കോഴിക്കോട് കൊവിഡ് ബാധിച്ചു മരിച്ച വീട്ടമ്മയുടെ മരുമകന്‍ മരിച്ചു; സ്രവം പരിശോധനയ്ക്ക് അയച്ചു

കോഴിക്കോട്: മരണാനന്തരം കൊവിഡ് സ്ഥിരീകരിച്ച കരിക്കാംകുളം സ്വദേശിനി കൊളക്കാട്ടുവയല്‍ റുഖിയാബിയുടെ മകളുടെ ഭര്‍ത്താവ് മരിച്ചു. കുന്നമംഗലം കാരന്തൂര്‍ പാറക്കടവില്‍ വാടകയ്ക്കു താമസിക്കുന്ന മുഹമ്മദലി ആണ് മരിച്ചത്. നിരീക്ഷണത്തിലായിരുന്ന ഇദ്ദേഹം മൂത്രാശയ സംബന്ധമായ രോഗങ്ങള്‍ക്കു ചികിത്സയിലായിരുന്നു. ഇന്നലെ അസ്വസ്ഥതകളെത്തുടര്‍ന്ന് മെഡിക്കല്‍ കോളജ് ആശുപത്രിയിലേക്കു മാറ്റി.

Also Read: സ്വര്‍ണ്ണക്കടത്ത്; മലപ്പുറത്ത് നിന്ന് രണ്ട് പേര്‍ കൂടി അറസ്റ്റിലാകും? അന്വേഷണ സംഘത്തില്‍ ഡിആര്‍ഐ ഉദ്യോഗസ്ഥരും

ഇന്ന് പതിനൊന്നുമണിയോടെയായിരുന്നു മരണം. സ്രവം കൊവിഡ് പരിശോധനയ്ക്ക് അയച്ചിട്ടുണ്ട്. റുഖിയാബിയുടെ വീടുമായി ബന്ധപ്പെട്ട മൂന്നാമത്തെ മരണമാണിത്. ഇവരുടെ മകള്‍ ഷാഹിദ കഴിഞ്ഞ ദിവസം നിരീക്ഷണത്തിലിരിക്കേ മരിച്ചിരുന്നു. കാന്‍സര്‍ രോഗബാധിതയായിരുന്ന ഷാഹിദയുടെ മരണം കൊവിഡ് മൂലമാണെന്ന് ഇന്നലെ സ്ഥിരീകരിക്കുകയും ചെയ്തു. ഷാഹിദയുടെ ഇളയ സഹോദരിയുടെ ഭര്‍ത്താവാണ് മുഹമ്മദലി.