മലപ്പുറം: ഗള്ഫില്നിന്നും ഒരുകിലോ സ്വര്ണം നികുതിവെട്ടിച്ച് കടത്തിയാല് ലാഭം 4 ലക്ഷം രൂപ. ഇറക്കുമതി തീരുവ നല്കാതെ കള്ളക്കടത്തിലൂടെ സ്വര്ണമെത്തിക്കുമ്പോള് ഇത്തരത്തില് വന് ലാഭമാണ് ലഭിക്കുന്നത്. സ്വര്ണം കടത്തുന്ന കാരിയര്മാരില് ഭൂരിഭാഗവും സാധാരക്കാരായാണ് പ്രവാസികളാണ്. കഴിഞ്ഞ ദിവസം കരിപ്പൂരില് 40ലക്ഷംരൂപയുടെ സ്വര്ണവുമായി പിടിയിലായ കോഴിക്കോട്ടുകാരന് മുബീറിന് സ്വര്ണക്കടത്ത് മാഫിയ ഓഫര് ചെയ്തത് കാല്ലക്ഷവും വിമാന ടിക്കറ്റുമാണ്.
അടിവസ്ത്രത്തിനുള്ളില് പിറകുവശത്തായി 1135 ഗ്രാം തൂക്കം വരുന്ന സ്വര്ണ മിശ്രിതം ഒളിപ്പിച്ചുവെച്ചാണ് മുബീര് കടത്താന് ശ്രമിച്ചത്. കരിപ്പൂരില് വിമാനമിറങ്ങിയാല് സ്വര്ണക്കടത്ത് സംഘത്തിന്റെ മറ്റൊരു കണ്ണി ഫോണില് ബന്ധപ്പെടുമെന്നാണ് പറഞ്ഞത്. ഇയാളുടെ കുറിച്ചുള്ള ചില അടയാളങ്ങളും സ്വര്ണക്കടത്ത് സംഘം നല്കിയിരുന്നു. സ്വര്ണം കൈമാറുന്ന സമയത്ത് പറഞ്ഞുറപ്പിച്ച തുകയോടൊപ്പം വിമാനടിക്കറ്റിന്റെ പണവും കൈമാറാമെന്നായിരുന്നു ഓഫര്.
Also Read: ആംബുലൻസിൽ നിന്ന് രക്ഷപെടാൻ ശ്രമിച്ച കൊവിഡ് ലക്ഷണമുള്ള യുവാവിനെ ഡ്രൈവർ കീഴ്പ്പെടുത്തി; പ്രവാസിയുടെ പരാക്രമം ആലുവയിൽ!!
കൊവിഡ് കാലമായതോടെ നാട്ടില്പോകാനായി അന്വേഷിക്കുന്ന സമയത്താണ് സമയത്താണ് തന്റെ ഒരു സുഹൃത്തുവഴി സ്വര്ണക്കടത്ത് സംഘം തന്നെ ബന്ധപ്പെട്ടതെന്നും മുബീര് കസ്റ്റംസ് അധികൃതരുടെ ചോദ്യംചെയ്യലില് പറഞ്ഞു. തുടര്ന്നാണ് ഇവര് പറഞ്ഞതുപ്രകാരം അടിവസ്ത്രത്തിന്റെ പിറകുവശത്തായി സ്വര്ണമിശ്രിതം ഒളിപ്പിച്ചുവെക്കുന്ന രീതി പറഞ്ഞുകൊടുത്തത്. ഇത്തരത്തില് നിരവധിപേര് സ്വര്ണം കടത്തുന്നുണ്ടെന്നും ഒരിക്കലും പിടിക്കപ്പെടില്ലെന്ന് ധൈര്യവും നല്കിയതോടെയാണ് സാമ്പത്തിക പ്രയാസംകൂടി കണക്കിലെടുത്ത് താന് സ്വര്ണം കടത്താന് ശ്രമിച്ചതെന്നാണ് മുബീറിന്റെ മൊഴി.
അതേ സമയം ഏകദേശം 50 ലക്ഷംരൂപയുടെ സ്വര്ണം അരപ്പട്ടരൂപത്തില് ശരീരത്തില് ചുറ്റി കടത്താന് ശ്രമിച്ച മലപ്പുറം സ്വദേശി അജ്മലിന് സ്വര്ണക്കടത്ത് സംഘം ഓഫര് ചെയ്തത് 30,000രൂപയാണ്. കൊവിഡ് പടരുന്ന സാഹചര്യത്തില് നാട്ടിലേക്ക് മടങ്ങാന് തീരുമാനിക്കുകയായിരുന്നു. സാമ്പത്തിക ബുദ്ധിമുട്ട് മൂലമാണ് ഓഫര് സ്വീകരിച്ചതെന്നാണ് ഇയാളുടെ മൊഴി.
Also Read: മലപ്പുറത്ത് ഇന്ന് 46 പേര്ക്ക് ഇന്ന് കൊവിഡ്; സമ്പര്ക്കത്തിലൂടെ 7 പേര്ക്ക്
1595 ഗ്രാം തൂക്കം വരുന്ന സ്വര്ണ മിശ്രിതം അരയില് അരപ്പട്ട പോലെ കെട്ടി വച്ച രൂപത്തില് ആയിരുന്നു അജ്മലില്നിന്നും സ്വര്ണം കണ്ടെടുത്തത്. സമാനമായ രീതിയിലാണ് കഴിഞ്ഞ ദിവസങ്ങളിലായി കരിപ്പൂരില് സ്വര്ണവുമായി പിടിയിലായവരുടെ മൊഴികളെന്ന് കാരിയര്മാരെ ചോദ്യംചെയ്ത കസ്റ്റംസ് അധികൃതര് പറഞ്ഞു. സ്വര്ണത്തിന് തൂക്കം കൂടുതലുണ്ടെങ്കില് തുക വര്ധിപ്പിച്ചു നല്കും. സാമ്പത്തിക പ്രയാസം മൂലം നാട്ടില് വരുന്നവരാണെങ്കില് സൗജന്യ ടിക്കറ്റും ചെറിയ തുകയും നല്കും.