കുഴിയെടുത്തപ്പോൾ ആയിരത്തോളം പുരാതന നാണയങ്ങൾ; കാണാനെത്തിയവർ പെറുക്കിക്കൊണ്ടുപോയി, സംഭവം മലപ്പുറത്ത്

മലപ്പുറം: വെളിയങ്കോട് കെട്ടിട നിർമ്മാണത്തിനായി കുഴിയെടുക്കുന്നതിനിടെ പുരാതന നാണയങ്ങൾ കണ്ടെത്തിയ സംഭവത്തിൽ പുരാവസ്തു വകുപ്പ് അന്വേഷണം നടത്തും. ഇതുമായി ബന്ധപ്പെട്ടു പുരാവസ്തു വകുപ്പിലും ജിയോളജി വകുപ്പിലും വിവരം നൽകിയിട്ടുണ്ട്. ബ്രിട്ടീഷ് ഭരണകാലത്തെ നാണയങ്ങളാണ് ഇവിടെനിന്നു കണ്ടെത്തിയത്. ജെസിബി ഉപയോഗിച്ചു കുഴിയെടുക്കുന്നതിനായി മണ്ണുനീക്കുമ്പോഴാണ് ജെസിബി ഡ്രൈവറായ ഇതര സംസ്ഥാന തൊഴിലാളിയുടെ ശ്രദ്ധയിൽ നാണയങ്ങൾ പെടുന്നത്. ഇന്ത്യയിൽ ബ്രിട്ടീഷ് ഭരണം നിലനിൽക്കുമ്പോഴുള്ള നാണയങ്ങളാണ് കണ്ടെടുത്തത്. വിക്ടോറിയ രാഞ്ജിയുടെ ചിത്രമുള്ള 1893 ലെ ഒരു രൂപ നാണയങ്ങളും 1862, 1863, 1876 തുടങ്ങിയ വർഷങ്ങളിലെ നാണയങ്ങൾ ഉൾപ്പെടെയുള്ള ആയിരത്തോളം നാണയങ്ങളുണ്ടാകുമെന്നാണ് ദൃക്സാക്ഷികൾ പറയുന്നത്.


പുരാതന നാണയങ്ങൾ കണ്ടെത്തിയെന്ന വാർത്ത പരന്നതോടെ സംഭവം കാണാനെത്തിയവർ നാണയങ്ങൾ എടുത്തുകൊണ്ടുപോയി. സലഫി മസ്ജിദിന്റെ ഉടമകൾക്ക് പോലും പേരിനുമാത്രം നാണയങ്ങളാണ് കിട്ടിയത്. കൊച്ചിരാജ്യത്തിന്റെ തലസ്ഥാനമായ വന്നേരിനാടിൽ ഉൾപ്പെടുന്ന പ്രദേശമാണ് വെളിയങ്കോട്.

മലപ്പുറം ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം

Read Latest Local News and Malayalam News