വിവാഹം കഴിഞ്ഞിട്ട് 10 മാസം, ആൽബവും വീഡിയോയും ചോദിച്ചു മടുത്ത് ദമ്പതികൾ; ഒടുവിൽ 50,000 രൂപ പിഴ

മലപ്പുറം: വിവാഹ ആൽബവും വീഡിയോയും നൽകിയില്ലെന്ന പരാതിയിൽ 50,000 രൂപ പിഴയിട്ട് മലപ്പുറം ജില്ലാ ഉപഭോക്തൃ കമ്മീഷന്റെ വിധി. തിരൂരങ്ങാടി കക്കാട് സ്വദേശികളായ ദമ്പതികളുടെ വിവാഹത്തിന്റെ ആൽബവും വീഡിയോയും തയ്യാറാക്കുന്നതിൽ വീഴ്ച വരുത്തിയ പത്തനംതിട്ടയിലെ വെഡ്ഡിങ് ഫോട്ടോഗ്രാഫി സ്ഥാപനത്തിനെതിരെയാണ് വിധി. 1,10,000 രൂപയ്ക്ക് വിവാഹ ആൽബവും വീഡിയോയും തയ്യാറാക്കി നൽകാമെന്നായിരുന്നു കരാർ. ഒരു ലക്ഷം രൂപ മുൻകൂറായി നൽകുകയും ചെയ്തു. എന്നാൽ വിവാഹം കഴിഞ്ഞ് 10 മാസം പിന്നിട്ടിട്ടും ആൽബവും വീഡിയോയും സ്ഥാപനം നൽകിയില്ല. തുടർന്ന് നിരവധി തവണ കമ്പനിയുമായി ഇവർ ബന്ധപ്പെട്ടെങ്കിലും അവരുടെ ഭാഗത്തുനിന്ന് യാതൊരു തരത്തിലുള്ള നടപടിയും ഉണ്ടായില്ല. ഇതോടെയാണ് പരാതിക്കാർ ഉപഭോക്തൃ കമ്മീഷനെ സമീപിച്ചത്.


ഒരു മാസത്തിനകം ആൽബവും വീഡിയോയും പരാതിക്കാരന് നൽകണമെന്നും വീഴ്ച വരുത്തിയതിന് 50,000 രൂപ നഷ്ടപരിഹാരവും കോടതി ചെലവായി 5,000 രൂപയും നൽകണമെന്നും ഉത്തരവിൽ പറഞ്ഞു. ആൽബവും വീഡിയോയും നൽകാൻ കഴിയാത്തപക്ഷം രണ്ട് ലക്ഷം രൂപ നഷ്ടപരിഹാരം നൽകണം. കെ മോഹൻദാസ് പ്രസിഡന്റും പ്രീതി ശിവരാമൻ, സിവി മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മീഷന്റേതാണ് വിധി.

KSRTC Budget Trip: 560 രൂപയുണ്ടോ..? എങ്കിൽ കെഎസ്ആർടിസിക്കൊപ്പം മലമ്പുഴയിലെ പൂക്കാലം കണ്ടു വരാം
ഒരു മാസത്തിനകം വിധി നടപ്പാക്കാത്ത പക്ഷം വിധിപ്രകാരമുള്ള സംഖ്യയ്ക്ക് ഒൻപത് ശതമാനം പലിശ നൽകണമെന്നും ഉത്തരവിൽ പറഞ്ഞു. അതേസമയം ഇത്തരത്തിലുള്ള നിരവധി സംഭവങ്ങൾ ഉണ്ടാവാറുണ്ടെങ്കിലും ആരും കാര്യമായ പരാതികളുമായി രംഗത്തെത്താറില്ല. അത്തരം പറ്റിക്കപ്പെടുന്നവരുടെ അറിവിലേക്കും കൂടിയാണ് ഉപഭോക്തൃ കമ്മീഷന്റെ വിധി.

മലപ്പുറം ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം