കണ്ണിൽ മുളക്പൊടി വിതറി കൈകാലുകള്‍ കെട്ടി, കഴുത്തില്‍ മുണ്ടു മുറക്കി അരുംകൊല! കോട്ടക്കൽ സീതാ വധത്തിൽ ശിക്ഷ ഈ മാസം 9 ന് വിധിക്കും

മലപ്പുറം: മലപ്പുറം കോട്ടക്കലിലെ വീട്ടില്‍ തനിച്ചു താമസിക്കുകയായിരുന്ന 80കാരിയായ വയോധികയുടെ കണ്ണിലേക്ക് മുളക്പൊടി വിതറിയശേഷം കൈകാലുകള്‍ കെട്ടിയിട്ട് കഴുത്തില്‍ മുണ്ടു മുറക്കി കൊലപ്പെടുത്തിയ കേസിലെ പ്രതി കുറ്റക്കാരന്‍ തന്നെയാണെന്ന് കോടതി. ശിക്ഷാവിധ ഈ മാസം ഒൻപതിന് പ്രസ്താവിക്കുമെന്നും മഞ്ചേരി അഡീഷണല്‍ ജില്ലാ സെഷന്‍സ് കോടതി. 2013 ഒക്ടോബര്‍ 15 ന് രാവിലെ ആറരയ്ക്ക് കോട്ടക്കല്‍ ചുടലപ്പറമ്പ് പുതുപറമ്പ് സീത (80) യെ കഴുത്തുഞെരിച്ച് കൊലപ്പെടുത്തിയ കേസില്‍ അറസ്റ്റിലായ പ്രതി അബ്ദുള്‍ സലാം(39) തന്നെയാണ് കൊലപാതകം നടത്തിയതെന്ന് കോടതി കണ്ടെത്തി.

Also Read: കൊറോണക്കാലത്തെ തെരഞ്ഞെടുപ്പ്; ചിഹ്നം ഇനി മാസ്‌ക് പറയും! സ്ഥാനാര്‍ഥികള്‍ വീടുകള്‍ കയറിത്തുടങ്ങി, പ്രചാരണത്തിനു കരുത്ത് പകർന്ന് ഗ്രൂപ്പുകളും

അയല്‍വാസിയായ പ്രതി വീടിൻ്റെ ജനലഴി മുറിച്ചുമാറ്റി അകത്ത് കടന്ന് സീതയെ കൈകാലുകള്‍ കൂട്ടികെട്ടി വായില്‍ തുണി തിരുകി കഴുത്തു ഞെരിച്ച് കൊലപ്പെടുത്തുകയായിരുന്നു. വയോധിക കാതിലും മൂക്കിലുമണിഞ്ഞ സ്വര്‍ണാര്‍ഭരണങ്ങള്‍ കവര്‍ച്ച ചെയ്തതായും തെളിവു നശിപ്പിക്കുന്നതിനായി സംഭവ സ്ഥലത്ത് മുളക് പൊടി വിതറിയതായും അന്വേഷണ സംഘം കണ്ടെത്തിയിരുന്നു. ആദ്യം കോട്ടക്കല്‍ പോലീസ് അന്വേഷിച്ച കേസ് പിന്നീട് ക്രൈം ബ്രാഞ്ച് ഏറ്റെടുക്കുകയായിരുന്നു.

Also Read: അരീക്കോടും പരിസരപ്രദേശങ്ങളിലും തെരുവുനായ് ശല്യം രൂക്ഷം, നടപടിയെടുക്കാതെ അധികൃതർ

അബ്ദുള്‍ സലാമിനെ കുറിച്ച് പോലീസിനു സംശയമുണ്ടായിരുന്നു. കൊലപാതകത്തെ തുടര്‍ന്നു സീതയുടെ വീട്ടില്‍ നിന്നും ശേഖരിച്ച വിരലടയാളവും അബ്ദുള്‍ സലാമിന്റെ വിരലടയാളവും പോലീസ് പരിശോധിച്ചു. എട്ടുമാസത്തെ അന്വേഷണത്തിനിടെ അബ്ദുള്‍ സലാമിനെ കണ്ടെത്താന്‍ പോലീസിനു കഴിഞ്ഞില്ല. തുടര്‍ന്നാണ് കേസ് ക്രൈം ബ്രാഞ്ചിനു കൈമാറിയത്. സിഐ ശിവകുമാര്‍ അന്വേഷണം നടത്തി പ്രതിയെ അറസ്റ്റ് ചെയ്യുകയും സിഐ ആര്‍ എല്‍ ഷൈജു കുറ്റപത്രം സമര്‍പ്പിക്കുകയും ചെയ്തു. 58 സാക്ഷികളുള്ള കേസില്‍ പ്രോസിക്യൂഷനു വേണ്ടി അഡീഷണല്‍ ജില്ലാ പബ്ലിക് പ്രോസിക്യൂട്ടര്‍ അഡ്വ. സി വാസു ഹാജരായി.

മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ