പായൽപ്പൂക്കൾ വർണം ചാർത്തി ആവളപാണ്ടി കനാൽ
ഇതെവിടെയെന്ന് സോഷ്യല്‍ മീഡിയ
ചിത്രങ്ങള്‍ക്ക് കടപ്പാട്: ദീപേഷ് ജോണ്‍
നെല്‍കൃഷിക്കു ജലലഭ്യത ഉറപ്പാക്കുന്ന തോട്ടിലാണ് വര്‍ണക്കാഴ്ച. ഇതിന്‍റെ ചിത്രങ്ങള്‍ സോഷ്യല്‍മീഡിയയില്‍ വൈറലായതോടെ ദൂരദിക്കില്‍ നിന്നുപോലും ആളുകള്‍ ഇവിടേക്ക് എത്തുകയാണിപ്പോള്‍. കഴിഞ്ഞ ആഴ്ച തുടക്കത്തില്‍ തന്നെ പൂക്കള്‍ വിരിഞ്ഞു തുടങ്ങിയിരുന്നുവെങ്കിലും ആരും കാര്യമായി ശ്രദ്ധിച്ചിരുന്നില്ല. പ്രദേശവാസികളില്‍ ചിലര്‍ വാട്‌സ്ആപ്പ് സ്റ്റാറ്റസാക്കിയതോടെ ചിത്രങ്ങള്‍ ശ്രദ്ധിക്കപ്പെട്ടു. ഇതെവിടെയാണെന്ന അന്വേഷണത്തിലായിരുന്നു സോഷ്യല്‍മീഡിയ. പിന്നാലെ ഫേസ്ബുക്കിലും ഇന്‍സ്റ്റഗ്രാമിലുമൊക്കെയായി ദൃശ്യങ്ങള്‍ വ്യാപകമായി.
ദീപേഷ് ജോണ്‍ ഫോട്ടോഗ്രാഫി
ചിത്രങ്ങള്‍ക്ക് കടപ്പാട്: ദീപേഷ് ജോണ്‍
ഒരു ദേശീയമാധ്യമത്തിലും ഇതിന്‍റെ ചിത്രം വന്നു. ഇതോടെ ഓളപ്പരപ്പിലെ പൂപ്പാടം നേരിട്ടു കാണാന്‍ കാഴ്ചക്കാര്‍ ഏറി. പേരാമ്പ്രയിലെ പ്രഫഷണല്‍ വീഡിയോഗ്രാഫറായ കണ്ണൂര്‍ സ്വദേശി ദീപേഷ് ജോണ്‍ ഡ്രോണ്‍ കാമറയുള്‍പ്പെടെയുള്ള സംവിധാനങ്ങള്‍ ഉപയോഗിച്ച് പകര്‍ത്തിയ ചിത്രങ്ങളാണ് സോഷ്യല്‍മീഡിയ ഗ്രൂപ്പുകളില്‍ വ്യാപകമായി പങ്കുവയ്ക്കപ്പെട്ടത്. ചിത്രങ്ങള്‍ പോസ്റ്റ് ചെയ്തതോടെ നിരവധി പേര്‍ അഭിനന്ദനമറിയിച്ചും സ്ഥലത്തെക്കുറിച്ച് അന്വേഷിച്ചും ബന്ധപ്പെട്ടതായി ദീപേഷ് ജോണ്‍ സമയം മലയാളത്തോടു പറഞ്ഞു.
ഫോട്ടോ ഷൂട്ട്... കച്ചവടം
ചിത്രങ്ങള്‍ക്ക് കടപ്പാട്: ദീപേഷ് ജോണ്‍
ആമ്പലിനെപ്പോലെ സൂര്യപ്രകാശം ലഭിച്ചുതുടങ്ങുമ്പോഴാണ് പായല്‍പൂക്കള്‍ വിരിയുക. വൈകുന്നേരം വെയില്‍താഴുന്നതോടെ കൂമ്പാന്‍ തുടങ്ങും. വിശാലമായ പാടത്തിന്‍റെ നടുവിലായാണ് തോട്. വയലില്‍ ദേശാടനപ്പക്ഷികളുള്‍പ്പെടെയുള്ളവയും ധാരാളമായുണ്ട്. കാഴ്ചക്കാര്‍ എത്താന്‍ തുടങ്ങിയതോടെ താത്കാലിക കച്ചവടവും മറ്റും ഇവിടെ ആരംഭിച്ചിട്ടുണ്ട്. വിവിധ കക്ഷികളിലെ സ്ഥാനാര്‍ഥികള്‍ ഫോട്ടോഷൂട്ടിനും മറ്റുമായി ഈ ലൊക്കേഷന്‍ ഉപയോഗപ്പെടുത്താനുമെത്തി.