മലപ്പുറം(Malappuram): മലപ്പുറം മുസ്ലിം ലീഗ് അധ്യക്ഷനായി പാണക്കാട് അബ്ബാസലി ശിഹാബ് തങ്ങളെ തിരഞ്ഞെടുത്തു. മുസ്ലിം ലീഗ് മുൻ സംസ്ഥാന അധ്യക്ഷൻ പാണക്കാട് ഹൈദരലി ശിഹാബ് തങ്ങളുടെ നിര്യാണത്തെ തുടർന്ന് ജില്ലാ പ്രസിഡണ്ട് സ്ഥാനത്ത് ഉണ്ടായിരുന്ന സാദിഖലി ശിഹാബ് തങ്ങൾ മുസ്ലിംലീഗ് സംസ്ഥാന അധ്യക്ഷ പദവിയിലേക്ക് എത്തിയിരുന്നു. എന്നാൽ സാദിഖലി ശിഹാബ് തങ്ങൾ നിർവഹിച്ചിരുന്ന മലപ്പുറം മുസ്ലിം ലീഗ് അധ്യക്ഷപദവി പിന്നീട് ഒഴിഞ്ഞു കിടക്കുകയായിരുന്നു. അതിലേക്കാണിപ്പോൾ പാണക്കാട് കുടുംബത്തിൽ നിന്ന് തന്നെ മറ്റൊരു ജില്ലാ അധ്യക്ഷനായി അബ്ബാസലി ശിഹാബ് തങ്ങളെ തിരഞ്ഞെടുത്തത്.
നിലവിൽ അദ്ദേഹം മലപ്പുറം മുസ്ലിം ലീഗ് മണ്ഡലം പ്രസിഡന്റായി പ്രവർത്തിച്ചു വരികയാണ്.
എസ്കെഎസ്എസ്എഫ് സംസ്ഥാന അധ്യക്ഷനായും പ്രവർത്തിച്ചിട്ടുണ്ട്. പാണക്കാട് ഹൈദരലി ശിഹാബ് തങ്ങളുടെ നിര്യാണത്തെ തുടർന്ന് സാദിഖലി ശിഹാബ് തങ്ങൾ അധ്യക്ഷസ്ഥാനത്തേക്ക് എത്തിയതു മുതൽ സാദിഖലി ശിഹാബ് തങ്ങളുടെ പിൻഗാമി ആര് എന്ന ചോദ്യം വലിയ രീതിയിൽ ചർച്ചയായിരുന്നു. ലീഗിൻറെ പൊന്നാപുരംകോട്ട എന്നറിയപ്പെടുന്ന മലപ്പുറം ജില്ലയിൽ പാർട്ടിയെ മികച്ച രീതിയിൽ അബ്ബാസലി ശിഹാബ് തങ്ങൾക്ക് നയിക്കാൻ സാധിക്കും എന്നതുതന്നെയാണ് ലീഗ് നേതാക്കളുടെ പ്രതീക്ഷ.
Topic: Malappuram, Muslim league Malappuram, Abbasali Shihab Thangal