മരത്തില്‍ നിന്ന് വീണ് ജീവന്‍ തിരിച്ച് കിട്ടിയത് 4 തവണ! ജീവിക്കാനായി ബേബി കൈവിട്ട തൊഴിലിനിറങ്ങിയിട്ട് 44 വര്‍ഷം

മലപ്പുറം: ചങ്ങരംകുളം ആലംകോട് ചിയ്യാനൂര്‍ സ്വദേശിയായ കക്കാട്ട് പറമ്പില്‍ ബേബിക്ക് മരത്തില്‍ നിന്നും വീണ് ജീവന്‍ തിരിച്ചുകിട്ടിയത് നാലു തവണയാണ്. എന്നാലും കുടുംബം പോറ്റാന്‍ മറ്റു ജോലികളൊന്നും തരപ്പെടാത്തതുകൊണ്ടുതന്നെ ജീവിക്കാനായി വീണ്ടും കൈവിട്ട തൊഴിലില്‍ ഇറങ്ങിയിട്ട് 44 വര്‍ഷം തികയുന്നു.

Also Read: പേപ്പറിയും ക്യാന്‍വാസിലും മാത്രമല്ല, കൂണുകളിലും വര്‍ണ്ണ വിസ്മയം തീര്‍ക്കാം... സോഷ്യല്‍ മീഡിയയില്‍ താരമായി മലപ്പുറം സ്വദേശി

കമുകുകളും തെങ്ങും കയറി ശീലിച്ച ബേബി 14-ാമത്തെ വയസില്‍ തുടങ്ങിയതാണ് മരം കയറ്റവും മരം മുറിയും. 44 വര്‍ഷത്തെ ജീവിതം പണയം വെച്ച തൊഴില്‍ ജീവിതത്തില്‍ മരത്തില്‍ നിന്ന് വീണത് നാല് തവണയാണ്. അപകടത്തില്‍ നിന്നെല്ലാം ജീവന്‍ തിരിച്ച് കിട്ടിയത് തലനാരിഴക്കാണ്. ആരും കയറാനും മുറിക്കാനും ഭയപ്പെടുന്ന പടുകൂറ്റന്‍ മരങ്ങളും ബേബിയുടെ കോടാലിക്ക് വഴങ്ങും. കാറ്റിലും മഴയിലും റോഡില്‍ വീഴുന്ന മരങ്ങള്‍ മുറിച്ച് മാറ്റാനും പ്രദേശത്തുകാര്‍ക്ക് ബേബി ആശ്രയമാണ്. ഒരു കണ്ണിന് കാഴ്ചയില്ലാതെയാണ് ബേബി 58 മത്തെ വയസിലും ഈ കൈവിട്ട ജോലി ചെയ്യുന്നതെന്ന് സഹപ്രവര്‍ത്തര്‍ക്ക് പോലും ഇപ്പോഴും അറിയില്ല.

Also Read: പകുതി വിലക്ക് തയ്യൽ മെഷീനുകൾ വാഗ്ദാനം ചെയ്ത് തട്ടിപ്പ്; ഇരയായത് നൂറുകണക്കിന് സ്ത്രീകൾ! സംഭവം മലപ്പുറത്ത്

വീടുകള്‍ക്കും കെട്ടിടങ്ങള്‍ക്കും ഇടയില്‍ അപകടകരമായ രീതിയില്‍ നില്‍ക്കുന്ന പടുകൂറ്റന്‍ വൃക്ഷങ്ങള്‍ വരെ ബേബി പ്രയാസം കൂടാതെ മുറിച്ച് മാറ്റുന്നത് കാണുമ്പോള്‍ കണ്ട് നില്‍ക്കുന്നവര്‍ക്ക് തന്നെ അത്ഭുതം തോന്നും. മരങ്ങളുടെ പ്രായം അറിയുന്നതിനും തോത് അറിയുന്നതിനും പ്രദേശത്തെ പലരും ആശ്രയിക്കുന്നതും ബേബിയെ തന്നെയാണ്. കര്‍ഷകര്‍ക്ക് തൊഴിലെടുക്കാനാവശ്യമായ ഉപകരണങ്ങള്‍ പഞ്ചായത്തുകള്‍ വിവിധ പദ്ധതികളില്‍ ഉള്‍പ്പെടുത്തി നല്‍കാറുണ്ടെങ്കിലും ജീവന്‍ പണയം വെച്ച് ഉയരങ്ങളില്‍ കയറി വിളകള്‍ പറിച്ചെടുക്കുന്ന തെങ്ങ്, കഴുങ്ങ് കയറ്റ തൊഴിലാളികള്‍ക്ക് അധികൃതര്‍ ഒരു പരിഗണനയും ഇത് വരെ നല്‍കിയിട്ടില്ലെന്ന പരിഭവം ബേബി പങ്ക് വെക്കുന്നു.


മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ