മലപ്പുറം: 2019 ഓഗസ്റ്റ് എട്ടിന് രാത്രി 7.45നാണ് പോത്തുകല് പഞ്ചായത്തിലെ കവളപ്പാറയില് മുത്തപ്പന് കുന്നില് ഉരുള്പൊട്ടല് ഉണ്ടാവുകയും മൂന്ന് ഭാഗങ്ങളിലായി 50 ഏക്കറോളം സ്ഥലത്തെ 37 ഓളം വീടുകള് മണ്ണിനടിയില്പെടുകയും 59 പേരെ കാണാതാവുകയും ചെയ്തത്.
തുടര്ന്ന് സൈന്യവും ഫയര് ഫോഴ്സും ദുരന്ത നിവാരണ സേനയും പോലീസും സംയുക്തമായി ചേര്ന്ന് 21 ദിവസത്തോളം നടത്തിയ തിരച്ചിലിനൊടുവിലാണ് മണ്ണിനടിയില് നിന്നും മൃതദേഹങ്ങള് കണ്ടെത്തിയത്. ഒരു ജവാന്റേതുള്പ്പെടെ 49 മൃതദേഹങ്ങളാണ് പുറത്തെടുത്തത്. കാണാതായ ബാക്കിയുള്ളവര് ഇന്നും കവളപ്പാറയുടെ നൊമ്പരമാണ്.
Also Read: കരിപ്പൂരിലെ വിമാനാപകടം നിര്ഭാഗ്യകരമെന്ന് മുഖ്യമന്ത്രി; മരിച്ചവരുടെ കുടുംബങ്ങള്ക്ക് 10 ലക്ഷം ധനസഹായം
കഠിന പരിശ്രമത്തിലൂടെ വെല്ലുവിളികളെ അതിജീവിച്ച് തിരച്ചില് നടത്തിയെങ്കിലും അവശേഷിക്കുന്ന 11 പേരുടെ മൃതദേഹങ്ങള് കണ്ടെത്താന് സാധിച്ചിരുന്നില്ല. ബന്ധുക്കളുടെ നിര്ബന്ധപ്രകാരം തിരച്ചില് തുടര്ന്നെങ്കിലും 21-ാമത്തെ ദിവസം തിരച്ചില് അവസാനിപ്പിക്കുകയായിരുന്നു. തുടര്ന്ന് ജില്ലാ ഭരണകൂടം ദുരന്തത്തില് 49 പേര് മരിക്കുകയും 11 പേരെ കാണാതാവുകയും ചെയ്തതായി പ്രഖ്യാപിക്കുകയായിരുന്നു.
അപകടത്തിന് മുമ്പ് മൂന്ന് ദിവസം തുടര്ച്ചയായി അനുഭവപ്പെട്ട കാറ്റിലും മഴയിലും പ്രദേശത്തെ വൈദ്യുതി ബന്ധവും വാര്ത്താ വിനിമയ സംവിധാനങ്ങളും തകരാറിലായിരുന്നു. അതുകൊണ്ട് തന്നെ അപകടം നടന്ന് ഒരു ദിവസത്തിന് ശേഷമാണ് വിവരം പുറംലോകം അറിയുന്നത്. ദുരന്തത്തിന്റെ ഞെട്ടലില് നിന്നും ഇനിയും പൂര്ണമായി മുക്തരായിട്ടില്ല കവളപ്പാറ നിവാസികള്.