നീറ്റ് പരീക്ഷയിൽ മികച്ച റാങ്ക്, വൈകല്യമുള്ളതിനാൽ അഡ്‌മിഷനില്ല; ഇടപെട്ട് ഹൈക്കോടതി, സ്വപ്നസാക്ഷാത്കാരമെന്ന് അശ്വതി

മലപ്പുറം: കരുവാരക്കുണ്ട് സ്വദേശി അശ്വതിക്ക് വൈകല്യത്തെ പൊരുതി തോൽപ്പിച്ചാണ് ഈ വർഷത്തെ എംബിബിഎസിന് പ്രവേശനം ലഭിച്ചത്. എന്നാൽ പ്രവേശന പരീക്ഷ പാസായിട്ടും അശ്വതിക്ക് മെഡിക്കൽ ബോർഡ് പ്രവേശനം നിഷേധിച്ചിരുന്നു. വലതു കൈക്ക് സ്വാധീനക്കുറവ് ഉണ്ട് എന്ന് ചൂണ്ടിക്കാട്ടിയാണ് മെഡിക്കൽ ബോർഡ് അശ്വതിക്ക് പ്രവേശനം നിഷേധിച്ചത്. മഞ്ചേരി മെഡിക്കൽ മെഡിക്കൽ കോളേജിൽ ആണ് അശ്വതിക്ക് പ്രവേശനം ലഭിച്ചത്. പ്രവേശനം നിഷേധിച്ചതിനെ തുടർന്ന് അശ്വതിയും കുടുംബവും ഹൈക്കോടതിയെ സമീപിച്ചു.

Also Read: മണൽക്കടത്ത് വാഹനത്തെ പിന്തുടർന്ന് പോലീസ്; ഭയന്നോടിയ യുവാവ് കിണറ്റിൽ വീണ് മരിച്ചു, സംഭവം മലപ്പുറത്ത്

എംബിബിഎസ് പ്രവേശനത്തിനുള്ള അവസാന തീയതി ഈമാസം ഏഴിന് കഴിഞ്ഞു. അതിനാൽ, മറ്റൊരു മെഡിക്കൽ ബോർഡ് ഇനി പരിശോധന നടത്താനുള്ള സാഹചര്യം നിലനിൽക്കുന്നില്ലെന്ന് ഹൈക്കോടതി വിലയിരുത്തി. എന്നാൽ, മഞ്ചേരി മെഡിക്കൽ കോളേജിൽ തന്നെ അശ്വതിക്ക് പ്രവേശനം നൽകണമെന്ന് കോടതി നിർദേശം നൽകി. നീറ്റ് പരീക്ഷയിൽ പ്രത്യേക വിഭാഗത്തിൽ 556 ാം റാങ്ക് നേടിയ മലപ്പുറം കരുവാരകുണ്ട് കക്കറ സ്വദേശി മുരളീധരന്‍റെ മകളാണ് അശ്വതി.

Also Read: കരിപ്പൂരില്‍ വീണ്ടും സ്വര്‍ണക്കടത്ത്; 2 പേര്‍ പിടിയില്‍

സാമ്പത്തിക, ശാരീരിക പ്രയാസങ്ങളെ മറികടന്നാണ് അശ്വതി ഈ വർഷം എംബിബിഎസിന് പ്രവേശനം നേടിയത്. സെറിബ്രൽ പാൾസി മൂലം ജന്മനാ കാലുകൾക്കും വലത് കൈക്കും ശേഷിക്കുറവ് ഉണ്ടായിരുന്നു. അതുകൊണ്ടുതന്നെ പഠിച്ചതും എഴുതിയതും എല്ലാം ഇടത് കൈ കൊണ്ട് ആയിരുന്നു.ഇത്തവണ നീറ്റ് പരീക്ഷയിൽ സംസ്ഥാന റാങ്ക് ലിസ്റ്റിൽ 17 ാം റാങ്കും അശ്വതി സ്വന്തമാക്കിയിരുന്നു . കഴിഞ്ഞ തിങ്കളാഴ്ചയാണ് അശ്വതിക്ക് അനുകൂലമായി കോടതിവിധി വന്നത്. തന്‍റെ ജീവിതത്തിലെ ഏറ്റവും വലിയ സ്വപ്നമായ എംബിബിഎസ് നേടിയെടുക്കാൻ കഴിയുമെന്ന പൂർണമായ പ്രതീക്ഷയിലാണ് അശ്വതിയും കുടുംബവും.