നാദാപുരം: വാഹനങ്ങൾ തടഞ്ഞ പോപ്പുലർ ഫ്രണ്ട് പ്രവർത്തകരെ അറസ്റ്റ് ചെയ്യാനെത്തിയ എസ്ഐയെ കയ്യേറ്റം ചെയ്ത സംഭവത്തിൽ അഞ്ച് പേർ അറസ്റ്റിൽ. പോപ്പുലർ ഫ്രണ്ട് പ്രവർത്തകരായ പേരോട് യൂണിറ്റ് സെക്രട്ടറി അബ്ദുൾ ഹക്കീം (32) , ചെറിയ തുണ്ടിയിൽ അഷ്ക്കർ (38), വെള്ളോളി റാഷിദ് (38), കോരച്ചാം വീട്ടിൽ ബഷീർ (45), പീറ്റയിൽ റിയാസ് (39) എന്നിവരാണ് അറസ്റ്റിലായത്.
ഇന്ന് രാവിലെ 10 മണിയോടെയാണ് സംഭവം. നാദാപുരം തലശേരി സംസ്ഥാന പാതയിൽ പേരോട് ടൗണിൽ വാഹനങ്ങൾ തടഞ്ഞ പിഎഫ്ഐ പ്രവർത്തകരെ അറസ്റ്റ് ചെയ്യാനെത്തിയ നാദാപുരം എസ്ഐ ആർ എൻ പ്രശാന്തിനെ കൈയ്യേറ്റം ചെയ്യുകയും ഔദ്യോഗിക കൃത്യ നിർവ്വഹണം തടസപ്പെടുത്തുകയും ചെയ്ത സംഭവത്തിലാണ് അറസ്റ്റ്.
പേരോട് ടൗണിൽ പിഎഫ്ഐ പ്രവർത്തകർ വാഹനങ്ങൾ തടയുന്നുവെന്ന വിവരത്തെ തുടർന്ന് സ്ഥലത്തെത്തിയ എസ്ഐയുടെ യൂണിഫോമിലെ നെയിം ബോർഡ് പറിച്ചെടുക്കുകയും കൈയ്യേറ്റം ചെയ്യുകയുമായിരുന്നു. കൂടുതൽ പോലീസ് എത്തിയാണ് പ്രതികളെ കസ്റ്റഡിയിലെടുത്തത്. സ്റ്റേഷനിലെത്തിച്ച പ്രതികളെ അറസ്റ്റ് രേഖപ്പെടുത്തി.
Read Latest Local News and Malayalam News