ഫ്ലക്‌സിന് പകരം തെങ്ങോലയും കവുങ്ങിൻ പാളയും; വോട്ടഭ്യർത്ഥന ആലിലയിലും

മലപ്പുറം: വ്യത്യസ്തമായ കളര്‍പ്രിന്റുകളില്‍ വോട്ടഭ്യര്‍ഥിച്ചുള്ള കത്തുകള്‍ കൈമാറുന്ന സ്ഥാനാര്‍ഥികള്‍ക്കിടയില്‍ വ്യത്യസ്തമാവുകയാണ് മഞ്ചേരി നഗരസഭയിലെ 31ാം വാര്‍ഡ് യു ഡി എഫ് സ്ഥാനാര്‍ത്ഥിയായ ശോഭന. ആലിലയില്‍ എഴുതിയാണ് ശോഭന തന്റെ വോട്ടര്‍മാരോട് വോട്ടഭ്യര്‍ഥിക്കുന്നത്. വളരെ കൗതുകകരമാണ് ശോഭനയുടെ വോട്ടഭ്യര്‍ഥന. കേരള സാംസാകാരിക പരിഷത്തിന്റെ മലപ്പുറം ജില്ലാ ജനറല്‍ സെക്രട്ടറിയും സ്ത്രീപഥം സംസ്ഥാന ജനറല്‍ സെക്രട്ടറിയുമായ ശോഭന തന്റെ പ്രചാരണ പ്രവര്‍ത്തനത്തില്‍ ആകമാനം പരിസ്ഥിതിയോടുള്ള സ്‌നേഹം വിളമ്പാന്‍ശ്രമിക്കുന്നുണ്ട്.

Also Read: 'സ്ഥാനാർഥികൾ വരും പോകും, ചിലർ ജയിക്കും ചിലർ തോൽക്കും... ശ്രദ്ധിച്ചില്ലെങ്കിൽ കൊറോണ വരും'; വൈറലായി ഹാസ്യചിത്രം

ഫ്ളക്സ് ബോര്‍ഡുകള്‍ ഉപയോഗിച്ച് പലരും കൂറ്റന്‍ ബോര്‍ഡുകളും ബാനറുകളും സ്ഥാപിക്കുമ്പോള്‍ ശോഭന പ്രചാരണത്തിനായി ഉപയോഗിക്കുന്നത് തെങ്ങോലയും കവുങ്ങിന്‍ പാളയും കരിമ്പനയോലയുമാണ്. പ്രവര്‍ത്തകര്‍ക്ക് ദാഹ ശമനിയായി നല്‍കുന്നതാകട്ടെ സംഭാരം, ശര്‍ക്കര ചുക്ക് വെള്ളം, ജാപ്പി തുടങ്ങിയവയവും. അതോടൊപ്പം തന്നെ വീടുകള്‍ സന്ദര്‍ശിക്കുന്ന സമയത്ത് വോട്ടഭ്യര്‍ത്ഥനയോടൊപ്പം വീട്ടുവളപ്പില്‍ ഫല വൃക്ഷ തൈകളും തണല്‍മരവും വെച്ച് പിടിപ്പിക്കലിന്റെ പ്രാധാന്യവും പരിസര ശുചീകരണം എന്നിവയെ കുറിച്ചും ശോഭന ക്ലാസെടുക്കുന്നുണ്ട് . കേരള സാംസ്‌കാരിക പരിഷത്ത് പ്രവര്‍ത്തകരും സ്ഥാനാര്‍ത്ഥിക്കൊപ്പം സജീവമാണ്. സംസ്ഥാന സെക്രട്ടറി പി. ഷംസുദീന്‍, കോ-ഓര്‍ഡിനേറ്റര്‍ പി.കെ സത്യപാലന്‍, ജില്ലാ പ്രസിഡന്റ് അഡ്വ. വി പി വിപിന്‍ നാഥ്, ഗാന്ധി മിത്ര സംസ്ഥാന സെക്രട്ടറി മുകുന്ദന്‍ മേലേടത്ത്, ഡി. ഹരിഹരന്‍, സി കെ ഗോപാലന്‍ എന്നിവര്‍ തങ്ങളുടെ സഹപ്രവര്‍ത്തകയായ സ്ഥാനാര്‍ത്ഥിക്കു വേണ്ടി സജീവമാണ്. എല്‍.ഡി.എഫിന്റെ ഇ ശ്രീദേവിയാണ് ശോഭനയുടെ എതിരാളി. മുമ്പും ശോഭന തെരഞ്ഞെടുപ്പില്‍ മ്ത്സരിച്ചിട്ടുണ്ടെങ്കിലും വിജയിക്കാനായിട്ടല്ല.