കോഴിക്കോട് കോർപ്പറേഷനിൽ കോവിഡ് പ്രതിരോധം ശക്തമാക്കും; 100 വീടുകൾക്ക് ഒരു സ്ക്വാഡ്

കോഴിക്കോട്: കോർപ്പറേഷൻ പരിധിയിൽ കൊവിഡ്‌ രോഗവ്യാപനം തടയാൻ ഉദ്യോഗസ്ഥരും ജനപ്രതിനിധികളും സന്നദ്ധ പ്രവർത്തകരും അംഗൻവാടി, കുടുംബശ്രീ, റസിഡന്റ്സ് അസോസിയേഷനുകളുടെയും പങ്കാളിത്തത്തോടെ വാർഡ് തല മോണിറ്ററിംഗ് കമ്മറ്റിയുടെ കീഴിൽ 100 വീടുകൾക്ക് ഒരു സ്ക്വാഡ് രൂപീകരിച്ച് പ്രതിരോധ പ്രവർത്തനങ്ങൾക്ക് നേതൃത്വം നൽകുന്നതിന് സർവ്വകക്ഷി യോഗം തീരുമാനിച്ചു. ഹോം ഐസൊലേഷനിൽ കഴിയുന്ന രോഗികൾ മറ്റുള്ളവരുമായ ഇടപഴകാതെ റൂം ക്വാറന്റൈനിൽ കഴിയുന്നുണ്ടെന്ന് ഉറപ്പു വരുത്തും. രോഗലക്ഷണമുള്ളവരെ ടെസ്റ്റ് ക്യാമ്പുകളിലേക്ക് കൊണ്ടു വന്ന് പരിശോധിച്ച് പോസിറ്റീവ് ആണെങ്കിൽ പ്രാദേശിക ഡിസിസികളിലേക്ക് മാറ്റും.

ക്ലസ്റ്ററുകളിൽ പോലീസ് പരിശീലനം ലഭിച്ച സ്പെഷൽ ഓഫീസർമാരുടെ സേവനം ലഭ്യമാക്കും. ആർടിപിസിആർ പരിശോധന നടത്തി പരിശോധനഫലം വരുന്നതിന് കാലതാമസം വരികയാണെങ്കിൽ പരിശോധന നടത്തിയവർ മറ്റുള്ളവരുമായി ഇടപഴകുന്നില്ലെന്ന് ഉറപ്പു വരുത്തും. പൾസ് ഓക്സിമീറ്റർ, ഓക്സിജൻ കോൺസൺട്രേറ്റർ തുടങ്ങിയ സാധനസാമഗ്രികളും ഓക്സിജൻ ചാലഞ്ച് മുഖേന കണ്ടെത്തുന്നതിന് തീരുമാനിച്ചു. കൊവിഡ്‌ പ്രതിരോധത്തിന് അവശ്യം വേണ്ട സാധനസാമഗ്രികളും ഫണ്ടും കണ്ടെത്തുന്നതിനായി സന്നദ്ധ സംഘടനകളുടെയും സ്ഥാപനങ്ങളുടെയും സഹകരണം അഭ്യർത്ഥിക്കും.

മാവൂര്‍ റോഡിനു ശാപമോക്ഷം; അറ്റകുറ്റപണികള്‍ പൂർത്തിയാകുന്നു, വീഡിയോ കാണാം

മൊബൈൽ വാക്സിനേഷൻ യൂണിറ്റുകളുടെ പ്രവർത്തനം വ്യാപിപ്പിക്കാൻ നഗരപരിധിയിലെ സന്നദ്ധ സംഘടനകളുടെ സഹായം തേടും. വീടുകളിൽ സൗകര്യമില്ലാത്ത കൊവിഡ്‌ പോസിറ്റീവ് രോഗികളെ ഡിസിസികളിലേക്ക് മാറ്റുന്നതിന് രാഷ്ട്രീയ പാർട്ടികളുടെ ഇടപെടലുണ്ടാവും. ലോക്ക്ഡൌൺ കാലത്ത് ഭക്ഷണം എത്തിക്കേണ്ടവർക്ക് കുടുംബശ്രീയുടെ ജനകീയ ഹോട്ടലുകൾ വഴിയും നടക്കാവ് സ്ക്കൂളിൽ കോർപ്പറേഷന്റെ നേതൃത്വത്തിൽ തുടങ്ങിയ കമ്മ്യൂണിറ്റി കിച്ചൺ വഴിയും ഭക്ഷണം വിതരണം ചെയ്യും. ആവശ്യമെങ്കിൽ കോർപ്പറേഷന്റെ നേതൃത്വത്തിൽ കമ്മ്യൂണിറ്റി കിച്ചണുകൾ ആരംഭിക്കും. ഇതിന്റെ ഭാഗമായി ടാഗോർ ഹാളിൽ കലവറ ആരംഭിക്കും.

ഡെപ്യൂട്ടി മേയർ സി പി മുസഫർ അഹമ്മദ് അദ്ധ്യക്ഷത വഹിച്ചു. ആരോഗ്യകാര്യ സ്ഥിരം സമിതി ചെയർമാൻ ഡോ.എസ് ജയശ്രീ. എൻഎച്ച്എം ജില്ലാ പ്രൊജക്ട് മാനേജർ ഡോ.നവീൻ പി എന്നിവർ സംസാരിച്ചു. രാഷ്ട്രീയ പാർട്ടികളെ പ്രതിനിധീകരിച്ച് ടി പി ദാസൻ, എ പ്രദീപ് കുമാർ, പി വി മാധവൻ, യു രാജീവൻ, പി ടി ആസാദ്, ഷർമ്മദ് ഖാൻ, സിപി ഹമീദ്, എൻസി അബൂബക്കർ, കെബി.ജയാനന്ദ്, കെഎം ഗംഗേഷ്, പിആർ സുനിൽസിംഗ് എന്നിവർ പങ്കെടുത്തു.