കോഴിക്കോട്: നഗരത്തില്‍ വില്‍പ്പനയ്ക്കായി കൊണ്ടുവന്ന 56 കുപ്പി മാഹി നിര്‍മ്മിത വിദേശ മദ്യവുമായി ഒഡീഷ സ്വദേശി പിടിയിലായി. സോള്‍ഡ സ്വദേശി രവീന്ദ്ര (30) നെയാണ് സിറ്റി സ്‌പെഷല്‍ ആക്ഷന്‍ ഗ്രൂപ്പും നടക്കാവ് പോലീസും ചേര്‍ന്ന് അറസ്റ്റ് ചെയ്തത്. മാഹിയില്‍ നിന്നും മദ്യം വാങ്ങി വരുന്നതിനിടെ മാവൂര്‍ റോഡ് ശ്മശാനം പരിസരത്തുനിന്നുമാണ് ഇയാളെ പിടികൂടിയത്. മാങ്കാവിലെയും പരിസര പ്രദേശങ്ങളിലും അതിഥി തൊഴിലാളികള്‍ക്കിടയിലും നാട്ടുകാര്‍ക്കിടയിലും മദ്യവില്പന നടത്തുന്ന സംഘത്തിലെ മുഖ്യ കണ്ണിയാണ് പിടിയിലായ രവീന്ദ്രയെന്ന് പോലീസ് അറിയിച്ചു.
അതിഥി തൊഴിലാളികള്‍ക്കിടയില്‍ ലഹരിമരുന്നിന്റെ ഉപയോഗവും വില്പനയും വര്‍ദ്ധിച്ചു വരുന്നതു പോലീസിന്റെ ശ്രദ്ധയില്‍പ്പെട്ടിരുന്നു. കൂടാതെ രാത്രി ഏറെ വൈകിയും അതിഥിതൊഴിലാളികളുടെ താമസസ്ഥലത്തേക്ക് മറ്റു ഭാഗത്തുള്ള തൊഴിലാളികള്‍ വന്നു പോകുന്നതും ബഹളം വയ്ക്കുന്നതുമായുള്ള പരാതികളും പോലീസിന് ലഭിച്ചിരുന്നു. ഇതേ തുടര്‍ന്ന് തൊഴിലാളികളുടെ താമസസ്ഥലങ്ങളിലെല്ലാം രഹസ്യമായി പോലീസ് നിരീക്ഷണം നടത്തി വരികയായിരുന്നു. ഇതിനിടെയാണ് മദ്യവില്‍പ്പനക്കാരനായ രവീന്ദ്ര മാഹി ഭാഗത്തേക്ക് പോയതായി രഹസ്യവിവരം ലഭിച്ചത്. ഇതിന്റെ അടിസ്ഥാനത്തില്‍ അന്വേഷണം നടത്തുകയും പോലീസിന്റെ കണ്ണുവെട്ടിച്ച് മദ്യവുമായി നടന്നു വരികയായിരുന്ന രവീന്ദ്ര പിടിയിലാകുകയും ചെയ്യുകയായിരുന്നു.
കോഴിക്കോട് ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം
Read Latest Local News and Malayalam News
വില്പന ഉദ്ദേശത്തോടെ മദ്യം വാങ്ങി കൊണ്ടുവന്നതിന് ഇയാള്‍ക്കെതിരെ അബ്കാരി നിയമപ്രകാരം പോലീസ് കേസ് രജിസ്റ്റര്‍ ചെയ്തു. മാഹിയില്‍ നിന്നും ബോട്ടിലിന് 150 രൂപക്ക് ലഭിക്കുന്ന മദ്യം 500 മുതല്‍ 600 രൂപക്ക് വരെയാണ് വില്പന നടത്തുന്നത്. ഇയാളെ ചോദ്യം ചെയ്തതില്‍ ഇത്തരത്തില്‍ ജോലിക്കൊന്നും പോകാതെ മദ്യവും മയക്കുമരുന്നും വില്‍പ്പന നടത്തി മാത്രം പണമുണ്ടാക്കുന്ന ഒരുസംഘം തന്നെ അതിഥി തൊഴിലാളികളുടെ മറവില്‍ കേരളത്തില്‍ പല സ്ഥലങ്ങളിലും ഉള്ളതായി സൂചന ലഭിച്ചിട്ടുണ്ട്. വരും ദിവസങ്ങളിലും പരിശോധന ശക്തമാക്കുമെന്നും ലഹരിവില്പന നടത്തുന്ന സംഘത്തെ കുറിച്ച് വിവരം ലഭിച്ചതായും അസി.കമ്മീഷണര്‍ പ്രകാശന്‍ പടന്നയില്‍ പറഞ്ഞു.