കോഴിക്കോട്: കൊറോണ വ്യാപനം രൂക്ഷമായ സാഹചര്യത്തില്‍ ആള്‍ക്കൂട്ടം പാടില്ലെന്നും സമ്മേളനങ്ങള്‍ ഒഴിവാക്കണമെന്നുമുള്ള കോടതി ഉത്തരവിനെ പരസ്യമായി ലംഘിക്കുകയാണ് സിപിഎം ചെയ്തതെന്ന് പ്രതിപക്ഷ നേതാവ് വിഡി സതീശന്‍. ജനങ്ങളുടെ ജീവന്‍ പണയം വെച്ചുള്ള പ്രവര്‍ത്തനങ്ങളാണ് സിപിഎമ്മും ഇടതുപക്ഷ സര്‍ക്കാരും ചെയ്യുന്നതെന്നും വിഡി സതീശന്‍.
കൊവിഡ് തരംഗം രൂക്ഷമായപ്പോള്‍ ജനങ്ങളോട് വീടുകളില്‍ കഴിയാന്‍ മാത്രമാണ് സര്‍ക്കാര്‍ പറയുന്നത്. പാര്‍ട്ടി സമ്മേളനങ്ങള്‍ നടത്താനുള്ള ഓട്ടത്തിലാണ് സിപിഎമ്മെന്നും സതീശന്‍ കുറ്റപ്പെടുത്തി. കാസര്‍കോട് സമ്മേളനം നടത്താന്‍ കളക്ടര്‍ക്ക് മേല്‍ സമ്മര്‍ദ്ദം ചെലുത്തിയ സര്‍ക്കാരാണിതെന്നും വിഡഡി സതീശന്‍ പറഞ്ഞു. ആരോഗ്യ വകുപ്പിന്റെ പ്രവര്‍ത്തനങ്ങള്‍ക്ക് സ്വാതന്ത്ര്യമില്ലെന്നും കേന്ദ്രീകൃത സംവിധാനമാണ് കാര്യങ്ങള്‍ നടത്തുന്നതെന്നും വിഡി സതീശന്‍ ആരോപിച്ചു.
വിവാഹം പോലുള്ള ചടങ്ങുകള്‍ക്ക് നിയന്ത്രണം ഏര്‍പ്പെടുത്തിയിട്ട് പാര്‍ട്ടി സമ്മേളനങ്ങള്‍ക്ക് ആളെക്കൂട്ടുന്ന സര്‍ക്കാര്‍ ജനങ്ങളെ വഞ്ചിക്കുകയാണെന്നും വിഡി സതീശന്‍ കോഴിക്കോട് പറഞ്ഞു.