റെമിജിയോസ് ഇഞ്ചനാനിയിലിന്റേ പേര് നീക്കംചെയ്തു. താമരശ്ശേരി ഡിവൈഎസ്പി ടികെ അഷ്റഫിന്റെ നിര്ദേശപ്രകാരം താമരശ്ശേരി ഇന്സ്പെക്ടര് എംപി രാജേഷ് നടത്തിയ പുനഃപരിശോധനയെത്തുടര്ന്നാണ് നടപടി. ബിഷപ്പിനെതിരെ കേസെടുത്തതില് വ്യാപക പ്രതിഷേധം ഉയര്ന്നിരുന്നു.
കോടഞ്ചേരിയില് കാട്ടുപന്നിയെ വെടിവെച്ചുകൊന്ന കര്ഷകന് തോക്കുപയോഗത്തിനുള്ള അനുമതി നിഷേധിച്ചതിനെതിരെ ജൂണ് 30നായിരുന്നു കര്ഷകക്കൂട്ടായ്മ പ്രതിഷേധസമരം നടത്തിയത്. സമരം അവസാനിക്കാറായപ്പോള് സ്ഥലത്തെത്തിയ ബിഷപ്പ് റേഞ്ച് ഓഫീസര്ക്ക് നിവേദനം നല്കുകയും ഗേറ്റിന് പുറത്തെത്തി സംസാരിച്ചശേഷം മടങ്ങുകയും ചെയ്തു. പിന്നീട് കൂട്ടായ്മയ്ക്ക് നേതൃത്വം നല്കിയ പന്ത്രണ്ടു പേര്ക്കൊപ്പം അദ്ദേഹത്തെയും പ്രതിയാക്കി താമരശ്ശേരി പോലീസ് കേസ് രജിസ്റ്റര് ചെയ്യുകയായിരുന്നു.
Also Read: 12 പേര്കൂടി ക്വാറന്റൈനില്; കോഴിക്കോട് മെഡിക്കല് കോളേജില് നിരീക്ഷണത്തിലുള്ള ആരോഗ്യപ്രവര്ത്തകരുടെ എണ്ണം 226
ലോക്ക് ഡൗണ് നിയന്ത്രണങ്ങള് ലംഘിക്കല്, അന്യായമായി സംഘം ചേരല്, മാര്ഗതടസം സൃഷ്ടിക്കല് തുടങ്ങിയ കുറ്റങ്ങള് ചുമത്തിയായിരുന്നു കേസ്. ഇതിനെതിരേ കര്ഷകക്കൂട്ടായ്മകളും സംഘടനകളും ജനപ്രതിനിധികളുമെല്ലാം പ്രതിഷേധവുമായി രംഗത്തത്തി. ഈ സാഹചര്യത്തിലാണ് പോലീസിന്റെ തിരുത്തല് നടപടി. കോടതിയില് സമര്പ്പിക്കുന്ന കുറ്റപത്രത്തില് ബിഷപ്പിന്റെ പേര് ഉണ്ടാകില്ല. തെറ്റുതിരുത്തി നീതി നടപ്പാക്കാന് പോലീസ് ശ്രമിക്കുന്നതില് നന്ദിയുണ്ടെന്ന് മാര് റെമിജിയോസ് ഇഞ്ചനാനിയില് പ്രതികരിച്ചു. പ്രതിചേര്ത്ത മുഴുവന് കര്ഷകരുടെ പേരിലുമുള്ള കേസുകള് പിന്വലിക്കണമെന്നും അദ്ദേഹം ആവശ്യപ്പെട്ടു.