മലപ്പുറം: നരേന്ദ്ര മോദി സർക്കാറിനെതിരെ വർത്തമാന കാല ഇന്ത്യയിൽ ശക്തിപ്പെടുന്ന സമരങ്ങൾ ഇന്ത്യയെ വീണ്ടെടുക്കാനുള്ള പോരാട്ടങ്ങളാണെന്ന് മുസ്ലിം ലീഗ് ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടി എം പി പറഞ്ഞു. ബാബ്‌റി ധ്വംസന കേസിലെ പ്രതികളെ കോടതി വിധിക്കെതിരായി ഗാന്ധി ജയന്തി ദിനത്തിൽ യൂത്ത് ലീഗ് ദേശീയ കമ്മിറ്റി സംഘടിപ്പിച്ച പ്രതിഷേധ പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
സർക്കാർ സംവിധാനങ്ങൾ മാത്രമല്ല തീർത്തും സ്വതന്ത്രമായി പ്രവർത്തിക്കേണ്ട നീതിന്യായ കോടതികൾ പോലും ഭരണഘടനാ മൂല്യങ്ങളിൽ നിന്ന് വ്യതിചലിക്കുന്നതിന്റെ കൃത്യമായ സൂചനയാണ് ബാബ്‌റി കേസിലെ ലഖ്നൗ സിബിഐ കോടതിയുടെ വിധി. ഗാന്ധി വധം പോലെ തന്നെ ക്രൂരമായിരുന്നു
ബാബ്‌റി മസ്ജിദ് തകർത്ത സംഭവവും.
Also Read: കലാഭവൻ മണിയുടെ സഹോദരന്‍റെ ആത്മഹത്യാശ്രമം: കെപിഎസി ലളിതക്കെതിരെ ബിജെപി
ഗാന്ധിജയന്തി ദിനത്തിൽ തന്നെ ഉത്തർപ്രദേശിലെ ഹത്റസിൽ നിന്നു കേൾക്കുന്ന വാർത്തകൾ രാജ്യം ചെന്നു പതിച്ച ഗതികേടിന്റെ തെളിവാണ്. ഒരു ദളിത് പെൺകുട്ടിയുടെ മൃതശരീരത്തോട് യുപി പോലീസ് കാണിച്ച ക്രൂരത ഗാന്ധി പിറന്ന നാടിന് അപമാനമാണ്. അതിനു ശേഷവും ആ കുടുംബത്തിനെതിരായ അതിക്രമവും ഭീഷണിയും തുടരുന്നു. ഇതിനെതിരെ ഡൽഹിയിലും യുപിയിലും ശക്തിപ്പെടുന്ന സമരങ്ങളോടുള്ള ഭയമാണ് രാഹുൽ ഗാന്ധിക്കെതിരായ യുപി പോലീസിന്റെ നടപടിയില്‍ പ്രതിഫലിക്കുന്നത്.
Also Read: കുഞ്ഞിന് പേരിടണമെന്ന പ്രമീളയുടെ ആഗ്രഹം സഫലീകരിക്കുമോ? കാത്തിരിക്കുകയാണ് സുഭാഷും കുടുംബവും
വിവാദ കാർഷിക ബില്ലുകൾക്കെതിരായ കർഷക സമരവും അനുദിനം ശക്തിപ്പെടുകയാണ്. മോദി സര്‍ക്കാരിന്റെ തല തിരിഞ്ഞ സാമ്പത്തിക നയങ്ങൾക്കും ഫാസിസ്റ്റ് അജണ്ടകൾക്കുമെതിരായ പോരാട്ടത്തെ ശക്തമായി മുന്നോട്ട് നയിക്കുക എന്നതാണ് ഈ ഗാന്ധിജയന്തി ദിനത്തിലെ സന്ദേശമെന്ന് അദ്ദേഹം പറഞ്ഞു.
മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ