ചരക്കുലോറിയില്‍ ബൈക്കിടിച്ച് യുവാവ് മരിച്ചത് കഞ്ചാവ് കടത്തുന്നതിനിടെ; സംഭവം പൊന്നാനിയിൽ! സുഹൃത്തിനും പരിക്ക്

മലപ്പുറം: ചരക്കുലോറിയില്‍ ബൈക്കിടിച്ച് കാസര്‍കോട്ടുകാരന്‍ മലപ്പുറത്ത് മരിച്ചത് ബൈക്കില്‍ കഞ്ചാവ് കടത്തുന്നതിനിടെ. മലപ്പുറം പൊന്നാനി വെളിയങ്കോടിന് സമീപം നിര്‍ത്തിയിട്ട ചരക്കുലോറിയില്‍ ബൈക്കിടിച്ചാണ് കാസര്‍കോട് ഉപ്പള സ്വദേശിയായ മുഹമ്മദ് റഷീദ് (28) മരിച്ചത്. നാല് കിലോ കഞ്ചാവുമായി ബൈക്കില്‍ യാത്ര ചെയ്യുന്നതിനിടയിലാണ് യുവാവ് മരണപ്പെട്ടത്.

Also Read: കോഴിക്കോട് ഒരാള്‍ക്ക് കൂടി കൊവിഡ് -19; രോഗം സ്ഥിരീകരിച്ചത് മുംബൈയിൽ നിന്നെത്തിയ അരിക്കുളം സ്വദേശിക്ക്!

കാസര്‍കോട് ഉപ്പള സ്വദേശിയും സൃഹൃത്തുമായ ജമാലുമൊത്തായിരുന്നു ബൈക്കില്‍ കഞ്ചാവ് കടത്തിയിരുന്നത്. ഇതിനിടയിലാണ് ഇന്ന് പുലര്‍ച്ചെ 1:30 മണിക്ക് പെരുമ്പടപ്പ് പോലീസ് സ്റ്റേഷന്‍ പരിധിയിലെ പുത്തിയിരുത്തിയില്‍ വെച്ച് അപകടമുണ്ടായത്. പുതിയിരുത്തിയില്‍ നിര്‍ത്തിയിട്ടിരുന്ന ചരക്ക് ലോറിയില്‍ യുവാക്കള്‍ സഞ്ചരിച്ച ബൈക്ക് ഇടിക്കുകയായിരുന്നു. ലോറിയില്‍ ഇടിച്ചതിനെ തുടര്‍ന്ന് ഗുരുതരമായി പരിക്കേറ്റ റഷീദിനെ തൃശൂര്‍ അശ്വിനി ഹോസ്പിറ്റലിലേക്ക് കൊണ്ട് പോകുന്ന വഴിയില്‍ മരണപ്പെടുകയായിരുന്നു. കൂടെ ഉണ്ടായിരുന്ന ജമാല്‍ പരിക്കുകളോടെ ചികിത്സയിലാണ്.

Also Read: കൊവിഡ് ഭീതിയില്‍ കരിപ്പൂരില്‍ മാത്രം ഇതുവരെ പറന്നിറങ്ങിയത് 1343 പ്രവാസികള്‍, രണ്ടാം ഘട്ടത്തില്‍ മൂന്ന് വിമാനങ്ങള്‍, കൂടുതലറിയാം...

എറണാകുളത്ത് നിന്ന് കാസര്‍കോട് വരികയായിരുന്ന ബൈക്കാണ് പുതിയിരുത്തിയില്‍ നിര്‍ത്തിയിട്ട ചരക്കു ലോറിയില്‍ ഇടിച്ചത്. ലോറി ബൈക്ക് യാത്രികരുടെ ശ്രദ്ധയില്‍ പെടാതെ പോയതാണ് അപകടകാരണമെന്നാണ് സൂചന. മുഹമ്മദ് റഷീദിന് ലോറിയില്‍ തലയിടിച്ച് ഗുരുതരമായി പരിക്കേറ്റിരുന്നു. ശബ്ദംകേട്ട് ഓടിയെത്തിയെ നാട്ടുകാരാണ് യുവാക്കളെ ആശുപത്രിയില്‍ എത്തിച്ചത്. പോസ്റ്റുമോര്‍ട്ടത്തിന് ശേഷം നാളെ വൈകീട്ട് മൃതദേഹം നാട്ടിലേക്ക് കൊണ്ടുപോകും.

Also Read: വയനാട്ടില്‍ 3005 പേര്‍ നിരീക്ഷണത്തില്‍; മുത്തങ്ങ അതിര്‍ത്തി കടന്നെത്തിയത് 8706 ആളുകള്‍, 94 പ്രവാസികളും നാട്ടിലെത്തി