കൊടപ്പനക്കൽ തറവാടിൻ്റെ ഉമ്മറത്തിനി ഹൈദരലി ശിഹാബ് തങ്ങളില്ല

രാഷ്ട്രീയ നേതാവായും സമുദായ നേതാവായും ആത്മീയാചാര്യനായും കേരളീയ പൊതുസമൂഹത്തോടൊപ്പം നടന്ന 74 വർഷങ്ങൾ. ഇരുളിൻ്റെ കാർമേഘങ്ങൾ എത്രമൂടിക്കെട്ടിയാലും വശ്യമായ പെരുമാറ്റത്തിലൂടെ എല്ലാം വകഞ്ഞു മാറ്റാനുള്ള ശാന്തത. ഹൈദരലി ശിഹാബ് തങ്ങൾ മതേതര കേരളത്തിൻ്റെയും ആത്മീയ മണ്ഡലത്തിൻ്റെയും സുവർണപാടുകളാണ്.

മാളിയേക്കൽ സയ്യിദ് അഹ്മദ് പൂക്കോയ തങ്ങളുടെയും ആയിശബീവിയുടെയും മൂന്നാമത്തെ മകനായി 1947 ജൂൺ 15 ന് ജനനം. പാണക്കാട്ടെ പ്രാഥമിക പഠനത്തിനു ശേഷം, കോഴിക്കോട് മദ്‌റസത്തുൽ മുഹമ്മദിയയിൽ ഹൈസ്‌കൂൾ പഠനം. തുടർന്ന് മതപഠനരംഗത്തേക്ക്. പട്ടിക്കാട് ജാമിഅ നൂരിയ അറബിക് കോളേജിലെ പഠനകാലമാണ് ഹൈദരലി തങ്ങളിലെ പൊതുപ്രവർത്തകനെ പരുവപ്പെടുത്തിയത്. 1973 ൽ സുന്നി സ്റ്റുഡന്റ്സ് ഫെഡറേഷൻ്റെ ആദ്യ അമരക്കാരനായി. തുടർന്നങ്ങോട്ട് സമൂഹത്തിൻ്റെയും സമുദായത്തിൻ്റെയും എണ്ണമറ്റ നേതൃചുമതലകൾ. കൃത്യനിർവഹണത്തിലെ മികവുകൊണ്ട് മാതൃക തീർത്ത്, ആ കുറിയ മനുഷ്യൻ മുന്നേ തന്നെ നടന്നു.

സഹോദരൻ മുഹമ്മദലി ശിഹാബ് തങ്ങൾ അന്തരിച്ചതിനെ തുടർന്ന് 2009 ലാണ് പാണക്കാട് ഹൈദരലി ശിഹാബ് തങ്ങൾ മുസ്ലീം ലീഗ് സംസ്ഥാന പ്രസിഡന്റായി ചുമതലയേൽക്കുന്നത്. ഒന്നര പതിറ്റാണ്ടിലേറെ മുസ്ലീം ലീഗ് മലപ്പുറം ജില്ലാ പ്രസിഡന്റായി പ്രവർത്തിച്ച ശേഷമാണ് ഹൈദരലി ശിഹാബ് തങ്ങൾ സംസ്ഥാന പ്രസിഡന്റ് സ്ഥാനത്തെത്തുന്നത്. പൊതുവെ സൗമ്യനായ തങ്ങൾ, പക്ഷെ തീരുമാനങ്ങളെടുക്കുന്നതിലും അത് നടപ്പിലാക്കുന്നതിലും കാർക്കശ്യത്തോടെ പെരുമാറിയ നേതാവായിരുന്നു. സംസ്ഥാന അധ്യക്ഷനായി പ്രവർത്തിച്ച 12 വർഷം ആ കരുത്തും നേതൃപാടവും പാർട്ടി അണികളും പൊതുസമൂഹവും ഒരുപോലെ തൊട്ടറിഞ്ഞു.

മനുഷ്യരുടെ കഷ്ടതകളിലും വേദനകളിലും എന്നും കൂടെനിന്ന, ദയയും അനുതാപവും വേണ്ടുവോളമുണ്ടായിരുന്ന, ജനാധിപത്യ മതേതര കേരളത്തിന്റെ ശക്തിയായി എക്കാലവും നിലകൊണ്ട ഒരു രാഷ്ട്രീയ പാർട്ടിയെ മുന്നിൽ നിന്ന് നയിച്ച നായകനെയാണ് കേരളത്തിന് നഷ്ടമായിരിക്കുന്നത്. ആ വിയോഗം കേരളത്തിനുണ്ടാക്കിയിട്ടുള്ള നഷ്ടം അപരിഹാര്യമാണ്. ശരീഫ ഫാത്വിമ സുഹ്റയാണ് ഭാര്യ. സയ്യിദ് നഈം അലി ശിഹാബ്, സയ്യിദ് മുഈൻ അലി ശിഹാബ്, സയ്യിദ സാജിദ, സയ്യിദ ശാഹിദ എന്നിവർ മക്കൾ.