കഴിഞ്ഞ തവണ ജയം ഒരു വോട്ടിന്; ഇത്തവണ മത്സരം ജനറൽ സീറ്റിൽ, ജയപ്രതീക്ഷയിൽ റസിയ

മലപ്പുറം: കഴിഞ്ഞ തദ്ദേശ തെരഞ്ഞെടുപ്പില്‍ ഒരു വോട്ടിന് ജയിച്ച റസിയയുടെ നിയോഗം ഇത്തവണ ജനറല്‍ സീറ്റ് പിടിച്ചെടുക്കാന്‍. ജനറല്‍ വാര്‍ഡില്‍ മത്സരിക്കാന്‍ പ്രാദേശിക നേതാക്കളുടെ പോര് നടക്കുന്നതിനിടയിലാണ് ജനറല്‍ സീറ്റിലേക്ക് അതും മലപ്പുറം മങ്കട പഞ്ചായത്തില്‍ ഒരു വനിതാ സ്ഥാനാര്‍ഥിയെ പരിഗണിച്ചത്. മങ്കട പഞ്ചായത്തിലെ 16-ാം വാര്‍ഡ് മഞ്ചേരിത്തോട് ജനറല്‍ സീറ്റിലാണ് ഇത്തവണ റസിയ പൂന്തോട്ടത്തില്‍ മത്സരിക്കുന്നത്.

Also Read: ഫ്ലക്‌സിന് പകരം തെങ്ങോലയും കവുങ്ങിൻ പാളയും; വോട്ടഭ്യർത്ഥന ആലിലയിലും

മങ്കട ഗ്രാമ പഞ്ചായത്ത് സ്ഥിരം സമിതി ചെയര്‍പേഴ്‌സണായിരുന്ന റസിയ മൂന്നാം തവണയാണ് ഒരേ വാര്‍ഡില്‍ നിന്ന് ജനവിധി തേടുന്നത്. അതും സിപിഐയുടെ മലപ്പുറം ജില്ലാ നേതാവും ശക്തനായ യുവസമര പോരാളിയുമായ പി ടി ഷറഫുദ്ദീനെയാണ് എതിരിടുന്നത്. കാലങ്ങളായി ഇടത് കോട്ടയെന്ന് കരുതിപ്പോന്നിരുന്ന വാര്‍ഡില്‍ കഴിഞ്ഞ തവണ ചതുര്‍ കോണ തീപ്പൊരി മത്സരത്തില്‍ ഒരു വോട്ട് ഭൂരിപക്ഷത്തിനാണ് റസിയ പൂന്തോട്ടത്തില്‍ തെരഞ്ഞെടുക്കപ്പെട്ടത്. യുഡിഎഫും എല്‍ഡിഎഫും ബിജെപിയും വെല്‍ഫെയര്‍ പാര്‍ട്ടിയുമാണ് മത്സരരംഗത്തുണ്ടായിരുന്നത്. അന്ന് യുഡിഎഫ് നേടിയത് അട്ടിമറി വിജയമായിരുന്നു. ഗ്രാമ പഞ്ചായത്ത് ഭരണം നഷ്ടപ്പെട്ട യുഡിഎഫിന് ആശ്വാസം നല്‍കിയതും ഈ വിജയമാണ്.

Also Read: 'സ്ഥാനാർഥികൾ വരും പോകും, ചിലർ ജയിക്കും ചിലർ തോൽക്കും... ശ്രദ്ധിച്ചില്ലെങ്കിൽ കൊറോണ വരും'; വൈറലായി ഹാസ്യചിത്രം

റസിയ പൂന്തോട്ടത്തിലിൻ്റെ പ്രവര്‍ത്തന മികവാണ് ഇത്തവണ ജനറല്‍ സീറ്റില്‍ മത്സരിക്കാന്‍ യുഡിഎഫ് വീണ്ടും അവസരം നല്‍കിയത്. തൻ്റെ വാര്‍ഡിലെ ഓരോ വോട്ടറെയും നേരിട്ട് ബന്ധമുണ്ടാക്കിയ റസിയ ഒരോ വീട്ടിലും കുടുംബാംഗമായി മാറുന്ന കാഴ്ചയാണ് പിന്നീടുണ്ടായത്. ജീവിതം മുഴുസമയം പൊതുപ്രവര്‍ത്തനത്തിനായി സമര്‍പ്പിച്ച് റസിയ നേടിയെടുത്ത വലിയ ജനപിന്തുണ വോട്ടായി മാറുമെന്ന തികഞ്ഞ പ്രതീക്ഷയാണ് യുഡിഎഫിനുള്ളത്. എന്നാല്‍ കഴിഞ്ഞ തവണ നഷ്ടപ്പെട്ട സീറ്റ് തിരിച്ച് പിടിക്കാനാണ് ഇടതു മുന്നണി സിപിഐ ജില്ലാ നേതാവിനെ തന്നെ രംഗത്തിറക്കി പരീക്ഷിക്കുന്നത്. മങ്കട കടന്നമണ്ണയിലെ പൂന്തോട്ടത്തില്‍ അബ്ദുല്‍ റഷീദിൻ്റെ ഭാര്യയും രാമപുരം സ്‌കൂള്‍ പടിയിലെ പരേതനായ കല്ലായി കുഞ്ഞാണി ഹാജിയുടെ മകളുമാണ് റസിയ.


മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


മലപ്പുറം ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ