പോസ്റ്റില്‍ കയറി വൈദ്യുതി ലൈന്‍ മാറ്റിസ്ഥാപിക്കുന്നതിനിടെ കരാര്‍ ജീവനക്കാരന്‍ ഷോക്കേറ്റ് മരിച്ചു

മലപ്പുറം: വൈദ്യുതി പോസ്റ്റിലെ ജോലിചെയ്യുന്നതിനിടെ 40കാരനായ കെഎസ്ഇബി കരാര്‍ ജീവനക്കാരന്‍ ഷോക്കേറ്റ് മരിച്ചു. പോസ്റ്റില്‍ കയറി വൈദ്യുതി ലൈന്‍ മാറ്റിക്കെട്ടുന്നതിനിടെ മലപ്പുറം പാണ്ടിക്കാട് ചെമ്പ്രശേരി കൊടശേരി മരാട്ടപ്പടിയിലെ എറിയാടന്‍ കുഞ്ഞാറയുടെ മകന്‍ അബ്ദുല്‍ മുനീര്‍(40) ആണ് മരിച്ചത്. ഇന്ന് ഉച്ചയോടെ ദേശീയപാത ഐക്കരപ്പടി കുറിയോടം ഐസ് പ്ലാന്റിന് സമീപമാണ് അപകടം നടന്നത്.

Also Read: കാട്ടിലെ പാറ പൊട്ടിച്ച് അനധികൃതമായി സ്വര്‍ണം അരിച്ചെടുക്കാന്‍ ശ്രമം; 3 പേര്‍ പിടിയിൽ

വൈദ്യുതി ലൈനിലെ പ്രവൃത്തിക്കിടെയാണ് അപകടം. ദിവസങ്ങളായി പ്രദേശത്ത് വൈദ്യുത ലൈന്‍ മാറ്റി സ്ഥാപിക്കുന്ന പ്രവൃത്തികള്‍ നടന്നുവരികയാണ്. വൈദ്യുതി തൂണിന് മുകളില്‍ നിന്ന് ജോലി ചെയ്യുന്നതിനിടെയാണ് ഷോക്കേറ്റത്. ഇതോടെ മുനീര്‍ വൈദ്യുതി കമ്പിക്കിടയില്‍ കുരുങ്ങി കുടുങ്ങി വീണു. ഓടിക്കൂടിയ നാട്ടുകാരും മറ്റു തൊഴിലാളികളും ചേര്‍ന്ന് ഏറെ ഇറക്കി ഉടനെ കോഴിക്കോട് മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഭാര്യ: ഷബ്ന. മക്കള്‍:അജ്വിദ്, അജ്ന.

മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ