ഇ- പോസ് സെര്‍വര്‍ തകരാറിലായി; വിവിധയിടങ്ങളില്‍ ഓണക്കിറ്റ് വിതരണം തടസപ്പെട്ടു

കോഴിക്കോട്: സംസ്ഥാനത്ത് റേഷന്‍ കടകള്‍ വഴിയുള്ള ഓണക്കിറ്റി വിതരണം വീണ്ടും തടസപ്പെട്ടു. ഇ- പോസ് സെര്‍വര്‍ തകരാറിലായതിനെ തുടര്‍ന്നാണ് കിറ്റ് വിതരണം തടസ്സപ്പെട്ടത്. പിങ്ക് കാര്‍ഡ് ഉടമകള്‍ക്കാണ് ഇന്ന് ഓണക്കിറ്റി വിതരണം ചെയ്യുന്നത്. കിറ്റ് വിതരണം തുടങ്ങിയ ദിവസവും ഇ- പോസ് മെഷീന്‍ തകരാര്‍ കിറ്റ് വിതരണത്തെ ബാധിച്ചിരുന്നു.

Also Read: ശ്വാസംമുട്ടലിനെ തുടര്‍ന്ന് അട്ടപ്പാടിയില്‍ ഒരു വയസ്സുകാരന്‍ മരിച്ചു

ഇ- പോസ് മെഷീനുകളുടെ തകരാര്‍ പൊതുവിതരണ സമ്പ്രദായത്തെ പ്രതികൂലമായി ബാധിക്കുന്നെന്ന പരാതി ഉയരുന്നുണ്ട്. ഓണക്കിറ്റ് വിതരണത്തിന് മുന്നോടിയായി ക്രമീകരണങ്ങള്‍ ഏര്‍പ്പെടുത്തിയിരുന്നെങ്കിലും രണ്ട് ദിവസത്തിനിടെ രണ്ടാം തവണയും സെര്‍വര്‍ തകരാര്‍ ഉണ്ടായത് തിരിച്ചടിയായി.

ഓണക്കിറ്റ് വിതരണവുമായി ബന്ധപ്പെട്ട് ചില സാങ്കേതിക തകരാറുകള്‍ ഉള്ളതായി ശ്രദ്ധയില്‍പ്പെട്ടിട്ടുണ്ടെന്ന് ഭക്ഷ്യ- സിവില്‍ സപ്ലൈസ് മന്ത്രി ജി ആര്‍ അനില്‍ പറഞ്ഞു. അത് ഉടന്‍ പരിഹരിക്കുമെന്നും കിറ്റ് വിതരണം ഒരിടത്തും തടസ്സപ്പെട്ടിട്ടില്ലെന്നും മന്ത്രി വ്യക്തമാക്കി. ഓണക്കിറ്റ് വിതരണം കൃത്യമായി മുന്നോട്ടു പോകുന്നതായും മന്ത്രി അറിയിച്ചു.

undefined

ഓഗസ്റ്റ് 23 ചൊവ്വാഴ്ച മുതലാണ് സംസ്ഥാനത്ത് ഓണക്കിറ്റി വിതരണം തുടങ്ങിയത്. മഞ്ഞ കാര്‍ഡ് ഉടമകള്‍ക്കായിരുന്നു ആദ്യ രണ്ട് ദിവസങ്ങളില്‍ കിറ്റ് വിതരണം ചെയ്തത്. ഇന്ന് മുതല്‍ മൂന്ന് ദിവസം പിങ്ക് കാര്‍ഡ് ഉടമകള്‍ക്കാണ് കിറ്റ് നല്‍കുന്നത്. 29, 30, 31 തീയതികളില്‍ നീല കാര്‍ഡ് ഉടമകള്‍ക്കും സെപ്തംബര്‍ 1,2,3 തീയതികളില്‍ വെള്ള കാര്‍ഡുകള്‍ക്കും ഭക്ഷ്യക്കിറ്റുകള്‍ വിതരണം ചെയ്യും. ഏതെങ്കിലും കാരണത്താല്‍ ഈ തീയതികളില്‍ ഓണക്കിറ്റ് വാങ്ങാന്‍ കഴിയാത്തവര്‍ക്ക് അടുത്ത മാസം 4,5,6,7 തീയതികളില്‍ ഓണക്കിറ്റ് കൈപ്പറ്റാന്‍ അവസരമുണ്ടാകും.

Also Read: ഇഡിയുടെ വിശാലധികാരം ശരിവെച്ച വിധി; പുനഃപരിശോധന ഹര്‍ജി ഇന്ന് സുപ്രിംകോടതിയില്‍

കശുവണ്ടിപ്പരിപ്പ് 50 ഗ്രാം, മില്‍മ നെയ് 50 മി.ലി, ശബരി മുളക്‌പൊടി 100 ഗ്രാം, ശബരി മഞ്ഞള്‍പ്പൊടി 100 ഗ്രാം, ഏലയ്ക്ക 20 ഗ്രാം, ശബരി വെളിച്ചെണ്ണ 500 മി.ലി, ശബരി തേയില 100 ഗ്രാം, ശര്‍ക്കരവരട്ടി 100 ഗ്രാം, ഉണക്കലരി 500 ഗ്രാം, പഞ്ചസാര ഒരു കിലോഗ്രാം, ചെറുപയര്‍ 500 ഗ്രാം, തുവരപ്പരിപ്പ് 250 ഗ്രാം, പൊടി ഉപ്പ് 1 ഒരു കിലോ ഗ്രാം, തുണിസഞ്ചി തുടങ്ങിയവയാണ് ഓണക്കിറ്റില്‍ ഉണ്ടാകുക.