കാസര്കോട്: നാലുവര്ഷം മുമ്പ് സംസ്ഥാന സര്ക്കാര് അനുവദിച്ച 40 കോടിയുടെ നീലേശ്വരം രാജാറോഡ് വികസന പദ്ധതിക്ക് ജീവന് വയ്ക്കുന്നു.. രാജാറോഡ് വികസനത്തിന് ആവശ്യമായ സ്ഥലം ഏറ്റെടുക്കുമ്പോള് ഒഴിവാക്കേണ്ടി വരുന്ന കെട്ടിടങ്ങളുടെ കണക്കെടുപ്പ് പൂര്ത്തിയാകുന്നു. 14 മീറ്റര് വീതിയില് ഏറ്റെടുക്കുന്നതിനു വേണ്ടി സര്വ്വെ ഡിപ്പാര്ട്ട്മെന്റ് അളന്ന് അലൈന്മെന്റ് നിശ്ചയിച്ച ഭൂമിയുടെ അകത്ത് വരുന്ന, ഭാഗീകമായോ പൂര്ണ്ണമായോ ഒഴിവാക്കേണ്ടി വരുന്ന കെട്ടിടങ്ങളുടെ കണക്കെടുപ്പാണ് ഇപ്പോള് നടക്കുന്നത്. കിഫ്ബി പദ്ധതികള്ക്കു വേണ്ടി പ്രത്യേകമായി രൂപീകരിച്ച റവന്യൂ വിഭാഗത്തിന്റെ നേതൃത്വത്തില് ആണ് സര്വേ നടത്തുന്നത്. കണക്കെടുപ്പില് ഉള്പ്പെടുന്ന കെട്ടിടങ്ങളുടെ മൂല്യ നിര്ണ്ണയം പി.ഡബ്ല്യു.ഡി കെട്ടിട വിഭാഗമാണ് നടത്തേണ്ടതെന്ന് നഗരസഭാ വൈസ് ചെയര്മാന് പി.പി.മുഹമ്മദ്റാഫി പറഞ്ഞു.
എട്ട് കോടി രൂപയാണ് ഭൂമി ഏറ്റെടുക്കുന്നതിനുവേണ്ടി മാത്രം പദ്ധതിയില് ഉള്പ്പെടുത്തിയിട്ടുള്ളത്. കിഫ്ബി പദ്ധതിയുടെ നടത്തിപ്പിനും വേണ്ടി മാത്രം സര്ക്കാര് ചുമതലപ്പെടുത്തിയ പ്രത്യേക എഞ്ചിനീയര് വിഭാഗത്തിന്റെ (കെ.ആര്.എഫ്.ബി) മേല്നോട്ടത്തിലാണ് രാജാറോഡ് നിര്മ്മാണ പ്രവര്ത്തനങ്ങള് നടത്തുക. നാലുവര്ഷം മുമ്പ് റോഡ് അളന്ന് അടയാളപ്പെടുത്തി മാസങ്ങള് കഴിഞ്ഞെങ്കിലും പിന്നിട് അതിന്റെ തുടര്പ്രവര്ത്തനങ്ങള് നിലക്കുകയായിരുന്നു.
അടിക്കടി ഗതാഗത തടസമുണ്ടാകുന്ന നീലേശ്വരം രാജാ റോഡിലെ ഗതാഗതക്കുരുക്കിന് പരിഹാരമായി റോഡ് വീതി കൂട്ടുന്നതടക്കമുള്ള നിര്ദ്ദേശങ്ങള്ക്ക് പതിറ്റാണ്ടുകളുടെ പഴക്കമുണ്ടായിരുന്നു. പുതിയ ഭരണ സമിതിയാണ് ഇക്കാര്യത്തില് ഗൗരവകരമായ നിലപാട് സ്വീകരിച്ചത്. പദ്ധതി പൂര്ത്തിയാകുന്നതോടെ ജില്ലയുടെ സാംസ്കാരിക തലസ്ഥാനമെന്ന് പറയപ്പെടുന്ന നീലേശ്വരത്തിന്റെ മുഖഛായ തന്നെ മാറുമെന്ന് ഉറപ്പാണ്.