മലപ്പുറത്ത് ക്ഷേത്രത്തിൻ്റെ പൂട്ടുതകര്‍ത്ത് പണം മോഷ്ടിച്ച സംഭവം; പ്രതി അറസ്റ്റില്‍

മലപ്പുറം: മലപ്പുറം രാമപുരം ശ്രീരാമ ക്ഷേത്രത്തിൻ്റെ പൂട്ടുതകര്‍ത്തു പണവും മറ്റും മോഷ്ടിച്ച പ്രതി അറസ്റ്റില്‍. ചെത്തല്ലൂര്‍ ആനക്കുഴി വീട്ടില്‍ ശ്രീകുമാറി (30) നെയാണ് പെരിന്തല്‍മണ്ണ എഎസ്പി എം ഹേമലതയുടെ നിര്‍ദേശ പ്രകാരം കൊളത്തൂര്‍ സിഐ പി എം ബഷീറും എസ്‌ഐ മുഹമ്മദ് ബഷീറും അടങ്ങുന്ന സംഘം അറസ്റ്റു ചെയ്തത്.

Also Read: മലപ്പുറത്ത് ഹോം ക്വാറൻ്റൈനിൽ കഴിഞ്ഞിരുന്ന 35 കാരന്‍ മരിച്ചു

ഇക്കഴിഞ്ഞ 30നു രാത്രിയാണ് രാമപുരം ശ്രീരാമക്ഷേത്രത്തിലും സമീപത്തെ ശിവക്ഷേത്രം, ശ്രീകൃഷ്ണ ക്ഷേത്രം എന്നിവയിലും മേലേ അരിപ്രയിലെ ചില വീടുകളിലും മോഷണവും മോഷണ ശ്രമവും നടന്നത്. തുടര്‍ന്നു ജില്ലാ പോലീസ് മേധാവി യു അബ്ദുള്‍ കരീമിൻ്റെ നിര്‍ദേശ പ്രകാരം പെരിന്തല്‍മണ്ണ എഎസ്പിയുടെ നേതൃത്വത്തില്‍ പ്രത്യേകസംഘം ഈ കേസ് അന്വേഷിക്കുകയായിരുന്നു.

Also Read: 35 പേര്‍ക്ക് വെള്ളിയാഴ്ച മലപ്പുറത്ത് കൊവിഡ് സ്ഥിരീകരിച്ചു, ജില്ലയില്‍ 254 പേര്‍ ചികിത്സയില്‍, 10 പേര്‍ക്ക് രോഗം ഭേദമായി!

സംഭവ സ്ഥലത്തും സമീപത്തെ സിസിടിവി ദൃശ്യങ്ങളും ഫിംഗര്‍ പ്രിന്റും ശേഖരിച്ചു അടുത്തിടെ ജയിലില്‍ നിന്നു പുറത്തിറങ്ങിയ പ്രതികളെ കേന്ദ്രീകരിച്ചു നടത്തിയ അന്വേഷണത്തിലാണ് ഇയാളെക്കുറിച്ചു സൂചന ലഭിച്ചത്. തുടര്‍ന്നു ശ്രീകുമാറിനെ പെരിന്തല്‍മണ്ണയില്‍ വെച്ച് പിടികൂടുകയായിരുന്നു. ഇയാളെ കൂടുതല്‍ ചോദ്യം ചെയ്തതില്‍ നിന്നു പെരിന്തല്‍മണ്ണ സ്‌റ്റേഷന്‍ പരിധിയിലെ ചീരട്ടാണമണ്ണയിലും മനഴി ബസ് സ്റ്റാന്‍ഡ് പരിസരത്തെ ആള്‍ താമസമില്ലാത്ത വീടുകളില്‍ നടന്ന മോഷണത്തിനും മേലേ അരിപ്രയിലെ വീട്ടില്‍ നിന്നു ജനാലയ്ക്കു സമീപം വച്ചിരുന്ന 50,000 രൂപ, ഐഫോണ്‍, മറ്റൊരു മൊബൈല്‍ ഫോണ്‍ ഉള്‍പ്പെടെ നിരവധി മോഷണഷത്തിനും മോഷണ ശ്രമത്തിനും തുമ്പുണ്ടാക്കാന്‍ കഴിഞ്ഞതായി അന്വേഷണ സംഘം അറിയിച്ചു.

Also Read: വയനാടന്‍ കാടുകളില്‍ മൂന്നിനം പുതിയ ചിലന്തികളെ കണ്ടെത്തി! ബത്തേരിയിൽ കണ്ടെത്തിയതിന് 'ബത്തേരിയെന്‍സിസ്' എന്ന് പേര്!!

പ്രതിയെ സംഭവസ്ഥലത്തു കൊണ്ടുപോയി തെളിവെടുപ്പു നടത്തുമെന്നു എഎസ്പി എം ഹേമലത പറഞ്ഞു. പ്രത്യേക അന്വേഷണ സംഘങ്ങളായ ജില്ലാ ആൻ്റി നാര്‍ക്കോട്ടിക് സ്‌ക്വാഡിലെ സി പി മുരളി, ടി ശ്രീകുമാര്‍, എന്‍ ടി കൃഷ്ണകുമാര്‍, എം മനോജ്കുമാര്‍, സിപിഒമാരായ ശ്രീജിത്ത്, ഷംസുദീന്‍, അഡീഷണല്‍ എസ്‌ഐ റെജിമോന്‍ ജോസഫ് എന്നിവര്‍ ചേര്‍ന്നാണ് പ്രതിയെ പിടൂകൂടിയത്.