അവളില്ലാതെ ജീവിക്കാനാവില്ലെന്ന് യുവാവ്; കൈയ്യിൽ കരുതിയത് പെട്രോളും മൂർച്ചയേറിയ വാക്കത്തിയും!

ഉച്ചയ്ക്ക് 2.20 നാണ് വിദ്യാർഥിനി അക്രമത്തിനിരയായത്. അക്രമത്തിന് ഉപയോഗിച്ച മൂർച്ചയേറിയ വാക്കത്തി പ്രതി രണ്ട് ദിവസം മുമ്പ് കക്കട്ടിലെ കടയിൽ നിന്ന് വാങ്ങിയതാണെന്ന് പോലീസിന് വിവരം ലഭിച്ചിട്ടുണ്ട്. അക്രമത്തിനുശേഷം മോട്ടോർ ബൈക്കിൽ സൂക്ഷിച്ച നിലയിൽ ഒരു ലിറ്റർ പെട്രോളും പോലീസ് നടത്തിയ പരിശോധനയിൽ കണ്ടെത്തി. യുവതിയെ വെട്ടിക്കൊലപ്പെടുത്തുകയോ, അതിന് സാധിച്ചില്ലെങ്കിൽ പെട്രോൾ ഒഴിച്ച് തീ കൊളുത്തി കൊല്ലാനോ പദ്ധതിയിട്ടിരിക്കാമെന്നാണ് പോലീസ് നിഗമനം.

വ്യാഴാഴ്ച്ച രാവിലെ മുതൽ യുവാവ് പെൺകുട്ടിയുടെ വീടിനു സമീപം പല സമയങ്ങളിലായി എത്തിയതായി പ്രദേശവാസികൾ പറഞ്ഞു. അക്രമത്തിന് ഉപയോഗിച്ച വാക്കത്തിയും പ്രതി സഞ്ചരിച്ചിരുന്ന കെഎൽ 58 എൻ 4544 നമ്പർ ബൈക്കും പോലീസ് കസ്റ്റഡിയിലെടുത്തു. കല്ലാച്ചിയിലെ സ്കൂളിൽ പ്ലസ് ടു വിദ്യാർഥികളായിരുന്നു ഇരുവരും. ഇതിനുശേഷം കല്ലാച്ചിയിലെ സ്വകാര്യ കോളേജിൽ ബികോമിന് ചേർന്ന് പഠിക്കുകയായിരുന്നു. റഫ്നാസ് വിവിധ തുണിക്കടകളിൽ സെയിൽസ്മാനായി ജോലി ചെയ്ത് വരികയായിരുന്നു.

അടുത്ത സുഹൃത്തുക്കൾക്കോ, കൂടെ ജോലി ചെയ്തവർക്കോ റഫ്നാസിന്റെ പ്രണയത്തെക്കുറിച്ച് അറിവില്ലായിരുന്നത്രേ. കോഴിക്കോട് മെഡിക്കൽ കോളേജിൽ ചികിത്സയിൽ കഴിയുന്ന യുവാവിൽ നിന്ന് അടുത്ത ദിവസം മൊഴി രേഖപ്പെടുത്താനുള്ള തയ്യാറെടുപ്പിലാണ് പോലീസ്. ഡിവൈഎസ്പി ടി പി. ജേക്കബ്, സിഐ ഇ വി ഫായിസ് അലി, എസ്ഐ ആർ എൻ പ്രശാന്ത്, വിരലടയാള വിദഗ്ദർ, സൈന്റിഫിക് അസിസ്റ്റന്റ് തുടങ്ങിയവർ സ്ഥലത്തെത്തി പരിശോധന നടത്തി.